22
ᑆᓪ,
ᒌ ᐃᑌᐤ,
ᓃᒋᔖᓂᑎᒄ ᐁᒄ ᒫᒃ ᒋᔭᐙᐤ ᒋᔐᐃᓅᑎᒄ, ᐯᒋ ᓂᑐᐦᑑᒄ ᑯᐃᔅᒄ ᐁ ᐐ ᐐᐦᑕᒫᓐ ᐁᑳ ᐎᔦᔥ ᐃᔑ ᐋᑖᒣᔨᐦᑖᑯᓯᔮᓐ᙮
2 ᐃᔅᑯᑕᒃ ᒫᒃ ᐱᔦᐦᑕᐙᑣᐤ ᐊᓂᒌ ᐄᓅᒡ ᐦᐄᑉᕉ ᐁ ᐃᔑ ᐊᔨᒥᔨᒡ ᑆᓪ,
ᐊᓂᔫ ᑮᐹ ᐁ ᐃᔑ ᐊᔨᒥᑣᐤ,
ᐁᒄ ᐁᑎᑑ ᓇᒧᐃ ᐅᐦᒋ ᒋᔅᑑᒡ᙮
ᐁᒄ ᑆᓪ ᑳ ᐊᑎ ᐃᑗᑦ,
3 ᒎᐗ ᓂᑎᑎᔅᑳᓀᓯᓐ᙮
ᑖᕐᓴᔅ ᑳ ᐃᔑᓂᐦᑳᑌᒡ ᐃᐦᑖᐎᓐ ᐊᓂᑌ ᓯᓕᓯᔭ ᐊᔅᒌᐦᒡ ᑳ ᐃᐦᑕᑯᐦᒡ ᐁᑯᑌ ᑳ ᐱᒫᑎᓯᔮᓐ᙮
ᐁᒄ ᒥᒄ ᐅᑕᐦ ᒉᕉᓴᓚᒥᐦᒡ ᑳ ᓂᐦᑖᐅᑎᓂᑯᔮᓐ᙮
ᐊᓂᔫ ᒫᒃ ᑲᒫᓕᔦᓪ ᑳ ᐃᔑᓂᐦᑳᓱᑦ ᒋᔐᒪᓂᑑ ᐅᐐᔓᐌᐎᓂᔫ ᑳ ᒌ ᒋᔅᑯᑕᒫᒉᑦ ᐁᑯᑦ ᐊᓐ ᑲᔦ ᓂᔭ ᔮᒀᐤ ᑳ ᐃᔑ ᒋᔅᑯᑕᒫᑯᔮᓐ ᐊᓂᔦᐦᑳ ᒋᐙᐦᑯᒫᑲᓅᒡ ᐅᐐᔓᐌᐎᓇᐙᐤᐦ᙮
ᑲᔦ ᓂᔭ ᓈᔥᒡ ᓂᒌ ᐐ ᓇᓂᐦᐄᐦᑐᐙᐤ ᒋᔐᒪᓂᑑ ᒬᐦᒡ ᐁ ᐃᐦᑎᔦᒄ ᑲᔦ ᒋᔭᐙᐤ ᐅᑕᐦ ᐊᓄᐦᒌᔥ᙮
4 ᓈᔥᒡ ᓂᒌ ᐐ ᓇᓀᐦᑳᒋᐦᐋᐅᒡ ᐊᓂᒌ ᑳ ᑖᐺᐦᑕᐦᒀᐤ ᒌᓴᔅ ᐅᐦᒋ ᐁ ᐅᐦᒋ ᐱᒫᒋᐦᐅᓈᓅᐦᒡ᙮
ᐁᑯᔥ ᒥᓯᐌ ᓂᐸᐦᐋᑲᓅᑣᐌᓂᒡ ᓂᒌ ᐃᑌᔨᐦᑌᓐ᙮
ᓂᒌ ᒫᑯᓈᐅᒡ ᑖᐱᔥᑯᓐ ᓈᐯᐅᒡ ᑲᔦ ᐃᔅᑴᐅᒡ,
