Yacakow tonggogecdeac kenggec
50
aHomeu Yosefngo mamaac witiu makpema kicmesuyau kokockema kiacma feec.
2 Amma ye dotafora yeac enac tofohoma kecgec yeneng mamaac sebi mi hoaeudeac kerecmarasing seria faigecdeac edeyunuec.
Ifi deu yeni Isracel sebia mi hoaeudeac ua mekecgec.
3 bNga ua imoc memangoc kecmagec uameme 40 wisickeec.
Imoc yofiac,
sebinginau marasing seria faiandae imoc uameme 40 meandae.
Anu aigitangic yeni yeac kiacsonggong amma kecgec uameme 70 wisickeec.
4 Kiacsonggonnaso wisickeu Yosefngo Pareco wiacfora yofi dema edeyunuec,
“Ngeni neac negenggec ngereeudeu ngeni kemma neac enac mema Pareco yofi dema edebisia.
5 c‘Ge neacnec negenna ngereedeu yoacna negenna.
Manna ye yofi dema deseribadeac deec,
“Negennec,
ni homebeso anduae nga homeba ine Kenacan bangecfu kicserena mong usuyai fede imohai tonggonubesena.”
Imocac amma ge naric dena ni kemma manna tonggoma monggoc dzigenema habesare.’ ”
6 Ifi deu Parecongo yoac yofi meremmiec,
“Naric,
denec isoc anna,
yeng deu demeseriyoac denec imoc modacma kemma mangga tonggobesena.”
7 Anu Yosef ye mama tonggoudeac kenec naso imohai Parecoac enac tofoc tofohofora sasawa nga amayaac garengfora nga Aigita bangecfunac ngicenara sasawa
8 nga Yosef wiacforagoc amma dacmunafora wiacfocnginagoc nga Isracelac wiacfora yeni sasawa yegoc momoc kendacgec.
Yeni nambaracfocngina kapia nga ramaburumakahabufocnginasac Gosen bangecfu wayunugec kecgec.
9 Nga keretac nga becosiu ngic kengandae yeni momoc yegoc kenggec.
Ifi anu yeni habutoa yombong amma kenggec.
Atad sobennu kiacgec
10 Anu yeni kengkecma Atad wit seuha meic meickeac sobengd Yarden doku edibigengau fede imohai kensikema songgonggac faka modacma kiac ubamangang kuneng yombong anggec.
Nga Yosef ye mamaac amma kiackefu uameme seweng wisickeec.
11 Kiackecgec kenacangngic bangec imocac mingina yeni Goren Hacatad imohai yenemma yofi degec,
“Aigitangicngac yeni homac yombong kiacdae.”
Ifi dema ama bangec imocac kpara Hawel Mitserayime kpacgec.
Bangec imoc Yarden doku edibigengau feec.
12 Anu Yacakow medacfora yeni mangnginango deec,
ifi isoc anggec.
13 fYeni Kenacan bangecfu mekemma Mamere wenac ereereau Mahpela uau hocsinga nanec imohai tonggogec.
Awramngo warac hitingic Efron yearunac bummeu yengena kicsere anec.
14 Anu Yosef ye mama tonggou wisickeu yengena nga dacfora amma ngicngac sasawa momoc kenggec yeni yenahafoc dzigenema Aigita bangecfu kenggec.
Yosefngo dacfora yeneac kopocsicngina waec
15 Anu Yosef dacfora yeni mangngina homeu hemma yofi degec,
“Nenang Yosef ebic meficgemidaring imoc foracngoc.
Ye imocac ngaba anemmema imocac turunga faka mong kuneng amma memanganenunubacac.”
16 Ifi dema yearu yoac yofi faigec kenec,
“Manggacngo homebeso dema yoac mong yofi denideac edenunuec,
17 ‘Ngeni neac yoacna yomoc Yosef edebisia,
“Dacfocga yeni wiac mi angana amma ebic meficgegenggec ni imoc negenduae nga ge sifu kopocsicngina wabesena.” ’
Imocac numugendimbe manggacac Anutu yeac enac tofoc tofohofora neninec kopocsicnina wabesena.”
Yosefngo yoacngina imoc negemma kiarec.
18 Kiacmanu dacfora yeni yenaoc kemma Yosefac kicfu kicmesungina bangecfu hetutuckema yoac yofi degec,
“Wanacngicfocga neni yomoc.”
19 Ifi anggec Yosefngo yofi dema edeyunuec,
“Ngeni kengec mi ambisia.
Ni neannaoc Anutuac tatac naric mi mebade.”
20 gIfi dema yofi deec,
“Ngeni ni manganebadeac negenggec.
Anu Anutungo ine imoc arenggema heimerenu gombungau kenec.
Ye ngicngac homac kekecngina onggonggeudeac negenec imoc yaguc fingectegeru hendimbe.
21 Imocac ngeni kengec mi anggec.
Ni ngeni ngenang nga nambaracfocngina ngenenggareng angemmebade.”
Ye yoac ifi henanggema ruaegoc yumia ifi deu yeni herenginau bacngisi fingerec.
Yosef homeec
22 Anu Yosef yengena nga mamaac habu yeni Aigita bangecfu kecgec.
Kecmagec Yosef ye kifaya 110 ammanu
23 Efraimgarunac esangabofora fingecgec yenenec.
Nga Manasse medaha Mahir yeac medacfora yeni ifingoc fingecgec ye meyunuma tabucyunuec.
24 hAnu Yosefngo dacfora yoac yofi dema edeyunuec,
“Ni homebeso anduae.
Foracngoc,
Anutungo yugucngunuma bangec yomohanac wangecngunuu kengkecma bangec imoc Awraham,
Itsak nga Yacakow yemmeudeac deseriec imohai faingunuude.”
25 iAnu Yosef ye Isracel medacfora yeni Anutuac kicfu yoac imoc deserigecdeac yofi deec,
“Foracngoc,
Anutungo yugucngunuude naso imohai ngeni neac sicna momoc yeihanac mema kembisia.”
26 Amma ye kifaya 110 ammanu homeec.
Homeu sebia mi hoaeude imocac kerecmarasing seria imocngo nadzicmima farenga imoc katapa manau faima Aigita bangecfu faigec feec.