Miya David in salmo chutenue.
51
Diosi, nu laquiramin joto, laca laquirade!Aman nu duque laquirato, lachi culpaca piyaride!
2 Lachi tencabi seitonca tsalede!
Junsi lachi jutsaca caside!
3 La merán iton jomanyoeque mirayoe.
La jutsa quica jonunca pansino podeitiyoe.
4 Nuchi calesiri jutsa quicayoe.
Nu munaratunun seiton cosaca quicayoe.
Jun tenchi nu laca seitonunca panari, nuchi fiquica meráto, sen joe tino joyoe.
Tsanque tenhintsan jochunae nuri tsachilaca tuca miimin joeque.
5 La nainunle nechi seiton joyoe; tsa joe.
Lachi ayanchi pecolobi capominnan, jutsa pun jomanyoe.
6 Aman nu chiquilachi tencabi tsa seque tenca casa munarae.
Junsi nu lachi tencabi seque tenca tan suwaca joe.
7 Aman jana patelela animalilachi asanca cato, isopo tinun tapechi Diosichi yabi ti cosacatiya tsalemanhe;
Jun tsanquenan lachi tencaca tsalede!
Jun tsanquinari, lachi tencabi jera tsaleca joichunae.
Nu lachi tencaca tsalenari, duque duque fiban joichunae.
8 Junsi son joto, pansi josa caride!
Jutsa quinun tenchi nuri laca duque padeseisa carica joe.
Junni laca manan manson josa carinari, manseiichunae.
9 Jachicaide! lachi jutsaca tsanle quiratuchun.
Junsi seiton quica jonunca piyaride!
10 Miya Diosi, lachi tencaca casica josa tenjae.
Nube seque nenachun casan tenca cuwade!
11 Lachile nechi joqueituna!
Nuchi Tencaca manjosoletuna!
12 Matu se loca joyoeque tenhito, duque son jomanyoe.
Jun cuwentanan manan manson josa caride!
Junsi nuchi sen Tencaca lachibi sonba suwasa tenjae.
13 Tsanquinari, aman nuca merátuchi timinlaca nuchi minuca micariyanae.
Junnan yalachi jutsaca purato nuchica manjalaichunae.
14 Diosi, nuri laca se larimin joto, seque nenachun ayudaide! mocanantiya totetuchun.
Tsanque nenato, nuca cantaquito, seque mantamin joe tito cantaqueyanae.
15 Miya Diosi, nuca pato, se tisa caride!
16 Nu ticatiya epe cuwasa munaratue.
Animalilaca nin poto cuwasa munaratue.
Tsanlaca munaramin jomanpari, cuwaca jono jomin joinhie.
Juntonan, nuri tsanlaca munaratumin joe.
17 Aman nuri, nuchi tsachilaca jutsa tenchi laqui tenca jolajosa munaramin joe.
Junsi jutsa quiyoeque laqui jominlaca nu merámin joe.