ᐙᐙᒡ ᓂᒌ ᐃᐦᑑᑕᐙᐅᒡ ᒉᒌ ᒋᐸᐦᐙᑲᓅᑣᐤ᙮
5 ᐆ ᒫᒃ ᒋᔐᐊᔨᒥᐦᐁᐅᒋᒫᐤ ᑲᔦ ᐊᓂᒌ ᒎᐗ ᐄᓅᒡ ᑳ ᒫᒨᐱᔥᑕᐦᒀᐤ ᐎᔮᔅᑯᓂᒉᐎᓂᔫ ᒋᑲ ᒌ ᐐᐦᑕᒫᑯᐙᐅᒡ ᐁ ᑖᐺᐅᒡ ᐅᔫ ᑳ ᐃᑗᐅᒡ᙮
ᓂᒌ ᒦᑯᒡ ᒪᓯᓇᐦᐄᑲᓐᐦ ᒉᒌ ᐃᑐᐦᑕᑖᒪᒡ ᐐᒋᔖᓂᒫᐤᐦ ᐊᓂᑌ ᑕᒫᔅᑲᔅ ᑳ ᐃᐦᑖᔨᒡ᙮
ᒌ ᒪᓯᓈᑌᔫ ᐊᓂᑦ ᐁ ᐃᑕᔓᒥᑣᐤ ᒉᒌ ᒫᑯᓂᒪᒡ ᑲᔦ ᒉᒌ ᒫᐦᒋᒀᐱᐦᑳᑕᒪᒡ ᐊᓂᔫ ᑳ ᑖᐺᔨᒫᔨᒡ ᒌᓴᔅ ᐊᓂᑌ ᑕᒫᔅᑲᔅ ᑳ ᐃᐦᑖᔨᑣᐤᐦ ᑲᔦ ᒉᒌ ᐯᔒᒪᒡ ᐅᑕᐦ ᒉᕉᓴᓚᒥᐦᒡ ᒉᒌ ᐗᐌᔑᐦᐋᑲᓄᔨᒡ᙮
ᑆᓪ ᑳ ᐐᐦᑕᐦᒃ ᑖᓐ ᑳ ᐃᔅᐸᔨᑦ ᐊᓂᑦ ᑳ ᐅᐦᒋ ᑖᐺᐦᑕᐦᒃ
6 ᐯᔭᒀᐤ ᒣᒀᒡ ᐁ ᐱᒧᐦᑌᔮᓐ ᐁ ᐊᑎ ᐯᔓᐙᐸᐦᑕᒫᓐ ᑕᒫᔅᑲᔅ,
ᐎᔦᔥ ᐁ ᐋᐱᐦᑖᒌᔑᑳᒡ,
ᓯᔅᒋᑰᒡ ᒌ ᐅᐦᒋ ᒥᔅᑕ ᐙᔥᑌᐤ ᐊᓂᑦ ᐙᔅᑳ ᐁ ᐃᐦᑖᔮᓐ ᐊᓂᑌ ᐅᐦᒋ ᑭᐦᒋᑮᔑᑯᐦᒡ ᐁ ᐅᐦᒋ ᐙᔥᑌᒡ᙮
7 ᒥᑐᓐ ᒫᒃ ᓂᒌ ᐊᑎ ᐸᐦᒋᔑᓐ ᐊᓂᑌ ᐊᔅᒌᐦᒡ ᐁᒄ ᑳ ᐯᐦᑕᐗᒃ ᐊᐌᓐ ᐁ ᐄᔑᑦ,
ᔂᓪ,
ᔂᓪ ᒉᒀᓐ ᐌᐦᒋ ᓇᓀᐦᑳᒋᐦᐃᔨᓐ᙮
8 ᐁᒄ ᑳ ᐃᑕᒃ,
ᐊᐌᓐ ᒫᒃ ᒋᔭ,
ᐅᑎᐯᔨᐦᒋᑫᐤ᙮
ᐁᒄ ᑳ ᐄᔑᑦ,
ᐁᐅᒄ ᓂᔭ ᒌᓴᔅ,
