Corechi naola in salmo chutelaquinue.
49
Jerale tote chumin tsachila, inca meralaquede!2 Oco tsachila, poperela, mantaminla, mantaiminla, meralaquede!
3 Duque sen fiqui pachinayoe.
Miranun fiquica tenca cato pachinayoe.
4 Entendeino tenfe fiquica meráchinayoe.
Arpa quinato, tenfe fiquica canta quechinayoe.
5 Aman tenfe ma josatiya, lari natiya jeleratuanae.
Junsi laca pa jominla seiton quichun layailainasanan, la jeleratuanae.
6 Aman weyan tsachilari calaca, junsi yala tanun cosalacasiri, tennaminla joe.
Junsi oco joto, ti cosacatiya quiniqueyanaeque tenca caminla joe.
7 Junni yala tsanque tenca canatonan, uyan tsachilachi tencaca se larino podeilaituchunae.
Monantiya Diosichi pacara quino podeilaituchunae tsachilaca se larisa.
8 Junsi tsachila puyatusa, cala cuwano podeituntsan joe.
9 Aman nisi cala cuwanatotiya, numatotiya puyatuto poleno podeituntsan joe.
10 Jerale tsachila jun tsanquenan puyaminla joe.
Duque tenca tan tsachila, tenca iton tsachila cuwentanan puyaminla joe.
Yalachi calaca uyan tsachilachi puraminla joe.
11 Yalari yalachi yaca numatotiya chuto polechunaeque tenca caminla joe.
Yalachi yaca numanan arajituchunaeque tenca caminla joe.
Jun tenchi yalachi toca yalachi mumunca mumun pominla joe yala puyaca josanan tsachila yalaca mantenhilaisa.
12 Juntonan epesiri joe.
Duque oco tsachi jomin josatiya, numatotiya yaca mantenhito polelaituchunae.
Animalila cuwenta puyaniiminla joe.
13 Tsanque tenca cato nenaminla tenca iton jolajoe.
Tsan josanan, yalachi nalala, nietola, yala paca fiquica duque tenca oco fiqui jominue timinla joe.
14 Opisa tsacumin opisaca suponan, cotonlabi manfamanhe.
Jun cuwenta supoito, fe joyoeque tenca caminlari puyacalachi postobi felaichunae.
Aman jeralela mansonhino mate senlari seitonlaca fe lolaichunae.
Junsi seitonla moso jominla jotonan, puyacalachi postobi moso itolajochunae.
15 Aman la mantimini tsanhino itoyoe; la puyanari, Diosi laca se larichunae.
Junsi ya chunun postoca laca tanjichunae.
16 Jun tenchi tsachila oco inaminlaca quirato wepanatulajona!
Junsi sen cosa fe cade cade jinaminlaca quirato, tennalaratuna!
17 Aman ya oco tsachila puyatori, tinantiya tanjino podeilaituchunae.
Puyacalachi postote ya sen cosalaca tano podeilaituchunae.
18 Aman oco tsachilari in tote chuto pansi, son tenhiminla joe.
Junsi tsachila yaca oco jonan duque se timinla joe.
19 Juntonan ya tsachichi puyano ma fachunae.
Junni puyatobi tseinaminca nantari quiratuchunae.
20 Tenca calaquede! Duque respetainun tsachila jotonan, seque tenca tan itotori,
Tsanle puyamin animalila cuwentanan jolajoe.