2 Junni jeralela meralaquede! Jamochi chuminla, tote chuminla, meralaquede! Miya Diosi nulabe itsanque pánae: Lari israelítalaca nalalaca cuwenta wa suwacayoe tinae uwan ino fecári. Junnasa yalari labe seiton icala joe tinae. 3 Aman walari tsacuminca mirae; junsi buro nun tsacuminchi cotonla jonuncanan mirae. Junnasa israelítalari lachi tsachila jotonan, laca miitonla, junsi entendeituminla jera icala joe tinae.

4 Junni Miya Diosi israelítalaca itsantinae: Nulari jutsa quiminla joto, seiton quinocasiri tenca punla joe. Junsi matu seiton quiminlachi alicalanan jolajoe. Junto nulanan seiton jera icala joe. Junni nulari Miya Diosica jera telacala joe. Junto nulachi jera sen Diosicanan puracala joe tinae.

5 Junni pansile manca tsachi yaca mantaminbe seiton inari, yaca duque asota quito casticaquichunae. Junni yari jun tsannasanan, duque seitonnan cajonari, nantanancari fe asota quichunae. Junsi yari jeralete fudaica jochunae yachi misubi, tencalate, pucalete. 6 Junni nulari jun cuwentanan jolajoe. Nedebi nechi misu fecári jera fudaito, tuwaca, junsi bichi chun cuwenta jera icala joe. Junni junca monantiya quiyananunte aseite poto, tsanpachi teleto, janpeca itolajoe.

7 Junsi nula chunun to molanantiya chutuntsan ica joe. Pa jominla nula chunun pueblolaca jera nin polaquee. Junsi nula waca juncanan jera filaquee. Uyan to tsachila nulachi toca jera yucapiyaricala joe tinae. 8 Junni Jerusalente Sion tinun dubiri senan cajoe. Juntonan Jerusalén pueblori uba witabi o melon witabi jelen yaca cuwenta isaituntsan ica joe. Junsi pa jun soldadolari puebloca jera awintaica cuwentanan joe tinae. 9 Miya Diosi chiquila israelítalabe tsantinae. Junni jera quino poden Miya Diosi pansile chiquilaca capuchutuca jomanpari, Sodoma, Gomorra puebloca Diosi yucapiyarino mate cuwenta jeraicala jono jomin joinhie.

10 Nula mantaminlari, Miya Diosichi fiquica seque meralaquede! Sodoma pueblobi mantamin jominla cuwenta seiton icala joe. Junto Miya Diosichi fiquica seque meralaquede! Junni jerale israelítala, meralaquede! Nulari Gomorra pueblobi chumin jominla cuwentanan jera seiton icala joe. Junto chiquilachi Diosi mantacaca meralaquede!

11 Junni Miya Diosiri nulabe itsantinae: ¿Ti quichun nulari tsancari opisaca lachi nin poto cuwachun tanjalainayun? Mulun animalilacachi seboca, junsi walachi, chibochi, opisachi asanca, tanjaminla joe. Junni tsanque ticatiya jera tanjalainasanan, lari amiica joto munaratiyoe tinae.

12 Nulari lachi cate jalainae. ¿Juntonan mo nulaca lachi selabi terebi wisa tin? tinae. 13 Junni Miya Diosiri itsantinae: Ya epe cosalaca lachi nantari tanjatulajona! Insienso lucu nin pocaca wari nantari wantaitiyoe tinae. Junsi nulari pe tsotso mate, jasaino mate, tsachilaca jera layaisa carito fiesta quimiyaminla joe lachi tenchi fiesta quilaquinayoe tito. Junni lari ya fiesta quinaminlaca nantari wantaitiyoe. Ya fiestalate seiton quiminla joe tinae. 14 Junsi lari pe tsotso mate fiesta quiminlaca pa joyoe. Nulachi duque wa sen fiesta tinunca pa joyoe. Nulari lachi cate epe tsanlaquinae. Junnan lari nantari wantaitiyoe.

15 Junsi nulari labe rocaichun tede jalitalaquinasanan, lari uyan nanchi quiramin joyoe nulaca quiratuchique. Junsi nisi rocailainasatiya, lari merátuanae. Nulari toteminla cuwenta icala joe. 16 Junni nulachi tencaca tsalenun cuwenta mancasilaquede! Junsi lachi cale jutsa quinoca deilaide! Seiton quinocanan deilaide! 17 Junsi sen quinoca miilaide! Seque quinonan duque tenfelaina! Junsi padeseinaminlacanan ayudailaina! Junsi apa iton nalalabe sen jolajona! Junsi biudalacanan seitonla pasuwalaquinari, ayudailaina! tinae.

18 Junsi Miya Diosi itsantinae: Nulachi jutsaca cuenta quichun jalaide! Nulachi jutsari nulachi tencabi duque luban cuwenta joe; junni tsan josatiya lari nulachi tencaca casito duque fiban mansuwanae. Nulachi jutsari lubaquin tsanpa cuwentanan joe; junni tsan jominca mancasito, nulachi tencaca fiban opisa fu cuwenta suwanae. 19 Junni nula laca laquirato obedeseilaitori, witabi sen icaca filaquichunae. 20 Juntonan nula laca laquiratuto, mantaituchi latinari, quera quicaanaminnan puyalaichunae. Monantiya ayudaituchunae tinae. Miya Diosi patsa tsantinae.