ᓈᓴᕆᑦ ᑳ ᐅᐦᒋᔮᓐ,
ᑳ ᓇᓀᐦᑳᒋᐦᐃᔨᓐ᙮
9 ᐊᓂᒌ ᒫᒃ ᓈᐯᐅᒡ ᑳ ᐐᒉᐅᑣᐤ ᒌ ᐙᐸᐦᑕᒧᒡ ᐊᓂᔫ ᑳ ᒋᐦᑳᔥᑌᔨᒡ,
ᓇᒧᐃ ᒥᒄ ᐅᐦᒋ ᐯᐦᑕᐌᐅᒡ ᐊᓂᔫ ᑳ ᐯᒋ ᐊᔨᒥᐦᐃᔨᒡ᙮
10 ᐁᒄ ᑳ ᐃᑕᒃ,
ᐅᑎᐯᔨᐦᒋᑫᐤ,
ᑖᓐ ᐁ ᐃᔑ ᓂᑐᐌᔨᒥᔨᓐ ᒫᒃ ᒉ ᐃᐦᑎᔮᓐ᙮
ᐁᒄ ᑳ ᐄᔑᑦ,
ᐱᓯᑰᐦ,
ᒉ ᐃᑐᐦᑌᔨᓐ ᐊᓂᑌ ᑕᒫᔅᑲᓯᐦᒡ᙮
ᐁᑯᑦ ᐊᓐ ᒉ ᐐᐦᑕᒫᑯᔨᓐ ᒥᓯᐌ ᑖᓐ ᐁ ᐃᑕᔓᒥᔅᒃ ᒋᔐᒪᓂᑑ ᒉ ᐃᑖᐸᑎᓲᑦ᙮
11 ᓇᒧᐃ ᒫᒃ ᓅᐦᒌ ᐙᐸᐦᑌᓐ ᑳ ᐃᔥᐱᔥ ᒌ ᒌᐦᑳᔮᔥᑌᒡ ᐊᓐ ᑳ ᐙᔥᑌᒡ᙮
ᐁᒄ ᐊᓂᒌ ᓂᐐᒉᐙᑲᓂᒡ ᑳ ᐯᒋ ᑕᐦᑯᓂᔅᒉᐦᑕᐦᐄᑣᐤ ᐊᓂᑌ ᑕᒫᔅᑲᓯᐦᒡ ᑳ ᐃᑐᐦᑕᐦᐄᑣᐤ᙮
12 ᒌ ᐃᐦᑖᐤ ᒫᒃ ᓈᐯᐤ ᓂᔮᓂᑕᒻ ᐊᓂᑦ ᑕᒫᔅᑲᔅ ᐁ ᒌ ᐐᒋᑦ ᐊᓇᓈᔭᔅ ᐁ ᐃᔑᓂᐦᑳᓱᑦ᙮
ᒌ ᑖᐺᔨᒣᐤ ᒋᔐᒪᓂᑑ ᐆ ᓈᐯᐤ ᑲᔦ ᓈᔥᒡ ᔮᒀᐤ ᒌ ᐃᔑ ᓈᓈᑲᑐᐌᔨᐦᑕᒥᐦᐄᑰ ᒎᐗ ᐊᔨᒥᐦᐁᐐᔓᐌᐎᓂᔫ᙮
ᓈᔥᒡ ᒫᒃ ᒌ ᒋᔅᑌᔨᒥᑰ ᒥᓯᐌ ᐊᓂᔫ ᒎᐗ ᐄᓅᐦ ᐊᓂᑦ ᑕᒫᔅᑲᓯᐦᒡ ᑳ ᐃᐦᑖᔨᒡ᙮
13 ᐁᐅᒄ ᐆ ᓈᐯᐤ ᑳ ᐯᒋ ᓂᑐᐙᐸᒥᑦ,
ᑳ ᐯᒋ ᐅᐦᒋᔥᑰᑳᐴᔥᑑᑦ,
ᐁᒄ ᑳ ᐄᔑᑦ,
