Canahch kaah chihchiwiichitunaaniwich
2
1 Nishtu chiishikaauh maak ishpish chii chihchiwiichitunaaniu anitaah an ihtaawin Cana kaa ishinihkaataach anitaah Galilee aschiihch kaah tikuhch. Aakutaah anitaah kaah taayich Jesus ukaawiih.
2 Jesus kiyaah uchischinihamuwaakinh chii nitumaakiniwich aniyaayiuh aa chihchiwiichitunaaniwiyich,
3 Iishpih maak misiwaa kaa chitaakiniwich an shuuminaapui, aakw Jesus aatikut ukaawiih, “shaash nuuhtaapiyuuch shuuminaapuuyiu.”
4 Aakw Jesus aataat, “iskwaau, chaakwaan waahchi wiihtimuyin an? Taapaa aashkw utihchipiyiu anitih chaa chischaayihtaakusiyaan awaan niiyi iyaawiyaan.”
5 Aakw aah taayich ukaawiih aapichihaakin, “mikw taan chaa iitishumitaakwaa aayuwikw aniyaayiu tutimwaahkw.”
6 Chii tikun maak anitih kutwaashch asiniyiu atuutipaasuwaakin. Paahpaayikw maak uhii atuutipaasuwaakin wiyaash niishtiniu kiyaah maak nishtumitiniu aa tihtuminihkwaakinaayaach chaa chii iispihtaakimihch nipii chii iyaaspishaau. Jew iiyiyiuch maak aa chishtaapiyuuch iitaapichihtaauch uyaayiu nipiiyiu aah tutihch taan aatishumikuch utiyimihaau wiishuwaawiniwaau.
7 Aakw Jesus aataat aniyaayiuh aapichihaakinh, “saakischinaapaachihtaakw nipii utih uhii atuutipaasuwaakin.” Mitun maak chii saakischinaapaahchitaayiu.
8 Aakw miin aataat, “kwaapihamukw apishiish chaa iituhtiwaakw an mikushaauchimaau.” Aayuwikw kiyipwaa kaah tiyich.
9 Chii kuchishtim an mikushaauchimaau aniyaayiu nipiiyiu, shaash maak shuuminaapuuhch chii iitaakimiyu. Nimui uhchi chischaayihtim taanitaah kaa uhchipiyiyich aniyaayiu shuuminaapuuyiu. Anichii maak wii aapichihaakinich aniyaayiu nipiiyiu kaa kwaapihahch chii chischaayihtimuch wiiyiwaau taanitaah kaa uhchipiyiyich aniyaayiu shuuminaapuuyiu. Aakw an mikushaauchimaau kaa nituumaat aniyaayiuh uschinaapaawaanh,
10 Aakw aataat, “misiwaa awaan aa mikushaat, aniyaayiu maauch aa miywaashiiyich shuuminaapuuyiu niishtim minihiiwaau, aakw iishpih aati miyuhkisuyich aniyaayiuh kaa nituumaat, aakw aniyaayiu aakaa saapaakimiyich shuuminaapuuyiu maanihiiwaat. Maauch kaa miywaakimich shuuminaapui aaukw maahchich chii maanihiiwaayin.”
11 Aakutaah maak anitih Canahch anitaah Galilee aschiihch, aaukw niishtim maamishkaach waapihtiiwaawiniyiu kaah tutihk Jesus, aakutaah kaa nuukuniiyich uchistaayihtaakusiwin. Aakutaah maak kaa uhchi taapwaayaayimikut uchischinihamuwaakinh.
12 Aakw Jesus kiyaah ukaawiih kiyaah wiichishaanh kiyaah aniyaayiuh uchischinihamuwaakinh chii iituhtaauch anitaah aniyaayiu ihtaawiniyiu Capernaum kaa ishinihkaataayich, aakutaah anitaah kaah taach. Nimui mikw naashch mihchaatu chiishikaauh uhchi taauch anitaah.
