Ẹkwo
EGVU-ÁWHỤ
Iwhe-ọtsulanu, byakfutaru Jerúsalẹmu
1
Lewaro gẹ mkpụkpu ono daburu nkụnyi,mbụ mkpụkpu ono, madzụ shi jifuta kpaa l'ọnu!
Lewaro g'ọ bya adụ g'ọo nwanyị-mbunu,
mbụ onye ono, e shi marụ ẹwha iya lẹ mba gẹ mba ha!
Onye ono, shi bụru eze-nwanyị
l'iwhe bụ alị-eze l'owhu bẹ bụwaa nwohuta.
2 Ẹnyashi owhu bẹ l'ọoryakotaje ẹkwa tsọo kụrukuru.
Ẹnya-mini eshi iya l'ẹnya gụshihu
bya asọ-kfuru iya l'ishi asa.
Ndu lile, yẹle iya dụ lẹ mma ta
adụdu onye ọwhu l'abyajẹ bya adụa ya obu.
Iwhe bụ ndu yẹle iya l'eshi ọnya bẹ nwuwaru iya buhaa.
Ntaa bẹ whẹ bụwaa ndu ọhogu iya.
3 Juda bẹ nọ lẹ mkpamẹhu,
bya egude oje ozhi mkpọnwuru,
gbarụ laa alị ọdo je eburu.
Ntaa b'o buwaa l'echilabọ ndu mba ọdo.
Ọle ọ to dụdu ẹka ọ whụru tụta ume.
Ndu l'achị iya nke egude bẹ
gbabutaru iya iwhu l'ẹka ọ nọ l'awhụ.
4 Echi-ụzo, e shi eje Záyọnu l'agụkaa áwhụ,
o noo nkele ọ tọ dụdu onye
l'aghatajẹkwadu iya eje l'oge.
Ọnoguzo lile, bụ ẹka l'eeshije
abahụ iya nụ bẹ dachishihuwaru nụ.
Ndu l'agbajẹ ẹja lẹ Záyọnu l'atsụ ude.
Iwhe bụ ụnwumgboko Záyọnu l'eje iwhe awhụ.
Záyọnu l'onwiya l'eje
iwhe-ọtsulanu, ka l'iwhe-ọtsulanu.
5 Ndu l'akpa iya ẹhu bụwa whẹ bẹ iwhe lile kụru ishi l'ẹka.
Ọ tọ dụdu iwhe l'atsụ ndu ọhogu iya l'anụ.
Ọo Onye-Nwe-Ọha bẹ wokfutaru iya awhụ,
nkele emeswe, o mesweru bẹ panụkaru ẹka.
Ụnwegirima iya bẹ lakọtawaru alị ọdo je eburu.
Mbụ lẹ ndu ọhogu kpụkotawaru whẹ lẹ ndzụ laa alị whẹ.
6 Ugvu lile, nwada Záyọnu shi
nweru lụfukotawaru iya l'ẹhu.
Ndu ishi Záyọnu dụwaa g'ọo ele, l'ẹte awhụa iwhe l'oori.
Ume gvụwaru whẹ l'ẹka whẹ
l'agbarụ ndu l'achị whẹ nụ ọso.
7 Ntaa, mkpamẹhu mẹe iwhe ọgha ririri byarụ
bẹ Jerúsalẹmu nyatarụ ẹku lile, o shi nweru,
mbụ ẹku ono, o shi nweru l'oge ndụ-ichee.
Nteke ndu nkiya dabarụ l'ẹka ndu
ọhogu, bẹ l'ọoto dụdua onye gbatarụ iya nụ.
Ndu ọhogu iya l'anọje ele iya nlegbu-l'ẹnya,
aja iya ewenu mẹe iyi byarụ iya.
8 Jerúsalẹmu meru iwhe-dụ-ẹji, parụ ẹka.
O shiwa l'ome ẹji nno bụru onye
metoshiru onwiya emetoshi.
Ndu lile shi akwabẹ iya ugvu bẹ
l'akpọwa iya ẹbo-ẹbo l'afụ,
o noo nkele whẹ whụru iya g'ọ gba ọto.
Yẹbedua l'onwiya l'atsụ ude.
O woru iwhu ghachi l'ụzo ibe iya ọdo.
9 Emetoshi ono, o metoshiru
onwiya bẹ rakụru l'iwhe l'o ye l'ẹhu.
Ọ tọ rịdu ọriri rị-vu ẹgube iwhe l'a-dakfuta iya l'atatiwhu.
Ntaa b'ọ dawarụ tsua ọnu l'alị, to nwe onye dụru iya obu.
“Jiko Onye-Nwe-Ọha, leeda
ẹgube iwhe-ọtsulanu mu l'eje;
ntaa bẹ ndu ọhogu l'atụ okoo ekpu mu.”
10 Ndu ọhogu bẹ chịtakotawaru ẹku lile, whẹ nwe enwe.
Ọ bya awhụ ndu mba, l'ẹte amaa
Chileke gẹ whẹ wụbataru l'ụlo-nsọ iya,
mbụ ndu ono, gụbe Chileke
buchiru ọbata lẹ ndzuko ndu nkeghu.
