Jesus kaa ayimihaat iskwaauh Samariahch kaa uhchiiyich
4
1 Jesus chaaschaayihtihk aniyaayiu Phariseeh aa chii paahtimiikupinaanihii Jesus atitiu mishtiih aa kischihaayich kiyaah aa siikihaahtiwaayich iiyiyiuh ishpish John.
2 Mikw maak taapaa nimiyaau wiiyi Jesus kaa siikihaahtaachaat, uchischinihamuwaakinh aniyaayiu chii siikihaahtaachaayiu.
3 Iishpih piyaahtihk Jesus aah aayimumaakinuut, chii nikitim Judea aschiiyiu aakw Galilee aschiihch miin kaa iituhtaat.
4 Mikw maak chipih aati shaapuhtiwaashkim maak Samaria aschiiyiu anitaah Galileehch aa wiih iituhtaat.
5 Iishpih maak anitaah Samaria aschiihch aah taat, chii utihtim ihtaawiniyiu Sychar aa ishinihkaataayich. Paashuch maak utih uyaayiu ihtaawiniyiu aakutaah kaah tikuniiyich aniyaayiu nihtaauchihchikin aschiiyiu aniyaa Jacob kaa miyaat ukusish Joseph.
6 Chii tikun anitih uhtihiipaan, Jacob uhtihiipaan chii ishinihkaataau. Naashch maak chii iyaaskuhtaau Jesus, kaah aatiuwaayipit paashuch anitih uhtihiipaanihch. Wiyaash chii aapihtaachiishikaayichaa.
7 Naanaachaashiish maak, iskwaau, Samaria aschiihch aa uhchiit chii paachi kwaapichaau. Aakw Jesus aataat, “paachi miyih maah iyihpii chaa chii minihkwaayaan.”
8 Maakwaach aniyaayiu nimui uhchi taayiu Jesus uchischinihamuwaakinh, waash anitaah ihtaawinihch chii iituhtaayiu miichimiyiu aa chii nituuutinimiyich.
9 Aakw aniyaayiu iskwaau atikut, “Jew iiyiyiu chiiyi. Niiyi maak Samaria iskwaau. Chaakwaan waahchi nitiwaayihtimin chaa chii minihiitaan?” Nimui mitun uhchi iyaapitaayimaauch Jew iiyiyiuch aniyaayiu iiyiyiuh anitaah Samaria aschiihch kaa uhchiiyich.
10 Aakw Jesus aataat, “chischaayihtimuuhpinaa chaakwaayiu waah miyiwaat Chishaaminituu kiyaah chischaayimiyin awaan niiyi iyaawiyaan, chiiyi chipih kukwaachimin chaa chii minihiitaan. An maak kaa pimaachihiiwaamikihch iyihpii aaukw an chipih minihiitin.”
11 Aakw aatikut aniyaayiu iskwaau, “nimui chitiyaan aschihkw chaa chii kwaapihiikaachaayin kiyaah an iyihpii naashtaapwaah yaaunaakun anitaah niihtaahch, taanitaah maak chaa uhtihamin an iyihpii kaa pimaachihiiwaamikihch?
12 Waashkich anitaah utaahch chitaanischaa waahkumaakiniu Jacob chichii miyikuniu uyaayiu uhtihiipaaniyiu. Chii minihkwaau uyaayiu iyihpiiyiu kiyaah ukusish, kiyaah umaanishchaanishiim aakutaah kaa uhchi minihkwaayich. Austaa aa chiiyi chitiiitaayimiisun ishpish wii aniyaa chitaanischaa waahkumaakiniu Jacob?”
13 Aakw Jesus aataat, “awaan kaa minihkwaat uyaayiu iyihpiiyiu utih, miin chiki paahkutaahtim.
14 Awaan maak chaa minihkwaakwaa aniyaayiu iyihpiiyiu chaa miyik chaa chii minihkwaat, nimui nihtaa miin chiki uhchi paahkutaahtim. Waash an iyihpii chaa miyiwaayaan kiti piihchishkaakuu awaan muuyaam aa uhchi muuschaawichuhch kiti isinaakuniyiu kiyaah aaukw chaa chii uhchi iyaat kaachich pimaatisiiwiniyiu.”
