Miya Diosiri tsachilaca ayudaiyanae tinunca
55
Junni Diosiri itsantie: Tencabi pi muquinasa cuwenta jominlari pi cuchibi jalaide! tie. Aman cala itonlanan jalaide! tie. Pacara quituminnan, ano fichun canun cuwenta jochunae nulachi tenca Diosichi cale sen josa. Junsi bino, cupi ticatiya tsanle pacara quituminnan canun cuwenta sen jochunae. 2 Seiton ano tenchiri nulachi calaca cuwatulajona! Ano fitobinan ano camuquinasanan puraitori, ¿ti quichun pacara quiminlayun? La pánanunca seque merátori, nulachi tencabi sen ano fica cuwenta sen jolajochunae. Junsi mulun tsachicaca finun cuwentanan sen jolajochunae. 3 Junni lachica jato, tencabe meralaquede! Seque meránari, nulachi tencari sonnato polechunae. Lari nulabe numatotiya jeraitumin trato queyanae. Junni matu to miya Davica laquirato, yabe tuca pato, tsanqueyanae tica jomanyoe. Junni ya tratoca quinato, miya Davichi tenchi titiya queyanae tica junca, nulachi tenchi jera queyanae tie.4 Lari ya miyaca lachi testico suwanae yape duque tobi chuminlabe pasa; junsi mantamin suwanae duque tsachilaca micarisa. 5 Junni ya tratoca quinunbi, yari miratunun tsachila tilacatiya mantachunae. Yaca miratumin tsachila titiya yabe mantaibi jalaichunae. Lari israelítalachi sen Miya Diosi joto, yaca sen joe tito tsan josa cariyanae tie.
6 Junsi Miya Diosi itsantinae: Nulari laca neyalaquede! feno capodeintsan josanan. Laca otilatide! nulachi quelote carasanan. 7 Seiton tsachila, nula seitonque nenanunca telaquepolaquede! Jutsa quiminla, nula tenca cananunca telaquepoto, lachica manjalainari, lari nulaca laquiranae. Aman la nulachi Diosichica manjalainari, lari sen joto nulaca perdonaiyanae tinae. 8-9 Junni aman lari nula tenca canun cuwenta tenca catumin joyoe. Junsi nula titiya quinun cuwenta quitumin joyoe. Jana yoquidori duque animali jamobi joe. Junni jun tsanquenan la tenca cato quinunni nula tenca cato quinunca duque fe sen joe tinae. Aman Miya Diosi tsantinae.
10 Junsi Miya Diosiri itsantie: Jamochi nechi suwa patatori, jamochi manlotumanhe. Tote jera puraito, toca atasuwamanhe yape titiya waqueca junla seinan, manan manwaquechun ni josa, junsi yape ano fino duque josa. 11 Junni jun tsanquenan lachi fiqui paca junni epe itoe. Lachi niyan quisa tenjanatiya, jun tsannan quimin joe tie.
12 Diosi itsantie: Nula israelítalari duque bare tobi chularatotiya, manjato, pansi, son, nulachi tencachique toca manjalaichunae. Nula tencachique toca manjalainato, duque son tilatichunae. Aman jerale dula son tito canta quinun cuwenta, junsi jerale chide pele son tito tede didi quinun cuwenta, jochunae. 13 Junni aman jun materi epe tape jono jomin postote sen sipres tinun wa chide pelela jolajochunae. Junsi tini jono jomin postote sen arayán tinun chide pelela jolajochunae. Junni aman jeralela junca quiranato, la Miya Diosica se tilatichunae. Aman numasitiya yalaca quirato, la poden joeque mantenhintsan jochunae tie. Miya Diosi tsantie.