ᐁᐅᒄ ᐅᔫ ᓂᔥᑣᐤ ᑳ ᒪᓯᓇᐦᐄᒉᑦ ᑆᓪ ᐊᓂᑌ ᐅᐦᒋ ᒋᐸᐦᐅᑑᑲᒥᑯᐦᒡ ᐊᓂᑌ ᕎᒥᐦᒡ ᑳ ᐃᐦᑖᑦ᙮ ᐁᐸᕝᕋᔅ ᒌ ᐃᔑᓂᐦᑳᓲ ᓈᐯᐤ ᐁ ᒌ ᓂᑐᐙᐸᒫᑯᐸᓀ ᑆᓪ ᐁ ᓂᑑ ᐐᐦᑕᒧᐙᑦ ᐁ ᐃᐦᑖᔨᑣᐤᐦ ᐊᐌᔫ ᓂᑕᐐᓐ ᐁ ᐃᔑ ᒋᔅᑯᑕᒫᒉᔨᑣᐤᐦ ᐊᓂᑌ ᑯᓨᓰ ᑳ ᐃᔑᓂᐦᑳᑌᔨᒡ ᐃᐦᑖᐎᓂᔫ ᐁ ᐃᑖᑣᐤ ᐊᓂᔫ ᐄᓅ ᐁᑳ ᓂᐦᐋᐤ ᑌᑲᔥ ᐃᔑᓈᑯᓂᔨᒡ ᐅᑖᐺᐦᑕᒧᐎᓂᔫ᙮ ᒌ ᐃᑌᐅᒡ ᐁ ᒋᔅᑯᑕᒧᐙᑣᐤ ᐊᓂᔫ ᐄᓅ ᐊᓂᑌ ᑯᓨᓰᐦᒡ ᑳ ᐃᐦᑖᔨᑣᐤᐦ ᒉᒌ ᓅᒌᔥᑐᐙᔨᒡ ᐁᓐᒋᓪᐦ ᑲᔦ ᔮᒀᐤ ᒉᒌ ᐃᔑ ᓈᓈᑲᒋᐦᑖᔨᒡ ᐐᔓᐌᐎᓐᐦ ᓀᔥᑦ ᒉᒀᔫᐦ ᑖᓐ ᐁ ᐃᔑ ᐃᐦᑕᑯᓂᔨᒀᐤᐦ ᐁ ᐃᐦᑎᓈᓄᔨᒡ᙮ ᑆᓪ ᒫᒃ ᒌ ᒪᓯᓇᐦᐊᒧᐌᐤ ᐊᓂᔫ ᐄᓅ ᐊᓂᑌ ᑯᓨᓰ ᑳ ᐃᐦᑖᔨᒡ ᒉᒌ ᓂᔥᑰᔥᑐᐙᔨᒡ ᐊᓂᔫ ᓂᑕᐐᓐ ᑳ ᐃᔑ ᒋᔅᑯᑕᒫᒉᔨᑣᐤᐦ᙮ ᒌ ᐃᔑ ᒋᔅᒋᓲᒣᐤ ᐐ ᒌᓴᔅ ᒥᓯᐌ ᒉᒀᔫ ᐁ ᐅᒋᒫᐦᑲᐦᑕᐦᒃ, ᑲᔦ ᒫᒃ ᐊᓂᔫ ᐁ ᒌ ᓂᐱᑦ ᐁᑯᓐ ᐊᓂᔫ ᒥᒄ ᒉᒌ ᐱᒫᒋᐦᐄᑰᐦᒄ ᒋᒪᒋᐦᑣᐎᓅᐦ ᐅᐦᒋ, ᐎᔭ ᒫᒃ ᐁ ᐃᐦᑖᑦ ᐅᐦᒋ ᐁᑯᑦ ᐌᐦᒋ ᐐᐦᑯᒋᐦᐄᑯᔨᐦᒄ ᑖᓐ ᑳ ᐃᔑ ᐅᔑᐦᑖᔨᒡ ᓈᐯᐤ ᐐᔓᐌᐎᓐᐦ᙮