Miya David in salmo chutenue.
34
Miya Diosica piyanle órate se tiyanae.Numasitiya lachi fiqui forochi Diosica se tiyanae.
2 Miya Diosichi tenchi lachi tenca duque son joe.
Aman fe joyoeque tenca catuminlanan in fiquica meráto duque son jolajochunae.
3 Junsi jeralela man junnique pato se tilatisa!
Junto Miya Diosi nisi poden jonunca palaquisa!
4 Miya Diosibe rocainan, yari laca meraé.
Junsi yari la jeleranunca piyarito, jeleratumin suwae.
5 Aman Miya Diosica tennaminlari duque son caforo ilainue.
Yaca tennaminla joto, numanan luilaitunue.
6 Aman lari duque padeseinato, Miya Diosibe rocaiyoe.
Junni Diosiri laca meráto, laqui itosa carie.
7 Miya Diosichi anjelilari Diosica respetaito jeleraminlaca se larin,
Junsi isain, iminla joe.
8 Miya Diosi sen jonunca miichun, meráto quiralaquede!
Yaca tennaminlari pansi jolajochunae.
9 Miya Diosichi cuwapoica junlari, yaca respetailaina!
Aman yaca respetaiminlachiri tinantiya falta itochunae.
10 Aman luquelari sonban jotonan, duque ano muquin pasaimanhe.
Tsan josanan Miya Diosichibi quelo feminlari ti sen cosanantiya falta itosa nenalarachunae.
11 Lachi nalala, jato meralaquede!
Miya Diosica respetaito jelerano micariyanae.
12 ¿Duque wata sonnano munaralarayun?
¿Numari fecári pansi sonnano munaralarayun?
13 Tsan jonari, seitonque patun,
Junsi nene patun, jolajona!
14 Junsi seiton quituto, sencari laquiralarana!
Paito quicaato chularatuna!
15 Aman Miya Diosiri senlacari cuidaimin joe.
Junsi yabe rocainan, merámin joe.
16 Miya Diosiri seiton quiminlaca pa joe.
Yari jerale seitonlaca paito jerachunae yape tsachila jun seitonlaca mantenhilaitusa.
17 Sen tsachila rocainan, Miya Diosiri merámin joe.
Junsi problema tano matenan ayudaimin joe.
18 Aman tsachilari duque duque laqui joto,
Yalari ti cosatiya seitonquesiri joeque tenca canasanan,
Miya Diosiri quelole rae ayudaichun.
19 Aman sen tsachi duque problema tasanan,
Miya Diosiri jera problemaca fe losa ayudaimin joe.
20 Diosiri ya tsachichi pucabi man chidenantiya colelaquitusa
Cuidaimin joe.
21 Aman seitonlari seiton jocachiri puyaminla joe.
Seque nenaminlacanan quiratuchi latinari, Diosi yalaca casticaquichunae.
22 Miya Diosiri yabe mantaiminlaca puyatusa se larimin joe.
Yaca tennaminlacari casticaquituchunae.