Onye ozhi nke Onye-Nwe-Ọha
49
Unu ngabẹru mu nchị unubẹ ndu bukube eze-ẹnyimu.Unu nụa iwhe-e mu l'ekfu,
unubẹ mba ono, bu otẹnya.
Onye-Nwe-Ọha vukwa ụzo kua mu tẹmenu a nwụa mu.
Ọo rọ nteke mu nọkwadu l'ẹwho
ne mu b'o kuru mu ẹwha.
2 Okfu-ọnu mu b'o meru l'ọotsu
nkọ g'ọo ogu-ịgba, a barụ ababa.
O domiru mu lẹ mkpula ọbochi-ẹka iya.
O meru mu, mu dụ g'ọo akfụ, e hucharu ehucha,
o woru mu kwachia l'ẹkpa-akfụ iya.
3 Ọ sụ mu: “Ízurẹlu, ị bụ onye l'ejeru mu ozhi.
Ọo ghu bẹ mu l'e-gude goshi gẹ mu dụ-be biribiri.”
4 Mbẹdua sụkwanu: “Anya mu
seru bụkota mu nke mmaka.
Ọkpehu, mu swịshiru onwomu
bụru mu nke mmaka, bụru mu iwhe iwhoro.
Ọle iwhe rwuberu Mu bụ Onye-Nwe-Ọha b'ọ dụ l'ẹka.
Obunggo mu bụru Chileke mu gude iya.”
5 Ntaa bẹ Onye-Nwe-Ọha l'ekfu sụ;
mbụ onye ono, shiro nteke mu nọ l'ẹwho ne mu
mee mu tẹ mu bụru onye l'e-jeru iya ozhi,
tẹ mu dutawhuru iya ụnwu Jékọpu azụ,
chịkobe ụnwu Ízurẹlu tẹ whẹ lwakfutawhu iya azụ.
Mu bụ onye Onye-Nwe-Ọha meru ugvu nụ,
ọ bụru Chileke mu shi bụtaru ike mu.
6 Onye-Nwe-Ọha l'ekfu sụ:
“Ọ tọ bụlekwaa t'ị bụru onye l'ejeru mu ozhi,
mbụ t'i dobe ikfu Jékọpu l'ọnodu whẹ ọdo,
mẹe t'i dulataru mu ndu Ízurẹlu,
bụ nwa ndu ọwhu mu doberu.
Mu l'e-mekwa ghu whọ,
gụ abụru iwhoro dụru ndu l'ẹte abụa ndu Ju,
nke ọwhu l'ee-shi l'ẹka ghu,
ndzọfuta nkemu erwua ẹka mgboko beru.”
7 Ọ waa iwhe Onye-Nwe-Ọha l'ekfu ndọwa,
mbụ onye ono, bụ onye Mgbafụta,
bụru onye nsọ nke Ízurẹlu.
Ookfu iya anụ onye ono,
mba lile jịkaru jị-nyia ẹnya akpọ-yiru ukuvu,
onye ono, bụ onye ozhi nke ndu l'achị nụ.
Ọ sụru iya:
“Ndu eze l'e-megekwa whụa ghu wụ-lishihuru ghu.
Ndu bụ ishi awhụa ghu daarụ ghu pẹe l'alị.
Onye l'e-me iya bụ Onye-Nwe-Ọha,
mbụ onye ono bụ o-me-g'o-kfuru;
onye bụ onye nsọ nke Ízurẹlu,
ọ bụru iya bụ onye họtaru ghu.”
Odobe Ízurẹlu l'ọnodu iya
8 Ọ waa bụ iwhe Onye-Nwe-Ọha l'ekfu:
“Ọo nteke ọ gbarụ l'ome iwhe-ọma bẹ mu l'a-za ghu oku.
Mu adzọkwaa ghu whọ lẹ mbọku nke adzọdzo.
Mu l'a-kwakọbe ghu, mee ghu t'ị bụru onye,
yẹle ndiwhe l'e-gude gbaa ndzụ,
t'i dobewhu alị ono azụ l'ọnodu iya,
mee tẹ whẹ lwawhu azụ l'alị whẹ ono, ẹgbara shiwaa kfụa,
9 mẹe nke ọwhu l'ịi-sụ ndu nọ
l'ọka-mkpọro tẹ whẹ shi lẹ mkpọro ono fụta,
gụ asụkwawho ndu nọ
l'ẹkpuroochi t'ẹhu bụru whẹ whororo.
Whẹ l'a-dụ g'ọo ụnwu-atụru, tsoru echi-ụzo ata nri,
nri abọsaaru whẹ lẹ chakịri chakịri ugvu g'ugvu ha.
10 Ẹgu ta abyadụ l'a-gụ whẹ,
ẹgu mini ta abya l'a-gụ whẹ.
Okpomọku, shi l'echi-ẹgu yẹle o-chi-gbaagbaa anwụ
ta abyadụ l'e-rwu whẹ l'ẹhu.
O noo nkele onye ono,
nweru obu-imiko l'ẹka whẹ nọ l'e-du whẹ.
Oo-duru whẹ shia mgboro ẹka mini, shi anwụfuta.
11 Mu l'e-me t'echi-ụzo ghakọta
l'ugvu g'ugvu ha, bụ nkemu.
Echi-ụzo nkemu abụru ẹka e meru t'ọ ha l'eli.
12 Whẹ l'e-shikakwaa l'ẹka teru ẹnya lwa.
Ndu l'a-harụ shi l'ụzo isheli;
ndu aharu shi l'ụzo ẹnyanwu-arịba.