ᓃᒋᔖᓐ ᔂᓪ,
ᑳᐤ ᒦᓐ ᐙᐸᐦᑕ᙮
ᐃᔅᑯᑕᒃ ᒫᒃ ᑳ ᐄᔑᑦ ᐊᓂᔫ ᑏᐌᐦᒡ ᒦᓐ ᓂᒌ ᐙᐸᐦᑕᒧᐙᓐ᙮
ᑳ ᑲᓇᐙᐸᒪᒃ,
14 ᐁᒄ ᑳ ᐄᔑᑦ,
ᐊᓂᔫᐦ ᒋᔐᒪᓂᑑ ᑳ ᑖᐺᔨᒫᑣᐤ ᐊᓂᔦᐦᑳᓈᓂᒡ ᒋᒧᔔᒥᓅᒡ,
ᒋᒌ ᐎᔮᐸᒧᒄ ᒉᒌ ᒋᔅᒉᔨᐦᑕᒧᑦ ᑖᓐ ᐁ ᐃᔑ ᓂᑐᐌᔨᐦᑕᐦᒃ ᒉ ᐃᐦᑎᓈᓄᔨᒡ ᐅᑕᐦ ᐊᔅᒌᐦᒡ,
ᑲᔦ ᒉᒌ ᐙᐸᒪᑦ ᐊᓂᔫ ᙭ ᑳ ᑯᐃᔅᑯᑖᑎᓯᔨᒡ ᑲᔦ ᒉᒌ ᐯᐦᑑᒪᑦ ᐁ ᐊᔨᒥᐦᐄᔅᒃ᙮
15 ᒥᓯᐌ ᒫᒃ ᐊᐌᓂᒌ ᒋᑲ ᐐᐦᑕᒧᐙᐅᒡ ᑖᓐ ᑳ ᐃᔑ ᐙᐸᐦᑕᒪᓐ ᑲᔦ ᑳ ᐃᔑ ᐯᐦᑕᒪᓐ ᐁ ᐃᑖᒋᒫᑲᓅᑦ᙮
16 ᒫᒌᐦ ᒫᒃ,
ᐁᑳᐐ ᓇᓇᑳᐐᐦ᙮
ᐱᓯᑰᐦ,
ᒉ ᓰᑲᐦᐋᐦᑖᑯᔨᓐ,
ᐁᒄ ᒫᒃ ᒉ ᐌᐯᔨᐦᑕᒫᑯᔨᓐ ᒋᒪᒋᐦᑣᐎᓐ ᐁ ᑌᑆᑕᑦ ᐅᑎᐯᔨᐦᒋᑫᐤ ᒉᒌ ᐌᐯᔨᐦᑕᒫᔅᒃ᙮
ᐅᑎᐯᔨᐦᒋᑫᐤ ᑳ ᐃᑖᑦ ᑆᓪ ᒉ ᐐᐦᑕᒧᐙᔨᒡ ᒥᔻᒋᒧᐎᓂᔫ ᐊᓂᔫ ᐄᓅ ᐁᑳ ᒎᐗ ᑳ ᐃᑎᔅᑳᓀᓯᔨᒡ
17 ᐁᒄ ᒦᓐ ᑳᐤ ᒉᕉᓴᓚᒥᐦᒡ ᑳ ᐃᑐᐦᑌᔮᓐ᙮
ᒣᒀᒡ ᒫᒃ ᐁ ᐊᔨᒥᐦᐋᔮᓐ ᐊᓂᑌ ᒋᔐᐊᔨᒥᐦᐁᐅᑲᒥᑯᐦᒡ,
ᒌ ᐃᐦᑕᑯᓐ ᑖᓐ ᑳ ᐃᔑ ᐙᐸᐦᑏᑯᔮᓐ᙮
18 ᓂᒌ ᐙᐸᒫᐤ ᐅᑎᐯᔨᐦᒋᑫᐤ ᐁ ᐯᒋ ᐄᔑᑦ,
ᒌᐲᐦ,
