Yacakow ye medacfora yeneac yoac wisic wisickea deec
Recuwen nga Simecon amma Lewi yeneac yoac
49
aAnu Yacakow ye medacfora heitaiyunuma yofi deec,
“Ngeni kecenggecde imocac manau noc faka fingecngemmebesande ni imocac yoac edengunubadeac ngeni kpedzucnema hadacgec.”
2 Hagec yofi edeyunuec,
“Medacfocna ni Yacakow,
kpacna mong Isracel.
Ngeni mangngina neac yoac negenggec.
3 bRecuwen,
waracmedacna kuc nga seserinaac fora warac warac geng annec.
Ge eweheiheiga monggoc nga kucga monggoc nga munafocga feracyununade.
4 cDokungo yadima wiac memanganeande ge ifi isoc annec.
Ifiac amma nasosoc mi feracyununade.
Imoc yofiac,
ye mama neac fefeu emma fefe imoc naso imohai seuc heiec.
5 dSimecon nga Lewi yeri dacmuna yeri dzikacac beangngira mema imocngo ngicngac megigi ayemmema yunumeme angkecdape.
6 eAnu yeri herebu amma ngic kpebucyunuoc nga eng songeaac burumaka haninginau ginongngina herecgeoc.
Imocac onganango yereac kpekpedzucfu mi kembeso nga eweheiheigoc kekecnango yereac habuu mi torokpebeso.
7 fAmma ubagerecngira imoc kuneng nga herebungira imocngo ubamangang mong mi negengande imocac amma yeri sowecngiragoc.
Ni Yacakowac bangecfunac mendzicyuruma meicyuruba isracelngic yeneac botucfu singsararang amma kenecde.”
Yehuda yeac yoac
8 g“Yehuda dacmunafora yeni ye dengeregecde.
Ye mariango ngabafora yeneac ubau meude.
Amma manggaac medacfora yeni geac kicfu ngonducnegecde.
9 hYehuda ye laionmedaha isoc.
O medacna,
ge yang kpema nannec.
Ye laionyang isoc ngonducnema fenegenude.
Amma ye laionngagera isoc andeac mongngo ye yarudeac naric mi suruckeude.
10 iAmma ngictauyasu imoc Yehuda yearunac mi meickeude nga ngicenaraac yasu haniau wegenac mariango seria mekefude.
Mekecmanu yasu minginango hama meu ngicngacareng yeneng yeac yoac modacgecde.
11 Ye donggia waing ic haniau witickeu maria neude.
Nga donggia medaha waing gombunga yombong imocac fawau witickeu maria neude.
Ye wambaya waingdokuyango dzuacma ngakpia wainggac sacngo dzuarude.
12 Anu ye waing nekefu kiwa siriha mong anude nga namu nekefu enara kongac kongac yombong anude.”
Dzewulun nga Issashar
13 j“Dzewulun ye kondung tegiau tacma wage yeneac biris gombunga anu imohai hama nanggecde.
Nga yeac kpetea kengkecma Tsidon amabangec imohai wisickeude.
14 kIssashar ye donggi seria isoc amma ramahabu botucnginau fekecde.
15 Ye tacnegengamaya imoc gombunga ifi hengkecde.
Nga bangec imoc gombunga ifi hemma witiau finac ebira tofohoudeac ngonducnekecde.
Ngonducnema ua meudeac ngombonggegec yeng wanacngicngina kefude.”
Dan, Gad nga Aser amma Naftali yeneac yoac
16 l“Dan ye Isracel kisic yeneac botucfu kecma ngicngacfora yeneac yoac desima kefude.
17 Ye boidzoc sing tegiau feande nga boidzoc mangana katesinnu kengande ifi isoc ande.
Amma ye becosi hau hania tabeau kiu ngic witiau tarude ye todinggema ngade ngade makpeude.
18 mO Kebu,
ni memengerecgaac tomai yombong kecduae.
19 Godzucngic yeneng hama Gad yegoc ewegec ye gofoc gofocnginau yunukefude.
20 nAser ye neneyaka kerehagoc fingecmiu ye yaka songea ngictauac yaka isoc meficgeyemmeude.
21 oNga Naftali ye kateburumaka kapia.
Ye witiha kpac kecma bic bic yombong nedziude.
Yeng yegecfu yoac gombunga gombunga heficgekefude.”
Yosef nga Benyamin yereac yoac
22 “Yosef ye ic foragocac medac.
Ye doku wegenac namma ic foragoc amma mari hereango oda semema ferahekefude.
23 Nga tebengic yeni yeac ngaba amma hama suruckema tebe kperecgema wedecgec.
Anu tebeac negen negengngic yeni yeac keracmangang amma kecgecde.
24 Anu ye yengena tebea kpesaheudeac efaima tackefu Yacakowac Kuc Minginango maria meficgema Isracelac Garengngo Hoc seria meficgeu mariango dzikac kpeudeac bic efaima kefude.
25 Geac manggaac Anutu Kuc Mingina yeng meficguma yofi kenecguude.
Ye wi kurumenggac nga bangec keme kemeaac kenecngo kenecguude.
Amma geac arennunac ngac herenginaunac sabac fingecgecde amma namungina ifingoc fingerudeac kenecgoc anggecde.
26 Mangga neac kenecngo imoc tiki kuneng ferahama tiki seria imocac kereha imoc momoc ferahaude.
Kenec imoc sasawa Yosefac oruha witiau emma fekecbeso.
Ye dacfora yeneac habuunac meisinggegec nga yeac witiu kenec imoc fekecbeso.
27 pBenyamin ye katekasi kuhagoc isoc ande.
Ye asoac yang kima neude.
Anu wiac dzikacfu meude imoc tofocnac nasou ogofora yemmekefude.”
28 Nga ngic imoc yeni sasawa Isracelac ngichabu 12.
Mangnginango yoac imoc edeyunuec.
Anu yeni tembuc tembuc kenecyoacngina dema kenecyunudarec.
Yacakow homeec
29 qAnu ye yofi dema edeyunuec,
“Ni esangabofocna yenearu kembade.
Kemba ngeni hitingic Efron yeac uau hocsinga nande imohai mangesahocna yerigoc tonggonubisia.
30 rHocsinga imoc Kenacan bangecfu nande.
Imoc Mamereu wenac ere eraubigeng bangec tosea kpara Mahpela ua imohai nande.
Awramngo ua imoc hitingic Efron yearunac kicsere anudeac negemma bummeec.
31 sBummeu kicsere imohai Awraham nga enema Sara tonggoyurugec nga Itsak nga enema Riweka ifingoc imohai tonggoyurugec amma neng Lea imohaingoc tonggoyai.
32 Ua nga hocsinga amma wiac imohai feec imoc Het medacfora yenearunac bummeec.”
33 tYacakow ye medacfora yoac ifi dederecge ayemmeu wisickeu hanihora fefeu kpedziu enu homema esangabofora yenearu torokpeec.