Anutu, ge wanununec me?
Yegecgareng yearu. Yegec kpara: Dzadzahaac lili dzaring, imocac uba modacma miktangyegec yomoc heima ubau faibesonga. Dawidngo yegec yofi heiec.a
60
O Anutu, ge ngadenunuma kpetotienunuma neneac ngaba annec. O Kebu, ge monggoc mengerenununa. 2 Ge bangec kpemindzahena usoc meu titing kuneng fingeru goroc goroc andeac geng titinga monggoc mengerena.3 Ge ngicngacfocga kpendzengtoau fainunuma waing seria gumecnununa neinggac hanititinina goroc goroc anu sicsaucfu kengha aning. 4 Ngicngac ge eweheiheigoc hoanggugec yeni ine tebemedahaac sinnunac hesicyununadeac firac mong miacna yeni imoc hemma ihai kpedzucnema nanggecde. Selacb 5 Ge ngicngacfocga neneac songo negennec, nga ebicfunac mesiyununadeac neni marifoigango dzikacfu meficnununa firang ambisina. Ge nunumuninaac turunga merennemmena.
6 Anutu ye womongau tacma yoac deserima yofi deec, “Ni firang amma sogaima Sehem ama mederema Sukkotac bangec tume imoc medereba noboha noboha anu ngicngacfocna yemmebade. 7 Gilecad nga Menasse yeri neac. Efarayim imoc wasai opocna nga Yehuda ye ngictau yasuna. 8 Mocaw imoc dzuac dzuac sokocna nga ni Edomggaru hanitabena ukuba yunuude amma ni firang amma Peleset bangec arohomiba negenggecde.”
9 Mongngo nigoc kemma taong odaya seria imohai menuma Edom bangecfu hesicnuma kembeso. 10 O Anutu, gennoc wanunuma ukununudacnec. Ge wasaingicnina yenigoc dzikacfu monggoc mi kengannec.