ᓇᑲᑦ ᐆ ᒉᕉᓴᓚᒻ ᐊᓄᐦᒌᔥ,
ᑖᐹ ᐌᓯᓐ ᒋᑲ ᐅᐦᒋ ᑖᐺᐦᑖᑯᒡ ᐅᒌ ᐄᓅᒡ ᐅᑕᐦ ᑖᓐ ᒉ ᐯᒋ ᐃᑖᒋᒥᔨᓐ,
ᓂᒌ ᐃᑎᒄ᙮
19 ᐁᒄ ᑳ ᐃᑕᒃ,
ᐅᑎᐯᔨᐦᒋᑫᐤ,
ᒋᔅᒉᔨᐦᑕᒧᒡ ᐅᒌ ᐄᓅᒡ ᒥᒄ ᐁ ᒌ ᐊᔮᔔ ᓈᑕᒫᓐ ᐅᔫ ᒎᐗ ᐊᔨᒥᐦᐁᐅᑲᒥᒄ ᒉᒌ ᒫᑯᓇᒀᐤ ᐅᒌ ᑳ ᑖᐺᔨᒥᔅᒀᐤ ᑲᔦ ᐁ ᒌ ᐃᐦᑑᑑᒀᐤ ᒉᒌ ᐸᐸᓯᔅᑌᐦᐙᑲᓅᑣᐤ᙮
20 ᑲᔦ ᒫᒃ ᐃᔅᑯᑕᒃ ᑳ ᓂᐸᐦᐋᑲᓅᑦ ᔅᑏᕙᓐ ᐊᓂᔫ ᐁ ᑎᐹᒋᒥᔅᒃ ᐅᐦᒋ,
ᑲᔦ ᓂᔭ ᓂᒌ ᐃᐦᑖᓐ ᐊᓂᑦ᙮
ᓂᒌ ᓇᐦᐁᔨᐦᑌᓐ ᐊᓂᔫ ᐁ ᒌ ᐃᐦᑑᑕᐙᑲᓅᑦ ᑲᔦ ᓂᒌ ᑲᓄᐌᔨᐦᑕᒧᐙᓐ ᐅᑕᑯᐦᐳᐙᐤ ᐊᓂᒌ ᑳ ᓂᐸᐦᐋᑣᐤ ᔅᑏᕙᓐ᙮
21 ᐁᒄ ᑳ ᐄᔑᑦ ᐅᑎᐯᔨᐦᒋᑫᐤ,
ᒫᒌᐦ ᔮᐸᒡ ᐌᔥ ᐙᐦᔫ ᒋᑲ ᐃᑎᔕᐦᐆᑎᓐ ᐊᓂᑌ ᐊᓂᒌ ᐁᑳ ᒎᐗ ᑳ ᐃᑎᔅᑳᓀᓯᑣᐤ ᐁ ᐃᐦᑖᑣᐤ᙮
22 ᐃᔅᑯᑕᒃ ᒫᒃ ᐅᔫ ᐁ ᐃᔑ ᐊᔨᒥᔨᒡ ᐊᓂᔫᐦ ᑆᓪ,
ᐊᓂᔫ ᑮᐹ ᐁ ᐃᑖᒋᒧᔨᒡ ᒋᔐᒪᓂᑑ ᐁ ᒌ ᐃᑎᔕᐦᐅᑯᔨᒡ ᐊᓂᑌ ᐊᓂᔫ ᐁᑳ ᒎᐗ ᑳ ᐃᑎᔅᑳᓀᓯᔨᒡ ᐁ ᐃᐦᑖᔨᒡ,
ᐁᑯᓐ ᑳ ᐃᔥᐱᔥ ᓂᑐᐦᑕᐙᑣᐤ ᐊᓂᒌ ᐄᓅᒡ᙮
ᒌ ᒋᐦᒋ ᐋᔑᐦᑴᐅᒡ ᐁ ᐃᑗᑣᐤ,
ᓂᐸᐦᐋᐦᒄ ᐆ ᓈᐯᐤ,
