Jeremáya gbarụ Hananiya l'anwụ
28
Ọ kwawhọ l'awha ono; gẹ Zedekaya bebelewho bụru eze ndu Juda; l'ọnwa nke ise l'awha kwe iya awha ẹno, bẹ nwa Azuru, ẹwha iya bụ Hananiya, onye nkfuchiru, shi lẹ mkpụkpu Gibyiyọnu, nọdu l'iwhu ndu l'agbajẹ ẹja nụ Chileke mẹe l'iwhu ndu Ízurẹlu l'eze-ụlo Onye-Nwe-Ọha; sụ mu: 2 “Ọ waa iwhe Onye-Nwe-Ọha, bụ Onye-ishi-igwe-ọgu, bụ Chileke nke Ízurẹlu bẹ l'ekfu ndọwa: ‘Mu nyakashịakwaru odogoro eze ndu Bábyilọnu. 3 L'ime awha labọ ntaa, bẹ mu l'a-tụko arya ono, l'adụje l'eze-ụlo Onye-Nwe-Ọha, Nebukadineza, bụ eze ndu Bábyilọnu chịtaru l'ẹka-a laa alị Bábyilọnu gwolatawhu azụ. 4 O nokwawho gẹ mu l'e-dulata eze ndu Juda ono, bụ Jehoyakinu nwa Jehoyakimu mẹe iwhe bụ ndu Juda, a kpụkotaru lẹ ndzụ laa alị Bábyilọnu. O noo nkele odogoro nke eze ndu Bábyilọnu bẹ mu l'a-nyakashị anyakashị.’ ” O nokwa iwhe Onye-Nwe-Ọha l'ekfu ndono.5 Tọ dụ iya bụ, onye nkfuchiru, bụ Jeremáya nọdu l'iwhu ndu l'agbajẹ ẹja nụ Chileke mẹe l'iwhu ndu lile kfụru l'eze-ụlo Onye-Nwe-Ọha ono, yeeru onye nkfuchiru ono, bụ Hananiya ọnu. 6 Onye nkfuchiru, bụ Jeremáya sụru iya: “T'ọ dụkwa g'i kfuru! Tẹ Onye-Nwe-Ọha mekwaa t'ọ dụ nno! T'o mekwaa t'ọ vụa, mbụ okfu ono, i kfuru lẹ nkfuchiru nggẹ o gwolatawhu arya ono, l'adụje l'eze-ụlo Onye-Nwe-Ọha azụ l'ẹka-a yẹle ndu ono, a kpụru lẹ ndzụ laa alị Bábyilọnu! 7 Ọle g'ọ dụle-zhia, ngabẹkwa nchị nụ iwhe mu l'eme tẹ mu kfuru ye ghu lẹ nchị mẹe lẹ nchị ndu-a gẹ whẹ ha. 8 Ndu nkfuchiru, byarụ l'oge ndụ-ichee, tẹmenu gụbedua mẹe mbẹdua byadẹ, bẹ bụ okfu ọgu mẹe mkpẹgu mẹe ejo ẹhu-ba-dụ-mma bẹ whẹ shi anọje ekfu l'ishi igweligwe mba mẹe alị-eze, parụ ẹka. 9 Onye nkfuchiru ọwhu bụlewho lẹ nchị l'a-dụ doo bẹ l'ookfuje; nteke l'aa-hụbe ama l'ọo Onye-Nwe-Ọha zhiru iya bẹ bụ mẹe iwhe l'ookfu vụa.”
10 O noo ya, onye nkfuchiru ono, bụ Hananiya bya ekofu onye nkfuchiru, bụ Jeremáya odogoro ono, ọ nya l'olu woru nyakashịa. 11 Hananiya nọdu l'iwhu ndu ono sụ: “Ọ waa iwhe Onye-Nwe-Ọha l'ekfu ndọwa: ‘Ọo ẹgube ono bẹ mu l'a-nyakashị odogoro ono, Nebukadineza, bụ eze ndu Bábyilọnu nyabẹru mba lile l'olu l'ime awha labọ ntaa.’ ” O kfulewho ẹgube ono, Jeremáya tụgbua, ọ bụru iya alụfu.
12 A nọta-be, g'onye nkfuchiru ono, bụ Hananiya nyafụta-geeru onye nkfuchiru ono, bụ Jeremáya odogoro ono l'olu woru nyakashịa; Onye-Nwe-Ọha kfuru okfu nụ Jeremáya sụ iya: 13 “Je akarụ Hananiya l'ọ waa iwhe Onye-Nwe-Ọha l'ekfu ndọwa: Iwhe ị nyakaru bụkwa odogoro oshi, ọle ọo odogoro igwe bẹ mu l'e-gude dochia ẹnya iya. 14 Ọ waa iwhe Onye-Nwe-Ọha, bụ Onye-ishi-igwe-ọgu, bụ Chileke nke Ízurẹlu l'ekfu ndọwa: ‘Mu l'e-woru odogoro igwe nyabẹ mba lile l'olu kpụru kpẹe Nebukadineza, bụ eze ndu Bábyilọnu tẹ whẹ bụru ohu iya. Je akpaa l'anụ-ẹgbudu l'a-nọ ejeru iya ozhi.’ ”
15 Tọ dụ iya bụ, onye nkfuchiru, bụ Jeremáya sụ onye nkfuchiru, bụ Hananiya sụ iya: “Hananiya; gebe nchị! Ọ tọ bụkwa Onye-Nwe-Ọha bẹ zhiru ghu t'ị bya; i mewaa ndu-a, whẹ kpọru obu ye l'iwhe bụ ejire. 16 Ọo ya bụ l'ọ waa iwhe meru g'o gude Onye-Nwe-Ọha l'ekfu ndọwa: ‘Mu l'abyakwa ghu ewofu lẹ mgboko-o. Ịi-nwụhu l'awha ọwa gẹdegede nkele i kfuwaru okfu, l'eme t'e kwefuru Onye-Nwe-Ọha ike.’ ”
17 Ọ bụru l'ọnwa nke ẹsaa l'awha ono bẹ onye nkfuchiru ono, bụ Hananiya megeeru nwụhu.