Diosi Isaíaca yachi tenchi pasa tinunca
6
Junni Uzías miya jomin puyanun watate, la Isaías Miya Diosica quirayoe jamobi mantato chudinunbi chuminca. Uraran joe. Ya ponun tsanpari yachi ya jeralete lowarae. 2 Junnasa ya chunun jamole serafín tinun anjelila jajilainae. Junni yalaca quiranari, yalari manca cura sotaqui panpe chunla joe. Junto paluqui panpechi caforo doralarae, junsi paluqui panpechiri nedeca doralarae, junsi paluqui panpechi jajilainae. 3 Junni yala tala itsanque palaquinae: Sen, sen, sen, jera poden Miya Diosi. Jerale tote seque jera mantamin joe latinae.4 Junni yalari tsanque sonba pánasa, Diosichi yabi tamolan tutan wecaie, junsi nin poyo tuwainiie. 5 Junni lari tsanhinaminca quirato, itsantiyoe: ¿La popereri niyanhinan? Titiya jera quino poden Miya Diosica lachi cacachinan quirato, puyaichunae. Lari lachi fiquiforochi seitonque pamin joyoe; junsi tsanquenan seitonque paminlachi quitsabi chunyoe tiyoe.
6 La tsantinasanan, ya sotaqui panpe chun mancari, Diosichi ticatiya cuwanun mesabi nechi nin comaca tenasachi casi, lachica ja cachi jae. 7 Junsi ya nin comachi lachi fiquiforole tilicarie. Junto itsantie: Quirade! In nin comachi nuchi jutsaca piyarie, junsi Diosinan nuchi culpaca perdonaie tie.
8 Junni jun tsantinunbi Miya Diosi pánaminca meráyoe. Yari itsantie: ¿Moca ereyanan? ¿Mo chiquilachi tenchi jichunan? tie. Junni lari ya pánaminca meráto, itsantiyoe: La ina joyoe; junni laca erede! tiyoe. 9 Junni yari tsachila merátuchi timinla joeque mirato, la Isaíaca itsanque pasa mantaquee:
Nuri israelítalabe itsanque pade! tie. Nulari Diosichi fiquica jera merátonan, natiya seque miitunilajona! Quiratonan, natiya seque quiratunilajona! tide! tie. 10 Junni tsanque tsachilaca lachi fiquica pánato, yalaca tenca itonla cuwenta suwanachunae. Junni nu Isaías micarinato, yalaca meráno podeitonla, quirano podeitonla cuwenta, suwaniquede! tie. Tsanquede! yape yalari quirano podeiton, meráno podeiton, junsi entendeituminla cuwenta jolajosa. Tsanque podeiton suwade! tie yape labe cayaituto manseitunilajosa.
11 Junni Diosi tsanque panunsileri, lari Miya Diosi tito, ¿Numasi fecári tsan jochunan? tiyoe. Junni yari itsantie: Jerale puebloca jera yucapiyarino fecári, junni molanantiya jun pueblo yabi chutuno fecári, junto witalacanan jera telano fecári tsan jochunae tie. 12 Junni tsanque israelítalaca uyan toca nuwiri tanjilaisa carichinayoe tie yape nulachi tori quepoca jun josa. 13 Junte nechi chunca tsachilabi nechi pansile manca in tobi cachunari, yaca manaman casticaqueyanae tie. Junni tsan josanan, chide pele toleca cuwenta jochunae. Chide peleca tolenan, buturi puraimanhe. Junni jun butubi mansumanhe. Junto jun chide butubi mansunaca cuwenta lachi tsachila manan manseralaichunae tie. Tsanque Miya Diosi labe pae.
Judá toca pa junlari peleito telanola jonunca
Acaz Judá tobi miya josanan, Siria to soldadolabe Israel to soldadolabe jera layaito, Judá tobe quera quichun seinaminlanue. Junni Acaz duque jele tito chusanan, la Isaías yabe payoe jeleratunaque.