53
Miya Diosi, chiquila fiqui polarica junca tsachilari tennatuchi latichunae. Nu duque wepanato quirantsancari seque quinaminca quiratonan, tennatuchi latichunae. 2 Casaleri Miya Diosibe mantaimin tsachi epe jomintsan quiran jochunae epe tape fu tobi telenle quica jun cuwenta. Uraran itoto, quiratuntsan jochunae. Uyan tsachilanan quiranan jonijochunae. 3 Aman yacari tsachilari quiratuchi latichunae. Junto tsanle telaquepolaquinan, yari duque padeseimin unila jochunae. Munaratununca cuwenta quiratuchi ticaichunae. Epe tsachi joe tito, sen joeque tenhicaituchunae.4 Junni aman tsan josanan, yari chiquila quiyanpun jominca mansechun padeseito, chiquilachi fuda jominca mansechun duque fudaichunae. Chiquilari tenca cato, Diosiri fuda suwaca jonhoeque tenca cayaichunae. Junsi Diosi yaca casticaquinato tsanque padeseisa carinaeque tenca cayaichunae. 5 Juntonan tsan itochunae. Chiquila Diosica merátuchi tinun tenchi yacari tilelaquichunae. Chiquilachi jutsa tenchi yari padeseichunae; junsi yari casticaichunae yape chiquilari Diosibe manse patilaisa. Yari fudaica jonun tenchi chiquilari manseinola joyoe.
6 Junni chiquilari jeralela opisa cuwenta topiyalaiyoe manca manca chiquilachi tenca munate nenato. Juntonan Miya Diosiri chiquila jeralela tenchi yacasiri casticaquichunae.
7 Yaca seiton quilaquinasanan, paituto wantainiichunae. Junnan yacari opisa náca cuwenta totebi tanjilaichunae. Jana opisari fu porecanasa atituto tsoniramanhe; junni yari jun cuwenta beco patuchunae. 8 Yaca doto, seitonque pato totelaquichunae. Jun mate chuminla patuntsancari seitonla joto, yaca totelaquichunae. Lachi tsachilachi jutsa tenchi totelaquichunae. 9 Seitonlabe parejo menalaquichunae. Aman yari puyaca joto, oco tsachilabe parejo pejochunae. Juntonan yari numanan jutsa quituca jochunae; nin nene patuca jochunae.
10 Aman Miya Diosiri yaca tsanque padeseisa carino joyoe tinue. Yanan jutsa tenchi tenca mánta cuwaca jun cuwenta cuwapoito, numatotiya sonnato, yachi alica tsanlaca quirachunae. Junsi aman Miya Diosi ticatiya quino tenca canari, yari junca se losa carimin jochunae. 11 Aman yari tencabi duque duque padeseinun tenchi, uyanlari sen ilaichunae. Aman sen icala jonunca quirato, yari duque pansi jochunae. Junni Miyabe mantaimin tsachiri duque tsachilaca Diosichi cale sen jolajosa carichunae. Yari jun tsachilachi jutsa tenchi padeseica jun joto, tsan josa carichunae.
12 Jun tenchi Diosiri yaca duque duque mantá tan joe tito, quera quicaato fe lominlachi premio cuwanun cuwenta, yachi tsanquenan cuwachunae. Aman yacari seitonlabe man parejori joe latinasanan, yari duque tsachilachi jutsa tenchi padeseinachunae. Junto yari duque jutsa quimin tsachilachi tenchi Diosibe rocaichunae.