Oseas chuteca jun pila
Oséachi sona, junsi nalala
1
La Oseas, Beérichi nao, in pilaca quinayoe. Miya Diosi labe itsanque pae yape weyan israelítalabe manpolarisa. Aman la Diosichi mantate pano mate Uzías, junsi Jotam, junsi Acaz, junsi Ezequías, yalari Judá tobi miyala jominlae. Junnasa Jeroboam, Joachi nao, Israel tobi miya jominhe. 2 Junni Miya Diosi labe casale pánato itsantie: Israel tobi chuminlari laca puracala joe tie. Sona manca seiton joto, yachi unilaca purato uyanlabe nenamin cuwenta, yalari laca puracala joe tie. Junni Diosi la Oséaca mantaquee seiton sonabe casalaito, nalala tasa, yape israelítala chiquilaca quirato miilaisa. Junni ya nalalari seiton sonachi nalala jolajochunae tie. Miya Diosiri laca tsanque mantaquee.3 Junnan lari Diblainchi nama Goméribe casalaiyoe. Junni ya sonari na wito, unila na quee. 4 Junni Miya Diosi labe itsantie: Ya náca Jezreel mumun polaquede! tie yape tsachila yaca quirato Jezreel tinun puebloca tenca calaquisa. (Aman “Jezreel” tito, “Diosi waqueca jun joe” tito tsantinun joe.) Aman Jehú Israel tobi miya jono mate, yari Jezreel tinun pueblobi chuminlaca duque seiton quica joe tie. Jun tenchi Jehuchi alicalaca moora casticaqueyanae tie. Junsi Israel tobi chuminlacanan duque casticaquito, nulachile nechi mantaca manjosoleyanae tie yape israelita mantaminlari nulachi tobi nantari mantalaquitusa. 5 Junto israelítalaca casticaquinato, nulachi soldadolaca querabi peleisa cariyanae tie. Jezreel pueblo contite quera quilaquinaminca peleisa cariyanae tie.
6 Junsi manaman Gomer na wito, sona na quee. Junni Diosi labe itsantie: Ya náca Lo-ruhama mumun polaquede! tie. (“Laquitituca” tito tsantinun joe.) Junni ya náca tsanque mumun polaquede! tie yape tsachila yaca quirato, Diosi Israel toca nantari laquitituchunaeque tenca calaquisa. La Diosi Israel toca laquitituto, jera iton suwanae tie. 7 Juntonan Judá tocari laquitino joyoe tie. Yalachi Miya Diosi joto, yalaca se lariyanae tie. Quera quilaquitusanan, flechachi nin espadachi quilaquitusanan, junsi soldadola quicaalaquitusanan, nin caluchi quicaabi jilaitusanan, yalaca se lariyanae tie.
8 Junsi Lo-ruhama cu finoca puraca jonunbi, Gomer manaman na wito, unila na quee. 9 In nete Miya Diosi labe itsantie: Ya náca Lo-ammi mumun polaquede! tie. (“Lo-ammi” tito, “Lachi tsachila itolajoe” tito tsantinun joe.) Junni ya náca tsanque mumun polaquede! tie yape tsachila yaca quirato, Diosi israelítalaca lachi itolajoe tichunaeque tenca calaquisa. Wari Israel tobi chuminlari lachi tsachila itolajoe tie; junnan wari lanan nulachi Diosi itoanae tie.
Diosi israelítalabe sen manjono jonunca
10 Junsi Diosi la Oséabe itsantie: Juntonan manca materi israelítalaca duque serasa cariyanae tie. Lamari dequelote mituntsancari tsalan tsoe; jun cuwenta israelítalaca duque serawoanae tie. Jun mate la Diosi israelítalaca lachi itolajoe tituanae tie. Manquiraque pato, israelítalaca la sonnamin Diosichi nalala jolajoe tiyanae tie. 11 Jun mate Judá tobi chuminlabe, Israel tobi chuminlabe, man junni manhito, jerale israelítala manca miyasiri talarachunae tie. Junto israelítalari jerale tote nechi Jerusalenca manlalaichunae tie. Jun mate jerale israelítalaca Jezreel tintsan jochunae; duque sonban jolajochunae tie Diosi waqueca jun chide pele cuwenta.