Isracel ngicngac yeneac kopocsic nga uangicac kpetiac kekec
50
Imocac KEBUNGO yofi dede,
“Nonggongina wawaac kibi
damoc mema suengunuyai?
Me ni turunna damoc feu
imocac suengunuyai?
Ngeni ngenang koposicnginaac amma suengunuyai.
Nga ngeni ngenang angammemenginaac amma nonggongina sueba kenec.
2 Hayai naso imohai nocac ngic mong mi hennai?
Nga kparai naso imohai nocac mongngo enacnau mi meec?
Ni marina faiba kpedadanggeu mi meficngunuyai me?
Amma ni ebicfunac mesimesiac kuc mi fenende me?
Ni kondung deba kerengaiude
nga doku meremba bangec kisi annu
kondung yang yeneng dokuac amma
homema hoaegecde.
3 Ni kurumenga kurumenga mekundung kpeba
ngic homegec ubahodunggac ngakpi heiandae ifi isoc kundung kpeude.”
4 KEBU,
Anutu kuctoa minginango
ngicngac kucmama kecdae yeni demeseri ayemmebadeac
dederecge yoac nedzarannau faiec,
ye asoacsoc midinuu yacma yeac dederecge yoac kpounennu kedzacnango negenganduae.
5 KEBU,
Anutu kuctoa minginango kedzacna mesariu
ni ye mi emmiai
amma ye mi ngadeheai.
6 Nga ni desiemeba yeneng ngadenau numa
munggunghocnau ngebac dzona kpedzigec.
Yeni dzomorenemma sofocnugec
ni kicmesuna mi sufuai.
7 KEBU,
Anutu kuctoa minginango meficnuandeac amma
ni mesukiki naric mi ambade.
Ni kicmesuna heimeremba hoc isoc anu seria nambadeu
game kpekpeu naric mi fainugecde,
imoc negenduae.
8 Ye neac wegenacfu kecma
nanggenumanu merang naric yoacfu fainuude?
Mong ye yoacfu fainuudeac negendeu,
ye hau nigoc yoacfu nambisira.
9 Anu KEBU,
Anutu kuctoa minginango meficnumanu,
merang manganameme denennude?
Ngabafocna yeni dzodzicngo wamba kidzameande
ifi isoc dzamema kpac anggecde.
10 Damoc ngeni KEBU eweheimima
uangihaac enac tofohoandae.
Ngeni kperagia kpac kundunnu kecma
kengec mi ambisia.
Ngeni Anutuaru herima KEBUAC kpara
negensinggema kecbisia.
11 Nga yofinenggac
damoc yeni kundunnu serimangoc kecma
yenang kifangina gerecfunac kpedzereckema meficemema kecdae,
ngeni ine engngoc amma kecbisia.
Ngeni kpendzeng wisic wisickea kpac ngemmebade.