O nwekwaruwho ndu ọwhu l'e-shi alị Sinimu lwa.”
13 Unubẹ imigwe l'owhu, unu gụa egvu ẹhu-ụtso!
Gụbe mgboko, gụ etee ẹswa!
Unubẹ ugvu g'ugvu ha, unu dabarahụ l'ọgu egvu!
Nkele Onye-Nwe-Ọha l'adụwaa ndibe iya obu.
O je l'a-whụru ndibe iya ono, nọ l'iwhe-ọtsulanu imiko.
Chileke yeru Záyọnu obu
14 Obenu lẹ Záyọnu sụru:
“Onye-Nwe-Ọha bẹ buhawaru mu ẹka.
Onye-nwe-mu nụ bẹ nyazọwaru mu.”
15 “Ne, ?l'ọozohaje nwa, l'angụ iya ẹra l'obu tọo,
nke t'o bo nwe obu-imiko l'ẹka nwa, ọ nwụru nọ?
O -je l'azọha bẹ l'ọo-zọhakwa,
ọle mbẹdua ta azọhakwanu ghu!
16 Lekwa, mu meekwaru t'ẹwha
ghu shia uryi l'ọbochi-ẹka mu.
Mgbodo, e gude tụ-wheta
gụbe Záyọnu bẹ l'ẹte alụfudu mu alụfu l'atatiwhu.
17 Ụnwu ghu l'awụakwa alwa ntaantaa.
Ndu bụ whẹ meru ghu, ị bụru
ochuwhu l'atụgbuwaru alụfu.
18 Palia ẹnya apali lewhee
mgburumgburu, whụdunu.
Ụnwu ghu kpaa-whuu
l'edzukookwa tẹ whẹ lwakfuta ghu.
Iwhe mụbe Onye-Nwe-Ọha l'ekfu ndọwa:
Mu vuru-a ishi mu gẹ mu vu iya,
bẹ l'ii-megee yee whẹ g'ọo onye yeru uwe.
Ii-gude whẹ kwaa ngwa g'ọo
nwanyị, l'eekee ji nke ọ̀whúú.”
19 “A makwarụ-a l'e shi
mebyishia ghu, ị bụru ochuwhu,
alị ghu daburu karawhongu.
Ọle wata ntaa bẹ l'iitii dzuhedu ndibe ghu eburu.
Ndu ono, shi mebyishia ghu bẹ l'a-nọdu ghu otẹnya.
20 Ụnwegirima ono, a nwụshiru ghu nteke ono,
iwhe nwụkaru ghu
l'e-bekochakwaa kfuru iya ye ghu lẹ nchị sụ:
‘Alị-a bẹ mkpa dụnukawa anyi,
sụtabanuaru anyi ẹka anyi l'e-buru.’
21 Nteke ono bẹ l'ịi-sụ l'ime obu ghu:
‘?Oo onye ole nwụshiru mu ndu ọwaa?
Lẹ mụbe onye iwhe shi
nwụkaaru, mu ta atsụhe ime.
Lẹ mụbe onye shi bụru onye larụ alị ọdo,
tẹhenu mu shi bụru onye a chịfuru achịfu.
?Ọ kwanụ onye hefutaru ndu ọwa?
Lẹ mụbe onye a harụ, mu daburu nkụnyi mu.
Ndu ọwa-a shikwanu awe?’ ”
22 Ọ waa iwhe Nnajị-Ọha bụ
Onye-Nwe-Ọha l'ekfu ndọwa:
“Leenu, mu l'e-wheru mba lile ẹka.
Mu l'e-woli ẹkwa-ọhubama mu
gboberu mba gẹ mba ha.
Whẹ l'e-gude ẹka whẹ kulataru ghu ụnwu ghu nwoke,
whẹ akwọru ụnwada ghu akwọkwo kwọlataru ghu.
23 Ndu eze l'a-bụru nna, l'ehe ghu nụ.
Ndu eze-nwanyị abụru ne, l'ehe ghu nụ.
Whẹ l'a-nọ adarụ ghu bẹe
ewhuzeru ghu iwhu l'alị.
Whẹ amịchashi udzu ẹja, dụ ghu l'ọkpa.
Nteke ono bẹ l'ịi-marụ l'ọo Mu bụ Onye-Nwe-Ọha,
lẹ ndu ẹnya whẹ dụ l'ẹka mu nọ bẹ iwhere l'ete emejedu.”
24 ?Aanatajẹ ndu ojọgu iwhe whẹ kwatarụ l'ọgu?
?Aanafụje ndu obu-mgbashi ndu whẹ kpụru lẹ ndzụ?
25 Ọle ọ waa iwhe Onye-Nwe-Ọha bẹ l'ekfu ndọwa:
“Ndu ojọgu kpụru lẹ ndzụ bẹ l'aa-nafụkwa l'ẹka whẹ.
Ndu obu-mgbashi bẹ l'aa-nata iwhe whẹ kwatarụ l'ọgu.
Ndu l'alwụshi ghu ọgu bẹ mu l'a-lwụshi ọgu.
Mu je l'a-dzọfuta ụnwegirima ghu.
26 Ndu l'akpa ghu ẹhu bẹ mu l'e-me tẹ whẹ taa anụ onwowhe.
Whẹ l'a-ngụta mmee onwowhe
jeye ya atsụlahaa whẹ atsụtsu g'ọo mmẹe.
Nteke ono bẹ madzụ l'owhu
l'a-marụ l'ọo Mu bụ Onye-Nwe-Ọha,
bụru onye ndzọta nkeghu.
Mu bụ onye mgbafụta ghu; bụru Ọkalibe nke Jékọpu.”