Iwhe Chileke kfuru l'emeje
48
“Unu ngabẹ nchị l'okfu-a, unubẹ ọzo-ụlo Jékọpu,unubẹ ndu ono, l'eekuje ẹwha alarụ Ízurẹlu,
mbụ unubẹ eri Juda.
Unu l'egudeje ẹwha Onye-Nwe-Ọha ria nte.
Unu l'akpokuje Chileke nke Ízurẹlu,
ọle unu te egudejedu ire-lanụ kpokua ya,
tẹhenu unu ta akpokuje iya l'ụzo kfụru ọto.
2 Mbụ unubẹ ndu ono,
kuru onwunu ndu shi lẹ mkpụkpu, dụ nsọ,
etu onwunu ẹwha l'unu
dakoberu Chileke nke Ízurẹlu.
Ọ kwa Onye-Nwe-Ọha,
bụ Onye-ishi-igwe-ọgu bụ ẹwha iya.
3 Nteke tehawaru ẹnya bẹ mu kfuru iwhe mewaru nụ.
O shi mu l'ọnu fụta,
mu bya emekwaawho t'a marụ iya.
E jia ekfu, mu mee ya, ọ nwụa gẹ mu kfuru iya.
4 Ọo lẹ mu marụ l'ị bụ kpọkponyi,
mbụ l'ị bụ anyabata anyabata g'ọo mgbọro-igwe,
tẹmenu ị bụru ekwegekwe.
5 Ọo ya meru, mu kfuhawaru ghu
iwhe-e nteke teru mebyi ẹnya.
Tẹhenu ọ nwụa bẹ mu vu ụzo ryaarụ ghu iya aryarya,
nke ọwhu l'ịiti sụkwanu
l'ọo ọgvu ghu bẹ meru iwhe lile ono,
mbụ l'ọo agwa ono, ị pyịru apyị,
ọdua l'ọo ono, ị kpụru akpụ b'o shi l'ẹka ọ dụ nno.
6 Iwhe lile ono, mu sụru
l'oo-me b'ị nụkotawaru lẹ nchị ghu.
Whụwa iya rọ ntaa.
?Tii kwetadu lẹ nkemu bụ iya?
Wata ntaa tụgburu bẹ mu bya
l'a-nọ egoshi ghu iwhe ọ̀whúú,
mbụ iwhe e domiru edomi, l'ịiti maa.
7 Ọo buwoo ntaa b'e keru iwhe ọbu,
o too tehadua ẹnya, e keru iya.
Iwhe ọbu bẹ l'ịiti nụbudua lẹ nchị t'a gụfu ntanụ.
Nke ọwhu l'ịiti sụkwanu woo l'ọo iwhe ị mahawarụ.
8 Ị tịi nụbukwaa ya, tịi mahaa ya,
nkele i shi eshi nteke teru
mebyi ẹnya bụru arakpara nchị.
O doru mu ẹnya l'ị bụ mebyi onye ẹregede,
iwhe i shi l'ẹwho ne ghu zata bụru Okwerike.
9 Ọ kwa gẹ l'ee-shi t'ẹwha mu kfụru
meru g'o gude mu sedekwadu ẹhu-eghughu mu.
Ọ bụru gẹ l'ee-shi t'a jajẹ ẹwha mu ama
meru g'o gude mu sewhu ẹhu-eghughu mu azụ,
nke ọwhu mu l'ete emee ghu t'ị bụru kpurupyata.
10 Tii ledu, lẹ mu hụshiwaru ghu ẹgbabala;
l'ẹbe ọbu l'ị bụ mkpọla-ọcha.
Mu hụru ghu l'ovokọku nke iwhe-ọtsulanu.
11 Iwhe mu l'eme bẹ mu l'eme iya l'iswi onwomu.
Ọo l'iswi onwomu bẹ mu gude eme iya.
Nkele mu ta ahakwa t'e merwua ẹwha mu.
Mu te eworu ugvu, rwuberu mu nụ haarụ onye ọdo.
