Elifaz panunca
4
Job tsantinunbi, Elifaz, Temán tobi nechi jamin tsachi, itsanque panue:2 Lachi tencari nuri uyanla motiya palaquinari, paichunae tenjae;
Juntonan lari nube titiya nasi pano joyoe.
Patuca jun jono podeitiyoe.
3 Nuri duque uyanlaca niyaque nenano jonunca micarimin jominhe tinue.
Junsi pele tenca jominlachi tencaca sonba tenca mansuwamin jominhe tinue.
4 Pansile motiya problemabe padeseinari, nuri manse patarimin jominhe tinue.
Junsi aman cumana tenca tanca nuri ayudaimin jominhe tinue.
5 Junni tsanque uyanla niyantiya inaminlaca ayudaimin jotori,
¿Niyaito nunan padeseinatori sonban tenca jono podeitiyun?
¿Niyaito nunan pele jono patíyun?
6 Nuri Diosica duque respetaito, wepanatuto chuyoe timin jominhe.
Diosibe seque nenamin joto, nuchi cosa se patichunae timin jominhe.
Tsan jotori, ¿amanari niyaito Diosica seque tennano podeitiyun?
7 Junni meráde! Tsachi manca niyaquetiya culpa itotori, numanan tsanque padeseituchunae.
Nunan tenca cade! sen tsachi tsanque padeseino itonunca.
8 Duque uyan tsachilaca quiramin joyoe.
Junni yalaca quirato, itsanque quiramin joyoe tinue:
Seiton quiminla, junsi jutsa quiminlasiri tsanque padeseiminla joe yala seiton jutsa quinun tenchi.
9 Diosiri seiton quiminlaca paito totemin joe.
Diosi yalaca jera yucapiyarimin joe tinue.