15 Aakw aniyaayiu iskwaauh aatikut, “Tipaayihchichaayin, paachi miyi uu iyihpii, aakw maak nimui miin nihtaa niki uhchi paahkutaahtaan kiyaah nimui miin nihtaa niki uhchi paachi tikushin utih chaa chii paachi kwaapichaayaan.”
16 Aakw Jesus aataat aniyaayiu iskwaau, “maachiih, nitiwaapim chinaapaam. Paashuu utih.”
17 Aakw aniyaayiuh iskwaauh aatikut, “nimui nuunaapaamin.” Aakw Jesus aataat, “chii taapwaan an kaah iyin aahaakaa unaapaamiyin.
18 Niyaayu naapaauch shaash chichii wiichimaauuch kiyaah maak an naapaau anuuhch kaa wiichimit, iyaapich nimiyaau an chinaapaam. Kuiskw chishin an kaah iyin.”
19 Aakw aniyaayiuh iskwaauh aatikut, “aakwaataayimitaan muyaam aah aawiyin uchischiwaahiichaasiu.
20 Chitaaniskuusiminuuwich chii tikushinich aa paachi nituuayimihaastiwaach Chishaaminituu utih aapiskutinaayich. Chiiyiwaau maak Jew iiyiyiuch muush aaukw iyaayaakw, mikw anitaah Jerusalemihch aakutaah chaa chii ayimihaastiwaakinuut Chishaaminituu.”
21 Aakw Jesus aataat, “taapwaahtu, aashkw chiki iispiyiu chaah aakaa ayimihaastiwaakinuut kuuhtaawiiniu utih aapiskutinaayich kiyaah maak anitaah Jerusalemihch.
22 Chiiyiwaau Samaria kaa uhchiyaakw, chitiyimihaashtiwaawaau Chishaaminituu aahaakaa maak chischaayimaakw. Niiyaan Jew iiyiyiuch, nichischaayimaanaan Chishaaminituu an kaa ayimihaashtiwichiht. Waash anitaah Jew iiyiyiuch aah taach aakutaah chaa uhchipiyihch misiwaa awaan chaa chii pimaachihaakinuut.
23 Waash shaash paashunaakun, kiyaah aaukw shaash aa ispiyich, anichii chihchiwaa kaa ayimihaastiwaach aamaamihchimaach uhtaawiimaau, ahchaahkuwinihch kiyaah taapwaawinihch iishi. Aayuwikw uyaayiu aah iitaatisiiyich naatuwaayimaat chaa chii iishi ayimihaastaakut kuuhtaawiiniu.
24 Chishaaminituu wiiyi ahchaahkuu, aakw anichii kaa ayimihaastiwaach yaayitaa kiti piihchiskaakuwich uyaayiuh ahchaahkwh kiyaah taapwaawinihch chipih iishi ayimihaashtiwaauch.”
25 Aakw aatikut iskwaau, “nichischaayihtaan aniyaayiu Chishaaminituu chaa paachi iitishihwaat chaa tikushiniiyich, Christ ishinihkaasuyiu. Tikushihkaa maak misiwaa chaakwaayiu chiki wiihtimaakiniu.”
26 Aakw Jesus aataat, “aaukw an niiyi, niiyi kaa ayimihiitaan.”
27 Aakutaah kaa uhchi tikushiniiyich Jesus uchischinihamuwaakinh, naashch maak chii kushkwaayihtimuch aa waapimaach Jesus aa ayimihaayich aniyaayiuh iskwaauh. Iyaapich maak nimui waachipaayaakw uhchi kukwaachimaauch chaakwaayiu waahchi ayimihaayich aniyaayiu iskwaau kiyaah nimui uhchi kukwaachimaauch chaakwaayiu kaah aayimwaahiikuyich.
28 Aakw an iskwaau kaa nikitihk aniyaayiu ukwaapikaan, kaa chiiwaat anitaah uti ihtaawinihch aakw kaah iitaat aniyaayiu iiyiyiuh anitaah kaah taayich.
