Miya David in salmo chutenue.
32
Jutsa perdonaica jun tsachilari duque son jolajochunae.Aman culpa tanunca Diosi jera perdonaica jonari, duque son jolajochunae.
2 Miya Diosi culpa quica iton tsachilanan son jolajochunae.
Junsi tencabi seiton quin, nene pan, quino munaratumin tsachilanan duque son jolajochunae.
3 La matu jutsa quitumanyoe timin jomanyoe.
Junsi tsanque pánatonan, fudachi waredede nenamanyoe.
Junsi aman nantanancari quiyanpun ide ide jinamanyoe.
4 Junto Diosi, nuri laca quepen, malon casticaquinaminhe.
Aman jana fu mate wa pata quinan luli jequeimanhe; jun cuwenta lari nantanancari cumana ide cumana ide jinamanyoe.
5 Junto aman lachi tencabi itsantiyoe: Miya Diosi, nube lachi jutsaca jera pánae.
Junsi aman ti seiton quica jonuncatiya luratuto paniquiyoe.
Jun tsantinan, nuri lachi jutsaca jera perdonaica joe.
6 Jun tenchi nuchi tsachilari nuberi rocailaichunae nu meráno jun órate.
Tsachila duque wa problema tanari, duque pilu fato yachi ya fecári fanun cuwenta jochunae.
Juntonan nuca tennaminlachibiri numanan fatuchunae.
7 Diosi, lari problema tatori, nuchica jimin joyoe.
Junnan nuri la wepananasa cuidaimin joe.
Junto nuchi tsachila lachi awinta layaito canta quilaquichunae Diosi se larica joeque.
8 Miya Diosi itsantinae: Nuca entendeisa cariyanae tinae.
Nu nenano jun minuca micuwato, nuca seque cuidaiyanae tinae.
9 Aman calula, junsi mulala, animali joto entendeino podeituminla joe.
Junto freno o sili itonari, quelo jasa carino podeituntsan joe.
Nuri ya animalila cuwenta itona!
10 Aman seitonlari duque padeseito fuda pasailaichunae.
Juntonan Miya Diosiri yaca tennaminlacari duque laquirae.
11 Jun tenchi sen tsachila, Miya Diosica son tito, pansi jolajode!
Jerale sen tenca tanla, son tito canta quilaquede!