Israelítala miya tano munaranunca
8
Junni Samuéliri unica joto, yachi naolaca israelítalaca mantamin suwanue. 2 Junni unica naori Joel mumun jominue; junsi jun benete naori Abías. Junto yalari Beerseba tinun pueblobi mantamin jominlanue. 3 Junni Samuélichi naola mantimini Samuel cuwenta itoto, duque fe jochi tito, duque calaca muna pun jominlanue. Cala cato, culpa tanlaca sen joe timin jominlanue. Junto yalari se mantalaquitunue. 4 Junnan jerale israelita mantaminla layaito, Ramaca jilainue Samuélibe pabi. 5 Junsi Samuélibe itsanlatinue:—Nuri wari unica joe. Junsi nuchi nalalanan nu cuwenta itolajoe. Junni Samuel, nu miya manca suwade! yape chiquilaca seque mantasa. Aman jerale tsachi bolonla miya talarae; junni chiquilanan jun tsanquenan miya munaralarayoe latinue.
6 Junni israelítalari Miya manca suwade! tinaminlanue yape yalaca mantasa. Junni Samuel yaca munaratuto, Miya Diosibe rocainasa, 7 Miya Diosi Samuélibe pato itsantinue: Yala pánanunca meraniquede! Nuca munaratiyoe timin tsanni latinae; juntonan laca tsanlatinae lari yalaca mantatusa munaralarae. 8 Junni la yalaca Egíptobi nechi laricale nechi amana fecári jun tsannan jolajoe. Nuca niyaque seiton tilatinato, lacanan jun tsanquenan tinaminlae tinue. Laca telato, uyan diosi tinunlaca se timinla joe tinue. 9 Junni yala pánanunca meraniquede! Juntonan yalabe itsanque duque sonba fiqui pade! tinue. Ya miya yalaca mantanato duque sonbaque mantachunaeque pade! tinue.
10 Junni Samuéliri Miya Diosi paca junca jerale miya suwasa tinamin israelítalabe manpolarito, 11 itsantinue:
—Miya jotori, yachi calu muricanun carobi jinasa, yaca cuidaimin soldadolanan uyan carobi, o calubi chudito, pejinola jochunae. Junni nula miya talaranunbi, yari nulachi naolaca jasa carito, jun soldadola suwachunae tinue. 12 Junsi weyanlaca mili soldadolaca mantamin suwan, o mante chunca soldadolaca mantamin suwan, quichunae. Junto nula weyanlaca yachi toca trabajaquisa carichun tanjichunae; junsi weyanlaca quera quicaanun caro quin, lansa, flecha tsanla quin, quisa carichunae. 13 Junsi nulachi namalacanan pejisa carichunae yachi puban pi quin, bibu quin, ano daquin, quebi. 14 Junsi nulachi fe sen toca cato, uba witaca, olibo witaca can, quito, yachi tenchi mantaminlachi cuwachunae tinue.
15 Junsi waca junlaca mancanato, patsa quintali cato chunca quintalica yachi mancuwano jochunae. Junsi ubaca jun tsannan quino jochunae tinue yape yachi tenchi mantaminlachi mancuwasa. 16 Junsi nulachi fe sen peyunlaca, mosolaca, burolacanan cato, yachi tenchi trabajaquisa carichunae. 17 Junni nulari patsa wala, patsa opisa talaratori, patsabi chuncaca yachi cuwanola jochunae. Junsi nula jeralela yachi tenchi trabajaquino patilaichunae tinue. 18 Junto nula manca mate duque padeseito, miya duque trabajaquisa carinae tito, Miya Diosibe duque sonba panhalaquichunae. Tsannan yari nulaca merátuchunae tinue.
19 Junnan israelítalari Samuel pánaminca meráto, yape josa! tito, beco manpato, chiquila miya tano munaralarayoe latinue. 20 Uyan tobi cuwenta chiquilanan miya tano munaralarayoe yape chiquilaca mantaquin, junsi quera quicaabi jimiyasa.
21 Junni Samuéliri israelítala tsanque palaquinunca meráto, Miya Diosibe jera manpolarinue. 22 Junnan Miya Diosi Samuélibe pato, Yala munarato tsanlatinari, yalachi tenchi miya suwade! tinue. Junsi Samuéliri israelítalaca pueblolaca manjisa tito, ya cura manjinilaide! tinue. Lari miya wenteto suwanae tinue.