Nehemías 8

Diosichi mantá pilaca quiralaquinunca

Jerale israelítalari Pi Tamolan catenle jera layailaie. Esdrari, Diosichi mantaca micarimin, junte pejominhe. Junni aman tsanque layaicala joto, Esdrabe pato, Diosichi mantá pilaca tanjade! latie. Ya pilaca Miya Diosiri Moisebe jera paca jominue yape Moiseri jerale israelítalabe pasa. 2 Junsi aman tsanque layaino ma, wata wicale nechi siete pe inasa, caque ma jominhe. Junni Esdras patele joto, Diosichi mantá pilaca cato, israelítala layaica jun postoca tanjae. Aman junte layaica junlari unilala, sonala, junsi seque tenca cano poden nalan nalanla jominlanue. 3 Junni Esdrari junte layaica junlachi cale Diosichi mantá pilaca quepenanle nechi yotu fecári pila quirae.

Junni Esdras pila quiranaminca jerale israelítalari seque meránaminlae. 4 Aman Esdrari cutapeca jamobile lowa quica junbi wiruraminhe. Yachi tsa nanchi pewiruraminlari Matatías, Sema, Anías, Urías, Hilcías, junsi Maasías; aman jala nanchi wiruraminlari Pedaías, Misael, Malaquías, Hasum, Hasbadana, Zacarías, junsi Mesulam jominlae. 5 Junni jeralela quiralaquinasa, Esdrari junte jamobile wirurato, Diosichi Pilaca quirachun lasie. Junto aman Diosichi Pilaca lasinasaleri, israelítalari jera seque meránaminlae. 6 Junni aman Esdrari ticatiya jera quino poden Miya Diosica se tinasa, aman jerale israelítalari tedeca jamochi jalitato, tsa joe, tsa joe tilatie. Junni tsantitobi, aman jeralela telenhito, tobi mutsaito Miya Diosica se tilatie.

7 Aman junte weyan lebitala pejominlae. Jesúa, Bani, Serebías, Jamín, Acub, Sabetai, Hodías, Maasías, Kelita, Azarías, Josabed, Hanán, junsi Pelaía pelayaica jominlae. Junni yalari Diosichi mantá pila micarilaquinue yape tsachila entendeilaisa. Junnasa tsachilari seque meráto, wiruraminlae. 8 Junni lebitalari Diosichi mantá pilaca tuca pato pila quirato seque micarilaquee yape jeralelanan meráto seque entendeilaisa.

9 Junni aman israelítalari Diosichi mantá pilaca meráto, jeralela laquiito warelaquee yalari jun pilabe seque mantaitumin jolajoyoe tito. Juntonan labe, Esdrabe, junsi lebitalabenan, warenaminlaca payilaquiyoe. (Aman la Nehemías cobernadori jomanyoe; Esdrari patele joto Diosichi Pilaca micarimin jominhe; junsi lebitalanan Diosichi Pilaca micarimin jominlae.) Junni aman chiquilari ya israelítalaca laqui itolajode! tilatiyoe. Junsi warelaquitude! tilatiyoe. Wareno itolajoe. In materi chiquilachi Miya Diosichi cale sen fiesta quino ma joe tilatiyoe. 10 Junsi itsantiyoe: Ano fibi jilaide! Fe sen anoca filaquina! Junsi pinban bino cuchin quelaquede! tiyoe. Junsi aman ano fino itonlachi ano fisa erelaquede! tiyoe. Aman in materi chiquilachi Miya Diosichi cale sen fiesta quino ma joe tiyoe. Laqui itolajode! Miya Diosichi tenchi pansi jolajonari, yanan chiquilaca isaichunae tiyoe.

11 Junsi lebitalanan tsachilaca laquiito warelaquitusa payilaquee. In materi Miya Diosichi cale sen fiesta quino ma joe latie. 12 Junni aman jerale israelítalari ano fin, titiya cuchin, quebi jilaie. Junsi ano fino itonlachinan ano fisa erelaquee. Tsanque wa fiesta quito, Miya Diosichi mantá pila micaricaca seque entendeilaito, duque son tilatiyoe.

Jelen ya quilaquinunca

13 Junni aman ayuna nanchi jerale israelita mantaminlari Diosichi mantá pilaca fécari entendeichun Esdrabe pelayailaie. Aman Esdrari micarimin jominhe. Junni junte pelayaica junlari israelita patelela, lebitala, junsi familia cura mantá tanla jominlae. 14 Aman Diosichi Pilaca miinato, Miya Diosiri Moisebe itsanque israelítalabe manpasa mantaca jonunca felaiyoe. Wata cura jun pete israelítala tsanque Diosichi cale fiesta quilaquinato, chunun yate nechi uyanchi lolaito, fiesta jeraicari jelen ya quito chuno joeque chuteca jominue. 15 Jerusalenbi, junsi jerale uyan pueblobi, fiqui polarintsan jominue du minu jito ali calaquisa jelen ya quichun. Tsa olibo ali, jelen olibo ali, arayán ali, junsi titiya uyan chide ali tsanlaca cato, jelen ya quinola joeque chuteca jominue Diosichi mantá pilabi.

16 Junni Esdralari jun fiquica Diosichi Pilabi quirato, jeralela ya fiquica obedeseito, tiletiya jelen ya nacála quilaquee. Yalachi selate, ya jamobi, Diosichi yabi wiruinun postolate, Pi Tamolan tinun quelote, junsi Efraínchi Tamolan tinun quelote tiletiya jelen ya jera quilaquee. 17 Junni aman jerale israelítala uyanchi nechi yalachi toca manjaca junla, titiya jelen ya quilaquee. Junni fiesta ma poleno fecári jun jelen yabi chuminlayoe. Nun tinunchi nao Josué sonnano male nechi jun ma fecári tsanque fiesta mate jelen ya quinoca jera puraca jominlanue. Junni aman jelen ya fiesta quito, jeralela duque son jominlayoe. 18 Junni Diosichi cale siete ma fecári ya fiesta quilaquiyoe. Junni Esdrari ma cura Diosichi mantá chuteca jun pilaca quirato pánaminhe. Junni aman debi ma ochu ma josa, Diosichi cosalaca fécari duque tenca cachun manaman layailaiyoe. Tsanque chiquilachi mi jominhe.