16
Iwhe madzụ l'e-me bẹ l'ọorịje arịri l'obu iya.Ọle ọo Onye-Nwe-Ọha bụ iya
l'ekfuje ọwhu l'e-bekochaa mee nụ.
2 Iwhe lile, madzụ l'eme
l'adụkotaje iya ree l'ẹnya nkiya.
Ọle ọo Onye-Nwe-Ọha marụ iwhe o vu l'obu eme iya.
3 Woru iwhe l'iime ye Onye-Nwe-Ọha l'ẹka,
ọo ya bụ iwhe ị tụberu nke ememe,
emee lẹge ị tụberu iya.
4 Iwhe lile Onye-Nwe-Ọha meru,
b'o nweru iwhe o vu l'obu mee ya.
Ndu ejo-ememe b'o meru doberu mbọku ejo-iwhe-ọtsulanu.
5 Iwhe bụ onye l'etse etsetse
dụkwa Onye-Nwe-Ọha ashị.
Iwhe l'ịimaru bụ l'aa-ta abyadụ
l'aha whẹ t'a ba anụ whẹ chịikfuu.
6 Onye yeru Onye-Nwe-Ọha obu
yẹle onye l'ekfu ire-lanụ
bẹ l'ọo-gụru nvụ l'iwhe-dụ-ẹji, o meru.
Onye l'atsụ egvu Onye-Nwe-Ọha bẹ l'ọojifujeru ejo-iwhe l'ụzo.
7 Nteke iwhe madzụ l'eme dụ Onye-Nwe-Ọha ree
bẹ l'oomegeje, mee tẹ yẹle ndu ọhogu iya dụ lẹ mma.
8 Ẹku ha nwanshị, a kparụ l'ụzo dụ chịriri kakwa ree,
karụ okpoga ha shii, a kparụ l'ụzo, l'akfụaru nhamụnha.
9 Iwhe madzụ l'e-me bẹ l'ọorije l'ime obu iya.
Ọle ọo Onye-Nwe-Ọha marụ ụzo atụgburu iya.
10 Okfu onye eze l'adajẹ kpaakpaa
g'ọo ẹka Chileke l'ekfu okfu.
Ọnu ta abajẹ iya mba mẹ l'ookpe ikpe.
11 O gude iwhe dzuru edzu atụ iwhe atụ̀tù
bẹ l'adụje Onye-Nwe-Ọha ree.
Ẹrwa iwhe a tụ̀ru ọ dụ nhamụnha bẹ dụkwa iya whọ ree.
12 Ndu eze l'anọje asọ oome ejo-iwhe asọ.
Iwhe kparụ iya nụ bụ l'ọo oome iwhe-dụ-chịriri
bẹ l'emeje t'oshi-eze kpọru akpọru.
13 Okfu ire-lanụ l'adụje ndu eze ree.
Onye l'ekfu ire-lanụ bẹ whẹ l'eyeje obu.
14 Ẹhu-eghughu bya onye eze
l'ẹhu bẹ madzụ l'a-nwụhukwa.
Ọo ya meru, onye marụ ágụ
je l'eme iwhe ẹhu l'a-tsọ iya ụtso.
15 Iwhu -tụsahu onye eze, ndzụ adụ madzụ.
Ị -laa onye eze l'ẹhu b'ọ dụ g'ọo ẹka igweli rwuru erwu
nke ọchi mini ishi awha.
16 Ọma agụ kakwa ree karụ onwe mkpọla-ododo.
Ọkwa-ẹnya bụru iwhe ahata amamẹ mkpọla-ọcha.
17 Ndu-dụ-chịriri l'eshije echi-ụzo,
dụ gbororo shi nno nahụ ejo-iwhe.
Onye l'eche ụzo iya eche bụ ndzụ iya bẹ l'ooche eche.
18 Ekuku l'evuru ụzo, ọla-l'iyi etsoru iya.
Nteke otse etsetse vu ụzo, adada etsokwaru iya whọ.
19 Ọ kakwa mma l'i wozeru
onwoghu alị, t'ọ dụ g'ọ harụ ghu,
karụ l'i tso ndu l'etse etsetse eke iwhe whẹ natarụ lẹ nfụ.
20 Onye nweru ụzo nchị bẹ nke-ọma l'e-tso.
Ẹhu-ụtso bụ nke onye dakoberu Onye-Nwe-Ọha.
21 Onye nweru ori-l'ichicho bẹ iwhe l'edoje ẹnya ree.
Okfu ọma, l'ọonoje ekfu bẹ l'emeje
t'a kaba ya ọnwuta iwhe l'ẹka.
22 Mmamagụ bụ ẹnya mini,
l'anụ ndzụ l'ẹhu ndu nweru iya nụ.
Ọle onye eswe bẹ l'aanụje awhụ l'eswe l'oome.
23 Onye marụ ágụ l'agụje okfu l'oo-kfu ọgu.
Okfu, shi iya l'ọnu b'e gude anwụta iwhe.
24 Okfu njima dụ g'ọo ụbakala-ẹnwu.
Ooguje ẹhu egugu, mee t'ẹhu dụ madzụ mma.
25 O nweru ụzo bụ, madzụ l'eshi
iya ya abụru iya ọkpobe ụzo.
Ọle ẹka ụzo ono sụ-chiru ishi bụ l'ọnwu.
26 Ọo iwhe l'agụ onye l'arwụ ọrwu
l'emeje ya akabaa ya arwụru.
Ọ bụru ẹgu, l'agụ iya nụ l'anọje eyeru iya ọku.
27 Iwhe onye bụ ejo madzụ
l'eshibeje ite iya bụ ejo iwhe.
Okfu, shi iya l'ọnu l'adụje g'ọo
icheku-ọku, l'enwu kfụkfukfu.
28 Onye ẹregede l'anọje akpa okfu.
Onye asụlasu l'ebukahuje ndu l'eshi ọnya eshishi iya ike.
29 Ndu l'eme iwhe lẹ mgbashị
l'edotaje madzụ ye l'ome iwhe l'adụa ree.
30 Onye l'ajiburu ibe iya ẹnya bụkwa ẹregede bẹ l'ọogba.
Onye tagbabẹru ọnu bụru
ejo-iwhe b'ọ tụberu nke ememe.
31 Ishi ẹwo bụ okpu-eze, dụ biribiri.
Onye l'oorwubeje ẹka bụ onye buru ndzụ dụ chịriri.
32 Ọ bụru madzụ l'ẹte enwee obu-ọku kakwa ree,
karụ ọ bụru madzụ ka ike l'ọgu.
Mbụ l'onye l'esedeje onwiya nteke
ẹhu l'eghu iya eghu kakwa ree
amamẹ onye l'alwụje ọgu lwụta obodo owhu.
33 Madzụ l'aatụje ido.
Obenu l'ọo Onye-Nwe-Ọha l'akajẹ onye l'ọo-dabaru.