29 “Aashtimukw. Chaa waapimaakw an naapaau kaa paachi wiihtimuut misiwaa taan kaa tuuwich. Aaukw kaakiyaah uyaayiu Christ chaa paachi iitishihwaakupinaa Chishaaminituu.”
30 Aakw anichii iiyiyiuch kaa wiyiwiich anitih ihtaawinihch kaa nitiwaapimaach Jesus.
31 Maakwaach maak uyaayiu, Jesus uchischinihamuwaakinh chiwiih aayihkimihkuu, aah iitikut, “chiskutimaachaasiu, miichisuuh.”
32 Mikw Jesus chii iitikuch, “nitiyaan waash miichim aahaakaa chischaayihtimaakw.”
33 Aakw aatituuch, “chii paatwaakuu kaakiyaah awaayiuh chaakwaayiu chaa miichit?”
34 Aakw Jesus aatikuch, “chaa chiih tutimuch utitaayihtimuwin an kaa paachi iitishuhut kiyaah chaa chii chiishihtaauch aniyaayiu kaa iishi nitiwaayimit chaa tutimuch aaukw an muyaam nimiichim aa iitaayihtimaan.
35 Chishinaawaau, ‘naau piisim aakw iyaakw chaa chii maamuuschinikiniwihch nihtaauchihchikin.’ Mikw maak niiyi, chiwiihtimaatinaawaau, naataah maah yaakwaah iitaapikw. Muyaam aa isinaakuhch anitaah kaa nihtaauchihchaaniwich shaash aa chiish nihtaauchihch anihii nihtaauchihchikin, aakw maak mikw chaa iishi maamuuschinikiniwihch, aaukw muyaam aa isinaakusich anichii iiyiyiuch shaash aa chiish aayaaskuuwich chaa taapwaahtihch miywaachimuwiniyiu paahtihkwaawaa.
36 An kaa maamuushichinihk aniyaayiu nihtaauchihchikin tipihaamuwaakiniu. Muyaam an awaan kaa wiichihaat awaayiuh chaa chii iyaayich kaachich pimaatisiiwiniyiu aakwaashinaakusit. Aakw maak an kaa nihtaauchihchaat kiyaah an kaa maamuushichinihk aniyaayiu nihtaauchihchikin taapishkun chaa miywaayihtihch waash taapishkun chii aapitisiiwich.
37 Taapwaaniu kaa iinaanuuch, ‘paayikw chiki nihtaauchihchaau aakw an kutik chaa maamuushichinihk aniyaayiu nihtaauchihchikin.’
38 Shaash kutikich chii nihtaauchihchaauch kiyaah chii mishtih aapitisiiwich anitaah kaa nihtaauchihchichaaniwiyich. Aakw maak aatishihuutaakuch chaa chii maamuushichinimwaakw aniyaayiu nihtaauchihchikin. Nimiyaau chiiyi kaa nihtaauchihchaayin, mikw maak ayaapich chii wiichihiikuwaan aniyaayiu kaa iitaapitisiiyich.” Aaukw kaah iitaat Jesus uchischinihamuwaakinh.
39 Mihchaatu Samaria iiyiyiuch anitih aniyaayiu ihtaawiniyiu kaa uhchiich chii taapwaayaayimaauch Jesus. Waash chii iyiu an iskwaau, “misiwaa nichii wiihtimaakw taan kaa paachi ayihtuwich.”
40 Iishpih anichii iiyiyiuch anitaah Samaria aschiihch kaa uhchiich kaa paachi nitiwaapimaach Jesus anitaah uhtihiipaanihch, chiishiihchimaauch chaa chiih taayich anitih aah taach. Niishu chiishikaauh maak chiih taau Jesus anitaah.
41 Mihchaatu maak iiyiyiuch chii taapwaayaayimaauch Jesus, iishpih piyaahtiwaach taan kaa iiyiyich.
42 Aakw aataach aniyaayiu iskwaau, “aakw maak tiyaapwaahtuwichiht, niiyaan waachiihch aa chii paahtiwichiht, nimui mikw chiiyi aa chii iyin. Aakw maak chiyaashtinaataayihtimaahch wiiyi aahaawit chaa chii pimaachihaat misiwaa awaayiuh.”