ᓇᒧᐃ ᐃᑌᔨᐦᑖᑯᓲ ᒉᒌ ᐱᒫᑎᓰᑦ ᐅᑕᐦ ᐊᔅᒌᐦᒡ᙮
23 ᒌ ᐋᔑᐦᑴᐅᒡ ᒫᒃ ᐁ ᐙᐌᐸᔨᐦᑖᑣᐤ ᐅᒉᒀᓂᒧᐙᐤ,
ᑲᔦ ᔦᑳᔫ ᐁ ᐃᔥᐹᐦᒉᐌᐱᓇᐦᒀᐤ ᑳ ᐃᔥᐱᔥ ᒌ ᒥᔅᑕ ᒋᔓᐙᓯᑣᐤ᙮
24 ᐁᒄ ᐊᓐ ᕎᒻ ᓂᑐᐸᔫᒋᒫᐤ ᑳ ᐃᑖᑦ ᐊᓂᔫ ᐅᔑᒫᑲᓂᔒᒻ ᒉᒌ ᐲᐦᑕᑲᐦᐋᔨᒡ ᑆᓪ ᐊᓂᑌ ᔑᒫᑲᓂᔔᑲᒥᑯᐦᒡ᙮
ᐁᒄ ᑳ ᐃᑕᔓᐌᑦ ᒉᒌ ᐸᐸᓯᔅᑌᐦᐙᑲᓄᔨᒡ᙮
ᒌ ᐳᑯᓭᔨᐦᑕᒻ ᑮᐹ ᒉᒃ ᐊᓂᑦ ᐊᓂᔫ ᐁ ᐸᐸᓯᔅᑗᐦᐙᑲᓄᔨᒡ ᒉᒌ ᐅᐦᒋ ᐐᐦᑕᒥᔨᒡ ᑖᓐ ᑳ ᐃᔑ ᐗᓂᐦᐱᓱᔨᒡ ᐌᐦᒋ ᐃᔥᐱᔥ ᐌᓵ ᒋᔓᐙᐦᐋᔨᒡ ᐊᓂᔫ ᒎᐗ ᐄᓅᐦ᙮
25 ᐃᔅᑯᑕᒃ ᒫᒃ ᑳ ᐎᔮᐱᐦᑳᑖᑣᐤ ᒉ ᐸᐸᓯᔅᑌᐦᐙᑣᐤ,
ᐊᓐ ᔑᒫᑲᓂᔔᒋᒫᐤ ᒌ ᐃᔑ ᑲᑴᒋᒥᑰ ᐊᓂᔫ ᑆᓪ,
ᑯᐃᔅᑯᓈᑯᓐ ᐋ ᒉᒌ ᐸᐸᓯᔅᑌᐦᐌᒄ ᐊᐌᓐ ᕎᒻ ᐁ ᐃᔑ ᒪᓯᓈᓱᑦ ᑲᔦ ᐁᑳ ᐁᔥᒄ ᐅᐦᒋ ᐎᔮᔅᑯᓈᑲᓅᑦᓪ᙮
26 ᐃᔅᑯᑕᒃ ᒫᒃ ᐱᔦᐦᑕᐦᒃ ᐅᔫ ᐊᓐ ᑳ ᓃᑳᓂᔥᑯᐙᑦ ᔑᒫᑲᓂᔕ,
ᒌ ᓂᑐᐙᐸᒣᐤ ᐊᓂᔫ ᔑᒫᑲᓂᔔᒋᒫᐤ,
ᐁᒄ ᑳ ᐃᑖᑦ,
ᒋᒋᔅᒉᔨᐦᑌᓐ ᐋ ᑖᓐ ᐁ ᐃᐦᑏᐦᒄ ᐆ᙮
ᕎᒻ ᐄᓅ ᐋᐦᒋᓐ ᐃᑎᓯᓈᓲ ᐆ ᓈᐯᐤ ᑳ ᐃᐦᑑᑑᐦᒄ᙮