11 Ndu nkiya a gẹ whẹ ha l'atsụkota ude l'okfu nri.
Whẹ l'ewojeru ẹku whẹ nụ l'okfu nri,
gẹ l'eeshi tẹ whẹ nọdunu ọwhube ndzụ.
“Jiko Onye-Nwe-Ọha lenua ẹnya nyata mu,
nkele a ta agụbedu mu iwhe.”
12 “?Tọ dụdu iwhe ọ bụ l'ẹnya
unubẹ ndu l'aghata aghata?
Unu lewheedaa ẹnya elewhe;
marụ m'o -nweru iwhe awhụ ọdo,
ka iwhe awhụ ọwhu mu l'eje,
mbụ iwhe awhụ, e wokfutaru mu.
Ọo Onye-Nwe-Ọha bụ iya tụru iwhe awhụ ono nụ mu;
mbọku oke ẹhu-eghughu l'enwu iya whuruwhuru l'ẹhu.
13 O shi l'imeli zhifu ọku;
o zhiru iya ọ bya atụko mu ọkpu kepyata.
O wotaru ụgbu gechia ẹka mu gege eshi gbafụ.
O nwuwhuru mu azụ.
O mewaru tẹ mu bụru onye nkụnyi.
Mbọkumboku bẹ l'oomeje t'ẹhu tsụshia mu mmẹe.
14 Emeswe, mu mesweru b'ọ gakọwaru ọnu,
O gude ẹka iya kpaa ya akpakpa, o dzegbabe edzegbabe.
Ọ nyabẹwaru mu iya l'olu.
Onye-nwe-mu nụ bẹ mewaru t'ike gvụ mu,
woru mu ye l'ẹka ndu ọkpehu whẹ ka nkemu shii.
15 Onye-nwe-mu nụ bẹ jịkawaru ndu ike dụ l'ọgu,
bụ ndu ono mu lẹ whẹ shi nọdu.
O kuru ndu ojọgu tẹ whẹ dzukobe bya alwụshi mu ọgu;
mbụ tẹ whẹ gwepyashia unwokorọbya mu ishi.
Onye-nwe-mu nụ dzọwaru ada Juda fụtu-fụtu,
g'ọo onye l'adzọshi mmẹe l'akpụru vayịnu.
16 Ọo iwhe ono bẹ kparụ mu ọrya ẹkwa,
mbụ ẹnya-mini l'ala mu motomoto l'ẹnya.
Ọ tọ dụdu onye nọ mu ntse, l'a-dụ mu obu,
tọ dụ onye l'e-me tẹ mu budzua ume.
Ntaa bẹ ụnwegirima mu bụwa nkụnyi,
O noo nkele ọhogu bẹ lwụ-gbuwaru nụ.”
17 Záyọnu machịru ẹka iya amachị,
ọle ọ tọ dụdu onye l'a-dụ iya obu.
Onye-Nwe-Ọha bẹ tụwaru iya g'ọo
iwu l'eli ishi Jékọpu tẹ ndu
buwheru iya mgburumgburu bụru ọhogu iya.
Jerúsalẹmu bụakwa onye mmerwu dụ l'ẹhu l'ẹka whẹ nọ.
18 “Onye-Nwe-Ọha l'eme iwhe kfụru nhamụnha.
O noo nkele mu kwefuru ike l'okfu iya.
Ụnwu eliwhe, unu ngabẹedawho nchị,
unu leedanu ẹgube iwhe-ọtsulanu mu l'eje.
Ụnwu okorọbya mu mẹe ụnwumgboko mu
bẹ lakọtawaru alị ọdo je eburu.
19 Mu ryakuru ndu mu lẹ whẹ dụ lẹ mma,
whẹ gbagbua mu l'ẹregede.
Ndu nkemu, bụ ndu l'agbajẹ ẹja mẹe ndu bụ ọgurenya
bẹ bụkotawaa kpurupyata l'ime mkpụkpu,
l'ẹka whẹ l'achọ nri, whẹ l'e-ri nọdu ndzụ.
20 Oowa, byiko Onye-Nwe-Ọha
leedanu g'awhụ mu habe shii.
Eze iwhe-ọtsulanu dụ lẹ ndzụ mu.
Meji l'etsu mu otsu owhe nkele mu kwefunukaru ike.
L'ime mkpụkpu b'e gude ogu-ịgba egbushi madzụ.
A bya l'ụlo, ọ bụru mgbu-ọnwu l'egbu.
21 Ndu madzụ nụwaru ude, mu l'atsụ.
Ọle ọ tọ dụdu onye l'a-dụ mu obu.
Ndu ọhogu mu gẹ whẹ ha nụwaru nke iwhe-ọtsulanu, mu l'eje.
Ọ bụru ẹswa gbee ji whẹ obu l'ọo ghu meru mu iya.
Tẹ mbọku ono, i kfuru okfu iya byanụ,
ndụge whẹ dụ gẹ mu dụ.
22 T'ejo-ememe lile, whẹ l'emegbabe rwunua atatiwhu ghu;
menua whẹ ẹgube ono, i meru mu; iswi lẹ mu mesweru.
Ude, mu l'atsụ bẹ ha l'igweligwe, obu mu dawaa mba.”