Kristo haude
3
Songo tosofocna,
ngeneac kibi andenga yohockang yomoc ohongemmeduae.
Kibi yohockang imocngo ubanegen negengngina heigboriu negentegecma kongaha kecbisia.
2 aProfete kpetiac,
yeneng wiac fingecbesandeac yoac imoc bic ohogec.
Amma Kebu memengerecninango singyoac aposorofora yemmeu yeneng ngenearu hama imoc edengunugec,
imoc negenggec fedeac monggoc heigboringemmeduae.
3 bNgeni yofinoc negenghomebisia.
Naso wisic wisickeau desusuic ngicngac goa yeneng fingecma yenang faka manganaac hereyacyac modacma desusuic angemmema
4 cdegecde nga debesandae,
“Haudeac edengunuec,
ye damoc kecde?
Anutungo hanac hanaheaunacngoc wiac sasawa deu fingerec nga mangesafocnina homegecfunac nang erekecma yaguc kecdimbe,
imoc sasawa yeni warac feec isoc siriha mockicngoc fede.”
5 dYeni ifi dema yoac yomoc wagecde,
Anutungo bicngoc bicngoc yombong yoac deu sawa fingerec nga bangec dokuunac fingectegecma erema feec.
6 eAnu kecma ye dokungoc monggoc edeu yadima bangecfu wiac sasawa feec,
imoc semeu manganema kpac andarec.
7 Amma Anutungo yoac monggoc dema,
bangec yomoc nga wiac sasawa sawau yofinenggac fedacde,
imoc faiyunuu gerecac tomai fedae.
Kecma ngicngac Anutu ngadehema kecdae,
yeni yeac yoacfu turungngina mema manganegecde,
naso imohai bangec nga wiac sawau fedacde,
imoc gerecngo dzedacbesande.
8 fSongo tosofocna,
ngeni ine wiac mocgu yomocac mi nigecngunubeso,
Kebuac negen negennu uameme mocgu imoc kifa wan tauseng,
ifi isoc.
Nga kifa wan tauseng,
imoc uameme mocgu,
ifi isoc.
9 gKebungo haudaec deecmoc,
ye dafi amma tondzera ande,
ngic goango ifi deandae.
Nga ifi kpac,
imoc ine yofiac,
ngicngac ngeni hofeu kemegecdeac songea mi angkecde.
Ngeni ubamereng anggecdeac ye modzotitia kpac naso ngemmema tomaingina kecde.
10 hNga Kebuac hahanaso,
imoc hamangec ngicngo haandae,
ifi isoc haude.
Naso imohai sawau wiac sasawa fedacde,
imoc gerecngo yonohodarude nga sawango udumengtoagoc aockema kpac andarude.
Amma bangec nga wiac sasawa maringo memea imocac witiau fede,
imoc monggoc mi feude.
11-12 Ifi anu wiac sasawa sawau fekendacde,
imoc gerecngo yonohodaru sisingaima gagubang amma kpac andacbesande.
Imocac amma ngeni kekecngina garenggema kpetiac kecma Anutuac yoac hoanggema eweheimima kecbisia.
Ifi kecmagec yeac nasotoa haudeac singa mema imocac tomai kecbisia.
13 iAnu bangec nga sawa gboria,
imohai faka nga angammeme dindingac feude,
imoc ngade fingerudeac deec,
nenang imocac tomai kecdimbe.
Nonoyoac
14 Songo tosofocna,
ngeni imocac tomai kecma Anutuaru hama yegoc ruaeu uba mocgu kecgecdeac ngeni kpetiac nga kongaha kekecac tembuc tembuc ngombongemema kembisia.
15 jNga ngeni komoc kpegecdeac Kebuninango modzotitia kpac uaya mekecde,
ngeni imoc negensibisia.
Nga negen negentegec imoc Anutungo songo tosonina Pauro miec,
ye imoc modacma yoac imocnoc negensima kibi ohongemmeu osogec.
16 Nga yeng kibi sasawa ohoec,
imohai yoac yoc ohongemmeduae,
imoc momoc dekperagiande.
Amma yoac goa ohoec,
imoc ngicngac goango negentegecgecdeac siriha kpac.
Nga ngicngac goa mitiu mi heiserima negen negentegecngina kpac kecdae,
yeneng yoac imoc mereng kpereng dema kecdae,
imoc yeni yenaoc memanganeemema kpac anggecde.
Amma mitikibiu yoac fede,
yeni imoc momoc mereng kpereng deandae.
17 kSongo tosofocna,
ngeni imoc bic negendae,
imocac singyoac kpeandae,
yeneng wangecngunugec tiposockema mangunubacac ngeni garengemema kecbisia.
18 Nga ngeni Kebu memengerecnina Yesu Kristo yeac danggunuc nga negen negengtoa imohai yadiseri ambisia.
Ye yaguc nga nasoya kpac dengerebesonga,
imoc fora.