15
Okfu nrwe l'abyanyije ọnuma.Ọle okfu ẹhuka l'akpalije ọvuma.
2 Ire onye marụ ágụ l'emeje
amamiwhe t'ọ dụ ree nke anụnu.
Ọle ọnu onye eswe bẹ bụ
okfu rororoo l'anọje alwa iya gorogoro.
3 Ẹnya Onye-Nwe-Ọha dzuru ẹka lile,
onye l'eme ree mẹe onye l'eme ẹji bẹ l'ọowhukota.
4 Okfu njima l'anụ ndzụ.
Ọle ntuwhu-ire l'etsuje ndzụ pyaapyaa.
5 Ọo onye eswe l'abụje, nna iya
baarụ iya mba, o too yedu iya ọnu.
Ọle onye a hụ̀rù àhụ̀hù; a hụta iya bụ onye nweru égò.
6 Ụlo onye-dụ-chịriri bẹ ẹku l'ejije eji.
Ọle onye ejo-ememe bẹ ẹku nkiya l'eyifuje.
7 Onye marụ ágụ l'aryakajẹ ọkwa-ẹnya aryaka.
Obenu l'obu onye eswe ta adụdu nno.
8 Ngwo-ẹja, onye ejo-ememe l'anụ
Onye-Nwe-Ọha bụ akpamara l'ẹnya iya.
Ọle ekfukfu, onye obu gụru
iwhoro l'ekfu anụ iya l'atsọje iya ụtso.
9 Umere ndu ejo-ememe bụ
akpamara l'iwhu Onye-Nwe-Ọha.
Ọle ndu l'eseba tẹ whẹ dụ chịriri b'o yeru obu.
10 Onye harụ oshi ọkpobe ụzo bẹ l'aa-nụ chịikfuu.
Ọnwu je l'a-bụ nke onye ọ dụ ashị l'aahụ̀ iya àhụ̀hù.
11 Alị-maa yẹle alị ọla-l'iswi
bẹ gheru karawhongu l'iwhu Onye-Nwe-Ọha.
?Oo gbechia bụru obu madzụ
te egheduru karawhongu l'iwhu iya?
12 Onye ewenu bẹ àhụ̀hù l'aahụ̀ iya l'adụje ẹji.
O to jejedu ọkpata onye marụ ágụ ishi iwhe.
13 Ẹhu-ụtso l'emeje t'iwhu tụsahu atụsahu.
Obu-iwe l'etsuje ndzụ pyapyapya.
14 Onye iwhe l'edoje ẹnya ree
l'anọje eme tẹ ya nwụtabaa iwhe.
Ọle onye eswe bẹ bụ ome eswe bụ nri iya.
15 Ndzụ ndu-ụkpa bụ iwhe oshi ike jiru iya.
Ọle ndu nweru ẹhu-ụtso l'eri lẹ gbagee.
16 Ọ kakwa mma lẹ madzụ nweru
iwhe nwanshị l'atsụ egvu Onye-Nwe-Ọha
karụ lẹ madzụ bẹ nweru ẹku shii l'aghamẹhu.
17 Ọ kakwa mma l'eeriru nri,
e gude ẹba shia, e nweru n-yemobu,
amamẹ l'eeriru nri, e gude
anụ, gbarụ ẹba shia, e nweru mkpọmashi.
18 Onye obu-ọku l'akpatsuje esemokfu.
Ọle onye l'atarụ okfu nshi l'abyanyije ụswo.
19 Ụzo, onye ẹgali l'eshi
bẹ l'eegudeje ógvú tọ-chishia atọ-chishi.
Ọle ụzo onye obu gụru iwhoro
l'eshi l'anọje akwọ tụruturu.
20 Nwata, marụ ágụ l'emeje t'ẹhu tsọ nna iya ụtso.
Ọle onye eswe ta adụdu iwhe
l'ọogubeje ne, nwụru iya nụ.
21 Ome eswe l'atsọje onye l'ẹte enwee uche ụtso.
Ọle onye iwhe l'edoje ẹnya ree
bụ iwhe kfụru nhamụnha bẹ l'oomeje.
22 Onye l'ẹte enwee onye mgbazhi
te emekotajedu iwhe ọ gbarụ égò iya.
Ọle onye nweru ndu mgbazhi
l'igwe l'emekotaje iwhe ọ gbarụ égò iya.
23 Madzụ -yee ọnu l'okfu yeta iya ree bẹ ẹhu l'atsọje iya ụtso.
Okfu e kfuru lẹ mgbe iya l'adụje ree.
24 Onye marụ ágụ l'etsojeru
echi-ụzo ọwhu l'eduba lẹ ndzụ tututu-mịmimi.
O to shijedu echi-ụzo ọwhu l'eduba l'ọnwu.
25 Onye-Nwe-Ọha l'enwutsushije
ụlo onye l'eku onwiya eku.
Ọle oge alị nwanyị, ji iya l'anọhe
bẹ l'ọokpo-whetaje akpọ-wheta.
26 Ọgba ejo-égo bụ akpamara l'ẹka Onye-Nwe-Ọha nọ.
Okfu okfu, guru egu bụru iwhe dụ ree l'ẹnya iya.
27 Onye eghoro-ẹhu bụ nsogbu bẹ l'oowotajeru ndibe iya.
Onye kpọru n-wọlazu ashị bụru ndzụ l'a-dụ iya.
28 Onye-dụ-chịriri l'arịjedaa iwhe l'ookfu arị
tẹhenu ya eyede ọnu l'okfu.
Ọle onye ejo-ememe bẹ ejo-okfu
l'anọje alwashị gụdugudu l'ọnu.
29 Onye-Nwe-Ọha nọ ndu ejo-ememe otẹnya.
Ọle ọonuje iwhe ndu-dụ-chịriri l'ekfu anụ iya.
30 Ọnu-ọchi l'emeje obu ụtso.
Nzhi-ọma l'eshije ekiri daa enyi.
31 Onye ngabẹru nchị lẹ mba, a barụ iya,
mbụ mba l'emeje t'a nọdu ndzụ
bẹ yẹle ndu marụ ágụ l'e-megee nọdu l'ọkpoku lanụ.
32 Onye l'adụa iwhe ọ gụberu mba, l'aabarụ iya
bụkwa onwiya bẹ l'ọogubedua iwhe.
Ọle onye bụ, -aahụ̀ iya àhụ̀hù
ya aba iya lẹ nchị l'amajẹ iwhe.
33 Ọtsu egvu Onye-Nwe-Ọha l'ezhije madzụ mmamagụ.
Owozeta onwonye alị vuta ụzo, ọkwabe ugvu etsota iya.