Chishaaayimihaaukimikuhch kaa iituhtaat Jesus
Matthew 21:12, 13; Mark 11:15-17; Luke 19:45, 46
13 Shaash maak chii paashunaakuniyiu Jew iiyiyiuch kaa chii mikushaach, miyaashkaachaau mikushaawin kaa ishinihkaataayich, aakw anitaah Jerusalemihch kaa iituhtaat Jesus.
14 Anitaah maak chishaaayimihaaukimikuhch chaa aati piihchaat, chii waapimaau ataawaasuuuh aa ataawaayich mistus kiyaah maanishchaanish kiyaah piyaashiish, kiyaah aniyaayiu kaa miishkutuunaayich shuwiyaan aa apiyich anitaah.
15 Aakw kaa ushihtaat pishishtaahiikiniyiu saastiikwaayaapii aah aapichihaat, aakw kaa waawiiyaamuhchaat aniyaayiuh ataawaashuuh kiyaah aniyaayiuh auhkaan anitih chishaaayimihaaukimikuhch, taapishkun aniyaayiuh maanishchaanish kiyaah aniyaayiuh mistus. Chii kwaatipaawaapinimwaau kiyaah umiichisuunaahtikuyiu aniyaayiu kaa miishkutinaayich shuwiyaan, kaa aschiwaapinimaat aniyaayiu ushuuyaanimiyiu.
16 Chiih iitaau maak aniyaayiu piyaashiish kaa ataawaachaayich, “maachiikw wiyiwiihtihaahkuch naataah anichii. Aakun aakw ishpish utaawaaukimikutumwaahkw uyaah nuuhtaawii wiich.”
17 Uchischinihamuwaakinh maak chii uhchi chishchisiyiu anitaah chihchimisinihiikinihch kaah iitishtaayich,
Mitun niki shihkuchihiikun naashch aa saachihtaayaan chii waaskaahiikinim.
18 Aakw aniyaayiu kaa niikaanishkiwaayich Jew iiyiyiuh kaa paachi nitiwaapimikut, aakw aatikut, “awaan kaah iitishumisk an kaah tutimin, chaakw uchimaawinh iyaapichihtaayin?”
19 Aakw Jesus aataat, “nishiwinaachihtaakw uu chishaaayimihaukimikw, nishtu chiishikaauh maak ishpish miin kaau niki wiyikaapuhtaan.”
20 Aakw iyaach, “taapwaahaa, nishtu chiishikaauh aa ishpish shaash miin chiki chii wiyikaapuhtaan? Naamitiniu nikutwaashaap tihtu pipun chii pimiihkaakiniu uu chishaaayimihaukimikw kaa wiyikaapuhtaakiniwich.”
21 Mikw maak aniyaayiu maak chishaaayimihaaukimikuyiu kaahiit Jesus uyiu waash aniyaayiu chii aayimwaahiikuu.
22 Iishpih maak kaa winishkaanaakinuut nipiwinihch uhchi, aakw kaa chishchisiiyich aniyaayiuh uchischinihamuwaakinh uyaayiu kaah iyit. Chii taapwaahtimuch maak taan aah iitishtaayich chihchimisinihiikinihch kiyaah taan kaa iiyiyich Jesus.
Jesus mitun chischaayimaau taan aayitaayihtaakusiiyich awaayiuh
23 Maakwaach maak Jesus kaah taat anitaah Jerusalemihch aniyaayiu maakwaach kaa mikushaaniwiyich miyaaskaachaawin mikushaaniyiu, mihchaatu awaayiuh chii taapwaayaayimikuu iishpih kaa waapimikut aa maamishkaach aa ihtik.
24 Jesus maak nimui uhchi taapwaauchaayimaau waash misiwaa awaayiuh chii chischaayimaau taan nihaau aa iitaayihtaakusiiyich.
25 Nimui kiyaah uhchi nitiwaayihtim chaa chii wiihtimaakut awaayiuh taan aayitaayihtaakusiiyich awaayiuh waash chii chischaayimaau taan nihaau aa iitaayihtaakusiiyich.