Manse lariminla 7

Aman Jerobaal (ya Gedeón mumun joe) junsi jerale yabe pejominlari quepenan wiruito, Harod tinun pi bulananun minu jito, junte weyan ma fecári chuminlanue. Junnasa madianítalari yalachite nechi fe nan tala jominlanue More tinun du conti minu. 2 Junni Gedeónlari junte chularasanan, Miya Diosiri Gedeonbe itsantinue: Nube jaca jun tsachilari polencari duque jolajoe tinue. Lari nulaca madianítalabe quera quicaato fe losa carinari, ya israelítalari yalachi sonbabenan fe lolaiyoe tilatichunae. La ayudainasa fe lolaiyoeque tenhilaituchunae. Junto yalari sonba jolajoyoe tilatichunae tinue. 3 Junni yape tsantilatitusa, weyanlacari yalachi yaca jera manhereniquede! tinue. Junto aman jeralelabe itsantide! Mochi mochi quera quino jelelaquinatiya, manjinilaide! tide! tinue.

Junni Gedeón tsantinan, palu chunca palu mili israelítalari yalachi yaca jera manjilainue. Aman chunca milisiri Gedeonbe purailainue. 4 Junni aman Miya Diosiri Gedeonbe manan itsanque panue: Polencari duque tsachila cajolajoe tinue. Junto aman yalaca pica tanjide! yape pi cuchilaquisa. Junni junte lari micuwanae tinue mo mo nube pejinola jonunca, junsi mo mo pejinola itonunca.

5 Junni aman Gedeonni ya chunca mili tsachilaca pi cuchilaquisa tanjinue. Junni aman Miya Diosiri itsantinue: Aman weyanlari pi cuchinato, tedechi pi casi casi fiquiforobi pocalaquichunae. Manan weyanlari pibinan mutsaito pi cuchilaquichunae. Junni nuri yalaca niyaque pi cuchilaquinunca quirato, palu bolon suwade! tinue.

6 Junni aman tedechi pi cato cuchiminlari peman patsari jominlanue. Junte nechi jeralela pibi mutsaito cuchilaquinue.

7 Junni aman Miya Diosiri Gedeonbe itsantinue: Lari in peman patsalaberi jerale israelítalaca manse larichinayoe tinue. Lachi sonbaberi nulari nasiri jotonan, madianítalaca fe lonola jochunae. Weyanlari yalachi yaca jera manjinola joe tinue.

8 Junni aman weyan duque israelítalaca yalachi yaca jera manherenue. Juntonan yala manjinaminlachi anoca, junsi yalachi tutuca, jera calaquinue. Junni aman Gedeonni yachi peman patsa israelítalabe, madianítala ranunte nechi dubi jominlanue.

9 Junni aman jun quepen Miya Diosiri Gedeonbe cuenta quito itsantinue: Wiruito madianítala ranunte quiracabi jide! tinue. Lari fe losa cariyanae tinue. 10 Juntonan nuri cajeleratori, nuchi peon Fúrabe jito, 11 madianítala niyan tilatinanunca meralaquede! tinue. Junto yala niyantiya tinaminlaca meráto, nulari fe sonba tenca ilaichunae tinue.

Junni aman Gedeonbe Fúrabe madianítala ranunte quelo féto meralaquinue. 12 Junni aman madianítalabe amalecítalabe, junsi uyanla junchi chuminlabe layaito, duque layan puna talulu cuwenta jominlanue. Junsi aman yalari duque duque cameyo taminlanue. Yalaca jera mito quiranari, lamari pi fiquile tsalan ni tsominca mito quiranan tsancari jono jonhoe. Jaatsancari duque animali jominlanue. 13 Junni aman Gedeonbe yachi peyunberi nosasa jito duque quelole jilainue. Junnasa madianita soldado yachi quipica junca mancabe itsanque cuenta quinaminue:

—Chiquilari tsanquenan inte layaica jocaimannue. Junnasa quiranari du minu nechi sebadaca quica jun bibu manca elanpola jato, jali yabi icaie. Junni jun jali yari jera arajito queereie tinue.

14 Junni aman manca soldadori junca meráto itsantinue:

—Yari ti jonunca tenhito natiya tenfe itoe tinue. Ya sebadaca quica jun biburi Gedeonla jolajochunae. Diosiri yalaca feisa carinan, chiquila madianítalaca fe loto, chiquila titiya tanunca jera josolelaquichunae tinue.

15 Junni Gedeónlari yala paluca soldadola tsanque cuenta quinaminlaca meráto, Miya Diosica duque se tito manjalainue. Junto aman weyan israelítala catson tsonunte manjato, yalabe itsantinue:

—Mansonhilaide! Miya Diosiri chiquilabe ayudaito madianítalaca feisa carichunae tinue. Madianítalaca feino jolajoyoe tinue.

16 Junni ya peman patsa israelítala mansonhinunsi, Gedeonni yalaca peman bolon suwanue. Bolon cura patsa patsa suwanue. Junsi jun bolonbi jeralelachi tseno pun to nida manca manca cuwanue. Junsi jeralelachi tutu mande mande cuwanue. 17 Junsi aman Gedeonni itsantinue:

—Lari madianítalachi quelo fecári jichinayoe. Junni lari junbi fenari, ticatiya niyan quinaminca quirato, nulari jun tsannan quilaquina! tinue. 18 La, junsi labe pejominla, tutu quilaquinunsi, nulanan tutu quilaquina! tinue. Madianítalachi awinta jera wirurato, tutu quilaquina! tinue. Junto aman tsanque tutu quinato, jeralela itsanque sonba otilatina! tinue: Miya Diosichi tenchi, junsi Gedeonchi tenchi quilaquinayoe tilatina! tinue.

19 Junni aman Gedeonbe pejomin patsa israelítalabe quepen tala die tsansite madianítalachibi felainue. Aman Gedeonla nosa jalainasa, weyan madianítalari quirato wiruraminnan manjinaminlanue; weyanlaman quirato wiruibi jinaminlanue. Junni madianítalari tsanque manjin, manjan, ilainasanan, Gedeónlari tutu quin, to nidaca jera bolen, quilaquinue. 20 Junto peman bolon israelítalanan man junni jera tutu quin, to nidaca jera bolen, quilaquinue yape tseno jera quirasaisa. Jala tedebi tseno tato, tsa tedebi tutu taminlanue. Junni aman jeralela itsanque sonba otilatinue: Miya Diosichi tenchi, junsi Gedeonchi tenchi, quera quicaalaquisa! tilatinue.

21 Junni aman israelítalari tsanque sonba otisiri, tsenoca chumi jun wiruraniraminlanue. Junnasa aman madianítalari tsanque otinunca merán, junsi tsenoca quiran, quito jelechi arara jera mansujilainue. 22 Junni madianítalari tsanque jera sujilainasa, israelítalari tutu caquinaminlanue. Junni aman Miya Diosiri madianítalaca misubi jera palaisa carinan, yala talanan quera quicaalaquinue. Junto tsanque jera palaica junla Zerera minuse Betsita tinun fecári, junsi Abelmehola tinun to fecári, sujilainue Tabat tinun postote.