Israelítala itsanque inola jonunca
40
Junni Diosi israelítalabe itsantinae: Lachi tsachilaca jamiminque palaquede! yape laqui polarilaquisa. 2 Jerusalenbi chuminlaca laquibe palaquede! tinae. Sonba pato, padeseino ma jeraica joe tilatide! tinae. Yalachi jutsaca perdonaica joe. Miya Diosi yalachi jera jutsa tenchi michi casticaquica joe tilatide! tinae.3 Tsachi manca niyanlanantiya chutunun postote sonba pato, itsanque payichunae: Miya Diosi jano jonun tenchi jera manseilaide! Chiquilachi Diosichi tenchi jun postote minuca mansenun cuwenta, jun tsanquenan nulachi tencabinan manseilaide! tichunae tinae. 4 Yape sen minu josa toca towano joe tichunae. Junsi araleno joe yape parejo ton josa. Duque du ton jominca urara parejo ton suwano joe. Jun cuwenta nulachi tencaca tsanquintsan joe tichunae tinae. 5 Ya tsachi jun tsantinunbi, la Miya Diosi nulachi micuwanae duque sen joto, poden joyoeque. Jerale tsachila layaito junca quiralaquichunae tinae. Miya Diosi patsanan pánae tsanhichunaeque.
6 Junni Miya Diosiri la Isaíabe pato, sonba pade! tie. Junni lari tica sonba pánanque panhayoe. Junni itsanque manpae: Itsanque sonba pade! tie: Jerale tsachila lapa cuwenta moora puyamin jolajochunae. Tsaracari mantá tan tsachila jotonan, lapa luli cuwenta moora jeraiminla jochunae. 7 Pata quinari, lapari moora jequeito puyamanhe. Lapa lulinan jequeito queereimanhe Miya Diosi sonban wu quisa carinari. Junni jerale tsachila jun lapa cuwenta jolajoe. 8 Lapa moora jequeito puyamanhe. Lapa lulinan jequeito queereiniimanhe. Chiquilachi Diosichi fiqui mantimini numatotiya joto polechunae. Diosi laca tsanque pasa tie.
Isaías manquiraquenan micarinunca
12 ¿Mo lamari pica tede contichi mino podeichunan? ¿Mo yoquidoca tedechi mino podeichunan? ¿Mo jerale tote jera to lucuca pemanca temisuchi layano podeichunan? ¿Mo duca romanachi mino podeichunan? Diosisiri tsanquino podeichunae. 13 ¿Mo Miya Diosica micarinquin? ¿Mo yaca mantucarinquin? 14 ¿Diosi mobe panhan? yape yaca payisa. ¿Mo Diosica micarito, seiton quituminnan titiya quisa tenca cano micarinquin? ¿Mo tsancari duque micarinquin? ¿Mo miramin suwanquin? Monantiya tsantue.
27 Nula israelítala, Jacóbochi alicala, ¿Ti quichun Miya Diosi chiquilaca tenhitue latinayun? ¿Ti quichun Diosi chiquilaca tennatuto se pataritue tilatinayun? 28 ¿Miya Diosi niyan jonunca miitolajoyun? ¿Yari niyan jonunca meraca itominlayun? Miya Diosi numasitiya jomin joe. Yari jera toca quica joe. Junto yari pepa itumin joe. Jera miramin joe. 29 Pepa ica junlaca mansonba suwamin joe; cumana jominlaca fe sonba mansuwamin joe. 30 Mosolanan pepa iminla joe; fe sonbanlanan cumana ito queereiminla joe. 31 Juntonan Miya Diosiri numasitiya yaca tenhiminlachi sonba mancuwamin joe yape titiya quino podeilaisa. Junnan parinqui cuwenta jamobi jajilaichunae. Sujilainaminnan, pepa itulajochunae; nenalarasanan, jasapiya jatuchunae.