27 ᐁᒄ ᐊᓐ ᓂᑐᐸᔫᒋᒫᐤ ᑳ ᓂᑐᐙᐸᒫᑦ ᐊᓂᔫ ᑆᓪ,
ᑳ ᐃᑖᑦ,
ᑖᐺ ᐋ ᕎᒻ ᒋᑎᑕᓯᓈᓱᓐ᙮
ᑆᓪ ᑳ ᐃᑖᑦ,
ᐁᐦᐁ᙮
28 ᐁᒄ ᐊᓂᔫ ᓂᑐᐸᔫᒋᒫᐤ ᑳ ᐃᑎᑯᑦ,
ᓄᐗᒡ ᒥᔅᑕᐦᐄ ᔔᓕᔮᐤ ᓂᒌ ᐃᔥᐱᑎᑰᓐ ᕎᒥᐦᒡ ᒉᒌ ᐃᔑ ᒪᓯᓈᓱᔮᓐ᙮
ᐁᒄ ᑆᓪ ᑳ ᐃᑖᑦ,
ᑳ ᐱᒫᑎᓯᔮᓐ ᓂᔭ ᔖᔥ ᕎᒻ ᓂᒌ ᐃᑕᓯᓈᓱᓐ᙮
29 ᐱᔦᐦᑕᐦᒀᐤ ᒫᒃ ᐅᔫ ᐁ ᐃᑗᔨᒡ ᑆᓪ ᐊᓂᒌ ᑳ ᐐ ᓂᑑ ᒋᔅᒉᔨᒫᑣᐤ ᑖᓐ ᑳ ᐃᔑ ᐗᓂᑑᑕᒥᔨᒡ ᒌ ᐊᑎ ᐊᔖᑳᐴᒡ᙮
ᐁᒄ ᐊᓐ ᓂᑐᐸᔫᒋᒫᐤ ᑳ ᓴᓭᒋᓯᑦ ᐃᔅᑯᑕᒃ ᒉᔅᒉᔨᒫᑦ ᑆᓪ ᑖᐺ ᕎᒻ ᐁ ᐃᑕᓯᓈᓱᔨᒡ,
ᑲᔦ ᒫᒃ ᐊᓂᔫ ᐁ ᒌ ᒫᐦᑯᐱᑖᑦ ᐅᐴᒋᔑᔮᐲᐦ ᐁ ᐋᐸᒋᐦᑖᑦ᙮
30 ᐎᔮᐸᓂᔨᒡ ᒫᒃ,
ᐊᓂᔫ ᐁ ᐐ ᓂᑑ ᒋᔅᒉᔨᐦᑕᐦᒃ ᒉᒀᔫ ᓂᐦᐋᐤ ᐌᐦᒋ ᓂᑐᐌᔨᒫᑲᓄᔨᒡ ᐊᓂᔫ ᑆᓪ ᒉᒌ ᓂᐸᐦᐋᑲᓄᔨᒡ,
ᒌ ᐃᑕᔓᐌᐤ ᒉᒌ ᐸᒋᔥᑎᓈᑲᓄᔨᒡ,
ᐁᒄ ᑳ ᐃᑖᑦ ᐊᓂᔫ ᑳ ᓃᑳᓇᐲᑣᐤ ᐊᔨᒥᐦᐁᐅᒋᒫᐤᐦ ᐁᒄ ᒫᒃ ᐊᓂᔫᐦ ᒎᐗ ᑳ ᒫᒨᐱᔥᑕᒥᔨᒡ ᐎᔮᔅᑯᓂᒉᐎᓂᔫᐦ ᒉᒌ ᓂᔥᑐᐎᔨᒡ᙮
ᑳ ᐃᑐᐦᑕᐦᐋᑦ ᑆᓪ ᐊᓂᑌ,
ᐁᒄ ᑳ ᐅᐦᒋᔥᑰᑳᐴᐦᐋᑦ ᐊᓂᑦ ᐊᓂᔫ ᐁ ᓂᔥᑐᐐᓈᓄᔨᒡ᙮