Uu masinahiikan eukun uu mikw e ihtakuhch e iteyihtaakuhch utah e uskaach testamint. Uu masinahiikan ekut e aayimuutech taan che iteyihtaakuhch e ati iskwaayaach uu aschii neshta che chihchipayihch ekw an kaa uskaach kihchikiishikw neshta aschii kaa aayimuutech. John, an apastal kaa itaapatisit ekun kaa masinahahk uyuu masinahiikaniyuu mekwaach anite Patmos kaa ishinihkaateyich ministikuyuu kaa ihtaat. Mekwaach anite kaa ihtaat John chii waapahtiikuu Jesus waapahtiiwewiniyuu taan che ispayihch anite ishi niishtaamihch. Eukw uyuu kaa itasinahiichet John chechii uhchi taapwehtamiyich aniyuu kaa taapwehtamiitwaau taapwe wiya Chishemanituu e pimipayihtaat taan e ispayich utah aschiihch. Aniyuu taan kaa ishi waapahtiyaakanuut John ekut e nuukuniyich taapwe wiya Jesus e tipeyihchichet misiwe aweyuuh e ihtaayich neshta anite misiwe chekwaayuu e ishi ihtakuniyich, ishpish wii aniyuu maauch kaa suuhcheyihtaakusiyich tipeyihchichesuu, neshta misiwe chika wiyaaskunam kaye chika nishuuwanaachihtaau machaatisiiwiniyuu. Kaye ekut wehchi waapahtiyaakanuutwaau anichii kaa taapwehtahkwaau taan che iteyihtaakuniyich anite kihchikiishikuhch anite che ihtaayihkw Jesus e ihtaat.