Ikpe Onye-Nwe-Ọha
2
Lee gẹ Onye-Nwe-Ọha gudeẹhu-eghughu iya kwekputa
ada Záyọnu urwukpu, gbarụ tsụrikiti.
Ùgvù ono, ndu Ízurẹlu shi nweru je akpaa l'igwe
b'o wotsutawaru ọ daa l'alị.
Mbọku ono, ẹhu l'eghu iya eghu
bẹ l'ọoto nyatadụa ẹka l'ọotu-kobeje ọkpa.
2 Onye-Nwe-Ọha bẹ takụberu
ẹnya laa ẹka lile, Jékọpu bu l'iyi.
Ọo oke ẹhu-eghughu iya b'o gude
kutsushia ẹka ada Juda tụru o shihu ike.
Ọ kwatsuwaru alị-eze ono mẹe ndu eze, l'achị iya nụ
shi nno nafụ whẹ ugvu whẹ.
3 O gude g'ẹhu l'eghube iya eghu
nafụ Ízurẹlu ike lile o nweru.
O sefuru ẹka-ụtara iya l'ẹhu whẹ
nteke ọ whụru ndu ọhogu gẹ whẹ l'eje abyakfuta whẹ.
O reru whuruwhuru g'ọo ire ọku l'ẹka Jékọpu nọ,
mbụ ire ọku, l'atụkoje iwhe o jekfuru rechafu.
4 O kwewaru akfụ iya g'ọo onye ọhogu.
Ọ kfụwaru gude ẹka-ụtara iya
seta iya jịjiji g'ọo onye ọhogu.
Iwhe bụ ndu, dụ ugvu l'ẹnya b'ọ
tụkowaru gbukota l'ụlo-ẹkwa nwada Záyọnu.
Ẹhu-eghughu b'o kpukpushiru whẹ g'ọo ọku.
5 Onye-Nwe-Ọha gbee dụwaa nụ g'ọo ọhogu.
Ọ lakọtawaru Ízurẹlu l'iyi.
Ọ lakọtawaru ụlo ibe-eze lile, dụ iya nụ l'iyi,
bya emewaa t'iwhe bụ ẹka a tụru, o shihu ike l'alị ono
bụkotaru kpurupyata.
Nggụmawhu yẹle ọrya ẹkwa
b'o mewaru, ọ ka shii l'ẹhu ada Juda.
6 O gudewaa ike whọkashia mkpuumkpu iya
g'ọo onye whọkashiru mgbabu.
Ẹka l'aanọje ndzuko b'o mewaru ọ bụru kpurupyata.
Onye-Nwe-Ọha mewaru, Záyọnu
nyazọshia nteke l'oorije oge mẹe
mbọku bụ mbọku-ọtuta-ume.
O gudewa g'ẹhu-eghughu iya l'enwube whuruwhuru
jịka onye eze mẹe onye l'agbajẹ ẹja.
7 Onye-Nwe-Ọha bẹ jịkawaru ẹnya-mgbẹja iya.
Ọ pawarụ ụlo-nsọ iya haa.
O wowaru mgbodo ibe-eze ndu Juda ye ndu ọhogu l'ẹka.
Whẹ nọdu l'ụlo Onye-Nwe-Ọha
tụa orooroo g'ọo mbọku, l'eeri oge.
8 Onye-Nwe-Ọha chịpyawaru iya l'ime obu iya
lẹ ya l'e-nwutsushi mgbodo, e gude tụ-wheta
ada Záyọnu mgburumgburu.
Ọ kparụ iya oge mee ya gẹ l'ọo-dụ.
O to sewhu ẹka azụ jeye ọ lakọta iya l'iyi kpamụ.
O meru t'agbarara e gude
tuwheta iya mgburumgburu
yẹle mgbodo iya ryaa ẹkwa áwhụ.
Whẹ tụko gẹ whẹ ha yẹkpeshihu.
9 Ọnu ẹka l'eeshije abahụ iya
zewaru dabagee adaba l'ime alị.
Iwhe l'eegudeje atụ-chi iya atụ-chi
b'o mebyishiwaru lakọta iya l'iyi.
Eze, l'achị iya nụ yẹle ndu ishi iya bẹ lakọtawaru mba ọdo
je akwaburu.
Ọ tọ dụhedu iwu, l'achị whẹ nụ.
Ndu nkfuchiru Chileke, nọ l'ime
iya ta awhụjehe ọwhulenya, shi Onye-Nwe-Ọha l'ẹka.
10 Iwhe bụ ndu bụ ọgurenya ada
Záyọnu bẹ gwọshitawaru l'alị, ọnu ta adụ whẹ nke okfu.
Whẹ kpowaru ivovonyi wụa l'ishi, yee uwe ntsọmawhu whẹ.
Ụnwumgboko Jerúsalẹmu bẹ nọduwaa dẹe iwhu l'alị.
11 Mu ryatagewaru ẹkwa, ẹnya kochishigee mu ekochishi.
Meji l'etsu mu whaa-whaa; obu l'adafụ mu adafụ.
Iwhe kparụ iya nụ bụ lẹ ndu nkemu b'a lakọtawaru l'iyi.
Ụnwegirima nshịi mẹe ndu e he
l'ẹka bẹ ọ-da-mba l'atụ-tsukaa atụ-tsu l'ime mkpụkpu.