Ízurẹlu b'e meru t'o nweru onwiya
12 “Ngabẹru mu nchị gụbe Jékọpu,
mbụ gụbe Ízurẹlu, bu onye mu kuru oku:
Ọo mbẹdua bụ onye ọbu.
Ọo mu bụ onye ivurụzo bụru onye ikpazụ.
13 Ọ kwa mbẹdua gude ẹka mu
tụa ukfu mgboko-o l'owhu.
Ọ bụru mu gude ẹka-ụtara mu tụsaa igweli l'owhu.
Ọo oku, mu gbakushiru whẹ
bẹ whẹ tụkoru kfụfutakota bya adụ.
14 Unu tụko g'unu ha byakọta bya angabẹ nchị.
L'ime agwa unu l'owhu,
?ndẹe ọwhu dụje ike kfuaru unu sụ
l'onye ono, mụbe Onye-Nwe-Ọha họtaru
bẹ l'e-me ndu Bábyilọnu iwhe mu tụberu l'ẹhu whẹ,
mbụ l'ọo-da ndu Bábyilọnu ono ejo ẹka l'ẹhu.
15 Mbẹdua, mbụ lẹ mbẹdua bẹ kfuakwaru nkemu.
Ọ kwa g'ọ dụ ndono, ọo mu kuru iya oku.
Mu duwa iya bya, o je l'e-me
iwhe ọ byarụ ememe, mee ya mekota.
16 Unu kpụlitaru mu ntse bya
angabẹ nchị l'iwhe-e, mu l'ekfu,
E shi mbụlembu, mu shi kfuta okfu
bẹ mu l'ẹte ekfubudua okfu lẹ mpya.
Mu l'anọduje ya eree gẹ mu kfuru iya.”
Ntaa bẹ Nnajị-Ọha, bụ Onye-Nwe-Ọha yẹle Ume iya
zhiwaru mu tẹ mu bya.
17 Ọ waa bụ iwhe Onye-Nwe-Ọha l'ekfu,
mbụ onye Ọ-gbata ghu ono,
bụ onye nsọ nke Ízurẹlu.
Ọ sụru: “Ọo Mu bụ Onye-Nwe-Ọha, bụ Chileke ghu.
Mu l'ezhije ghu ụzo iwhe l'e-shi dụru ghu ree.
Mu l'akpọ-zhijeru ghu ụzo, l'ii-tsoru.
18 Ọ -bụle ị ngabẹru nchị mee iwhe mu sụru t'i mee,
mẹe ẹhu-guu asọleru ghu whọ g'ọo ẹnyimu.
Ọ-dụ-chịriri ghu atụ kpekeke-kpeke
g'ọo akpara-mini l'eze-ẹnyimu.
19 Ẹpa ghu gege aha
l'igweligwe g'ọo ẹja, dụ l'alị.
Ụnwegirima ghu abụru agụta agụta g'ọo ẹjagiri.
Ẹwha whẹ tege echihudu echihu,
tege eme tẹ whẹ bụru kpurupyata l'iwhu mu.”
20 Unu kwafụkwa lẹ Bábyilọnu.
Unu yelekwawho ọkpa l'ọso gbafụru ndu Bábyilọnu.
Unu tụa orooroo gude ryakashịa ya aryakashị.
Unu mee t'a makọtaru iya jeye ẹka mgboko beru.
Iwhe unu l'a-nọ ekfu bụ ọwaa:
“Onye-Nwe-Ọha gbatawarụ
onye ozhi iya ono, bụ Jékọpu.”
21 Ẹgu mini ta agụdu whẹ nteke Onye-Nwe-Ọha
du whẹ shia echi-ẹgu alị ọkponku.
O meru tẹ mini shi l'eze ẹwhuru sọshihuru whẹ.
Ẹwhuru ono b'o meru o kewahu ẹbo, mini sọshihu iya.
22 “Ndu ejo-ememe bẹ ẹhu l'ẹte adụjekwa guu.”
O nokwa iwhe Onye-Nwe-Ọha l'ekfu ndono.