KEBUAC uangicngo bangectoa bangecac kperagi
49
Ngicngac nucfu kecdae ngeni deba negenggec,
nga bangeha bangeha amma hereau kecdae,
ngeni kedzac kpema negenggec.
Ni mi fingecbare KEBUNGO
nonggo here manaunacngoc kpacnau kpacnuec.
2 Ye enacna heimerennu wasaibeang isoc annu,
mariango kperacnuec.
Ye merennuu tebemedaha isoc amba
dumunnu sufunuec.
3 Ye yofi dema edenuec,
“Isracel,
ge neac uangicna.
Gearunoc ni kpackunenna bangeha bangeha yenearu mekperagibade.”
4 Deu neng ine yofi deai.
“Ni kucna eng kpedzonggema ua meba fora mong mi fingerec.
Imocac amma ni ua meduae imoc KEBUAC mariusac tacde.
Nga kecma Anutu yengenaoc imocac bunna nembesande.”
5 KEBUNGO warac yofi deec.
Ge neac uangicna amma
Yakoboac kisicfora Isracel ngicngac kpedzucyunuma,
wangecyunuma neanna hoannu hanadeac
neng nonggo heremanaunac meisingguyai.
KEBUNGO neac negennenu ngereede.
Nga Anutu ye neac kucna.
6 Anu KEBUNGO yaguc yofi dede,
“Ge Yakoboac esamedac
Isracel ngicngac kpedzucyunuma monggoc meyunu hanadeac deai
imoc ua kuneng mi ande.
Imocac yaguc neng ge faiguba bangec monnunac ngicngac nga bangec tegiau kecdae yeneac kifa amma
komoc kpeyununade.”
7 KEBU Isracelac Anutu mocgungo Kpetiac nga Memeficngina.
Ye uangihaac yofi dede,
ngic imocnoc bangectoa bangecac ngicngac yeneng yeac negenggec mamea angande nga ngickuneng yeneac wanacngic kecde.
KEBUNGO yeac yofi dede,
“Ngictau yeneng ge gemma yacma nanggecde.
Amma ngic enarafocngina yeneng ge gemma ngonducnegecde,
nocac ni KEBU Kpetiac Isracelac Anutu,
Ni yoac dedzege amma imoc modackeduae,
nennoc meisingguyai.”