12 Whẹ l'echi mkpu asụje ne whẹ: “?Ndẹe nri, ndẹe mmẹe?”
O bụru g'ọ-da-mba l'atụkaa
whẹ g'ọo ndu e merwuru ẹhu l'ime mkpụkpu,
bya abụru nteke ndzụ whẹ l'agvụ agvụ l'ẹka ne whẹ.
13 ?Ọo gụnu bẹ mu l'e-kfu l'ẹka ị nọ?
?Ọo gụnu bẹ mu l'e-gude tụru yeru ghu,
gụbe ada Jerúsalẹmu?
?Ọo gụnu bẹ mu l'a-sụ l'ọ dụ g'ọo ghu?
?Ọo gụnu bẹ mu l'e-me gude
dụkota ghu obu, mbụ gụbe nwamgbọko, bụ Záyọnu?
Ọnya tụkoru ghu ẹhu abakọta yoyoyo g'ọo eze-ẹnyimu,
?Ọo onye l'e-me t'ọ kpọhu ghu?
14 Ọwhulenya ndu nkfuchiru
Chileke nọ l'ime ghu whụru bẹ ejire dụ, ụgho dụ iya.
Whẹ te ekpuhabudua ejo-iwhe, unu megbaberu goshi unu,
nke ọwhu l'ee-me t'a ba akpụhe unu lẹ ndzụ.
Iwhe whẹ kfuru lẹ whẹ whụru bụkota ẹdzuka.
Ọ bụru iwhe whẹ gude edusweshi ghu.
15 Iwhe bụ ndu l'aghata aghata l'akụje ẹka kpua ghu.
Whẹ l'akpọ-yikaa ẹhu,
ewhuwhe ishi l'ẹka ada Jerúsalẹmu nọ asụje:
“?Tọ bụnu-a mkpụkpu-a bụ
mkpụkpu ọbu, e shi ekuje onye ụma, l'ọoma dzuru oke;
ẹhu-ụtso ụnwu eliwhe l'owhu?”
16 Ndu ọhogu ghu gẹ whẹ ha
sawarụ ọnu whalaa ebukaa iwhu atụ ghu.
Whẹ l'awhụru ghu okpurọswa, anyarụ ghu eze.
Iwhe whẹ l'aryakaa bụ;
“Anyi akabẹ laa iya l'iyi ọbu!
Ọo ẹgube ntanụ bẹ anyi shi leta ẹnya iya.
Ntaa bẹ anyi nọduwaa ndzụ whụ ishi iya.”
17 Onye-Nwe-Ọha bẹ mewaru iwhe ọ tụberu ememe.
O mewaru iwhe ọ sụru l'oo-me,
bụ g'o kfuru iya nteke tehawaru ẹnya.
Ọ takụbewaru ẹnya kwatsua ghu.
O mewaru t'ọhogu tụru okoo kpua ghu.
O nokwawho g'o kutseru ike ndu
ono, kpọro ghu ashị ekutse.
18 T'obu ụnwu eliwhe chiku
Onye-Nwe-Ọha lẹ mkpu ẹkwa.
Gụbe mgbodo, nọ-wheru ada
Záyọnu mgburumgburu;
t'ẹnya-mini shi ghu l'ẹnya sọje
gborogboro g'ọo ẹnyimu, eswe l'ẹnyashi!
Ba atụtakwa ume ẹkwa ono l'ịirya!
Ryatakwa iya t'ẹnya kochia ghu ekochi.
19 Gbalihu chia mkpu l'ẹnyashi,
l'oge nteke ono, nche abalị l'awatajẹ.
Gụhaa obu ghu wụshi l'atatiwhu
Onye-Nwe-Ọha g'ọo onye wụshiru mini.
Chilia ẹka ghu imeli kpọ-kua ya
l'iswi ndzụ ụnwegirima ghu,
bụ ndu ọ-da-mba l'atụkaa l'okfu
ẹgu l'ẹka lile l'ime mkpụkpu.
20 “Jiko Onye-Nwe-Ọha; lenua ẹnya whụdu nụ.
?Ọo onye b'i mejeru ẹgube-ẹ?
?Ọo t'ụnwanyi rilahaa anụ ụnwegirima whẹ,
mbụ ụnwegirima ono, whẹ heru?
?Ọo t'e gbulahaa ndu l'agbajẹ ẹja nụ
Chileke mẹe ndu nkfuchiru Chileke
l'ụlo-nsọ Onye-Nwe-Ọha?
21 Nwata mẹe ọgurenya bẹ
tụkowaru daburu l'ivovonyi, dụ lẹ mkpụkpu ono.
Ụnwu okorọbya mẹe ụnwumgboko mu
b'e gbushigewaru lẹ mma.
Ọo mbọku iwe dụ ghu l'ẹhu b'i gbugbushiru whẹ.
I gburu whẹ, t'ị whụru imiko.
22 Ọo gẹ l'eekuje ndzuko mẹ l'eeri
oge bụ g'i kukoberu iwhe-ntsumegvu
tẹ whẹ swiwhe whẹ mgburumgburu.
Mbọku iwe dụ Onye-Nwe-Ọha
l'ẹhu bẹ l'ọotoo dụdua onye gbalarụ nụ,
ọ dụa l'ọo onye wafụru nụ.
Iwhe bụ ndu mu heru hefuta bẹ
ndu ọhogu mu whẹ lakọtawaru l'iyi.”