Miya Diosibe mantaimin tsachi
42
Diosi itsantie: Quiralaquede! Tsachi manca la wenteca jun joto labe mantaimin jochunae tie. Yaca laquirato se tiyanae tie. Lachi Tencaca ya tsachichibi wisa cariyanae. Junni ya tsachiri piyanle tote chuminlaca seque tuca mantachunae tie. 2 Junni ya tsachiri pataato epele patuchunae. Pueblobi paito paminla cuwenta itochunae. 3 Ya tsachiri cumana tenca tanlaca ayudaito, yalaca sonba tenca mansuwachunae. Jeralelaca tsa pato, sele mantachunae. 4 Yari peleituto tsantin nenato, jerale tote tuca mantamin miya ichunae. Jerale tobinan yachi mantaca tennalarachunae tie. Diosiri tsantie.5 Aman Miya Diosiri yoquido quinue yape jamobi josa. Junsi toca quito, jera tape, chide titiya jera quinue. Junto tsachilaca sonnasa carin, junsi titiya tote sonnaminlaca jasisa carimin joe. Junni ya Diosinan yabe mantaimin tsachibe itsantie: 6 La Miya Diosi joto, nuca wentecayoe tie. Nu duque seque nenaminca wentecayoe. Aman nuca cuidaito nuchise israelítalabe casan trato queyanae tie. Nu israelita itonlachi tenchi tseno cuwenta jochunae. 7 Caca itonlaca manquirasa carichunae; doraminlaca manlarisa carichunae. Nemente nenaminlaca tsenbi manlarichunae tie.
8 Lari Miya Diosi joyoe tie. Ya lachi mumun joe tie. Jerale tsachilari lacasiri se tinola joe. Uyan diosi joe tinunlaca se tisa carituanae. Lachi cale telenhinola joe; epe diosi moldelachi cale telenhisa carituanae tie.