2
16 Junsi Diosi la Oséabe itsantie: Jun materi israelítala laca patron joe tilatituchunae tie. Tsantituto, Diosica chiquilachi unila joe latichunae tie. Jerale israelita bolonchi unila cuwenta joanae tie. 17 Israelítalachi epe diosi joe tinunlaca pasa carituanae tie; israelítalari tsanlaca pansito tsanle palaquituchunae tie. 18 Jun mate animalilabe trato quino joyoe tie yape nulaca niyanantiya quilaquitusa. Jelenchi nenamin animalilabe, pichulabe, junsi pinilabe trato quino joyoe tie yape seiton quilaquitusa. Israelítalachi toca espadachi, junsi uyan querabi quinun cosalachi, quisa carituanae tie yape lachi tsachila pansi chularasa. 19 Junto israelítalaca lachi sona cuwenta suwanae tie. Nulaca laquirato, nulachi tenchi se quito, lachi sona cuwenta suwanae tie. 20 Junto lachi sona cuwenta suwato, numatotiya puratuanae tie. Tsan jonan, nulari miilaichunae tie nulachi Miya Diosi joeque.21 La Miya Diosi joto itsantinayoe tie: Yoquidobi nechi suwa quisa cariyanae tie yape to atan josa. 22 Junnan duque trico, bino, aseite jochunae tie. Junnan duque ano fino jonan, jerale israelítalachi toca Jezreel tintsan jochunae; Diosi waqueca jun cuwenta jonan. Lachi tsachila joto, jera michi talarachunae tie. 23 Junsi lachi tsachilaca nulachi tobi waqueca jun chide pele cuwenta sonba suwanae; junsi seque cuidaiyanae tie. Nula lachi jolajochunae tie. Miya Diosi tsantie.
Diosi lachi namaca Lo-ruhama mumun posa carie “Laquitituca joe” tito. Diosi yachi tsachilaca laquitituto quepoca jominhe yape casticailaisa. Junsi lachi naoca Lo-ammi mumun posa carie “Lachi tsachila itolajoe” tito. Israelítalari Diosichi tsachila iton ica jominlae. Tsan josanan, Miya Diosi man fiquinan pato, itsantie: Jun materi israelítalaca manaman laquitiyanae tie. Jun mate manaman lachi tsachila manjolajochunae tie. Junni yalari laca pato, chiquilachi Diosi joe latichunae tie.
Miya Diosi labe tsanque pae yape Israel tobi chumin israelítalabe manpasa.