Jesus kaa miiniwaachihiimaat uchimaau ukusiyiuh
43 Iishpih maak niishu chiishikaauh kaah taat Jesus anitaah Samaria aschiihch, aakw anitaah Galilee aschiihch kaa iituhtaat.
44 Waash wiiyi waachihch chii iyichaa Jesus, “taapi chistaayihtaakusiu uchischiwaahiichaasiu anitaah aa uhchichiit.”
45 Iishpih maak kaa tikushihk anitaah Galileehch, anichii iiyiyiuch anitaah kaa wiichich naashch chii miywaayihtimuch aa waapimaach. Kiyaah wiiyiwaau chii iituhtaataawaakupin Jerusalemihch maakwaach kaa utihchipiyich aashikum pipun kaa chii mishtih mikushaaniwiyich. Misiwaa maak chii waapihtimwaauch taan kaah tiyich anitaah.
46 Aakw miin kaau kaa iituhtaat anitaah kaanaa ihtaawin Galileehch kaah tikuhch, anitaah kaah tutihk iihpiiyiu chaa chii shuuminaapuuwiyich. Aakutaah kaah taat naapaau aa uchimaaut. An uchimaau chiih taayiu ukusish, aah aahkusiiyich, anitaah maak Capernaum ihtaawinihch chiih taayiu maakwaach.
47 Iishpih piyaahtihk an uchimaau aa chii tikushiniiyich Jesus anitaah Galilee aschiihch, anitaah Judea aschiihch aa uhtuhtaayich, chii nitiwaapimaau aakw kaah aayihkimimaat chaa chii iituhtaayich anitaah kaapirnaayimihch, chaa chii nituumiiniwaachihaayich aniyaayiu ukusish, waash shaash chaakaat nimui uhchi pimaatisiiyiu.
48 Aakw Jesus aataat, “nimui nihtaa chiki uhchi wiih taapwaahtunaawaau paatish waapimiyaakwaa maamishkaach waapihtiiwaawin aa waapihtiyiwaayaan kiyaah aah tutimaan aa maamishkaataayihtaakuhch chaakwaanihii.”
49 Aakw aniyaayiu uchimaau aatikut, “Tipaayihchichaayin, aashtim maah paachi iituhtaa niwaaskaahiikinimihch aamwaayaa puunipimaatisiit nikus.”
50 Aakw Jesus aataat, “maachiih chiiwaa, chiki pimaatisiiu waash chikusis.” Chii taapwaahtim maak taan kaa iitaakinuut an uchimaau, aakw kaa chiiwaat.
51 Maakwaach maak aa ishpishiyit aa chiiwaat, chii nichihiikuu aniyaayiuh utaapichihaakinh, aakw kaah iitikut, “shaash miyu pimaatisiiu chikusis.”
52 Aakw an uchimaau kaa kukwaachihchaayimut taan kaa ishpish chiishikaayich anitih kaa uhchi miyu pimaatisiiyich aniyaayiu ukusish. Aakw aatikut aniyaayiu aapichihaakin, “utaakushiihch, kaa ishkwaapihtaachiishiikaayich paayikw kaa iispiyich, aakutaah kaa ahastiwaashkutaauchipiyit aa chishitaaupiyit.”
53 Aakw an uhtaawiimaau kaa chishchisit aati nihaau aa chii ishpish chiishikaayich kaah iitikut Jesus, “chiki pimaatisiiu waash chikusis.” Aakutaah maak kaa uhchi taapwaahtihk kiyaah misiwaa awaayiuh anitih aa paayikutaausiit aakutaah kaa uhchi taapwaahtimiyich.
54 Aaukw maak uyaayiu niishwaa kaa maamishkaach ihtik Jesus aa tikushihk anitaah Galilee aschiihch, anitaah Judea aschiihch aa uhtuhtaat.