Luke 'ina buki 'eluwena gete ga 'iemwasalina Yesu 'ina toololimana be 'ina tu'e galewaya manudi, ga muliyega Yaluyaluwa Tabuna 'iebusi ga 'ana tomuliyao 'igiewaiwaiyedi, 'enega siloguguya ta paisewa waiwaidi Yesu 'ana esanega siguinuwedi. 'Aina tapwalolo 'ana toanuganao sietalauwaledi, ta tuwa tuga siewaiwai ga tomota yau wawasae Yesu tetelina siemisena ga sibapitaiso.

Muliyega 'adi talauwala sinabwana, 'ana esana Saulo, 'inuwa'ebuni ga 'ietosimana Yesu manuna, ga 'isakosakowasi sena yaudi 'ediya, ta 'iloguloguguya Yesu tetelina, ga 'ana laba me Yudia 'idi toanuganao Paulo nina siwasegigiyena ta nuwanuwadi siloemwawasi. Ta esi me Loma Paulo si'etoseyena, ga si'au'ewena Loma 'enaya sabi etala 'idi toloina sinabwana, Sisa, matanaya.

Paulo, tuta nina deliya 'imiyami, toekelasiyao 'idi letao 'i'etoladidi, nate me Epeso be me Pilipai be me Kolose 'idi letao, be Pilimoni 'ina leta, be wate Timoti 'ina leta 'eluwena.