19
14 Moisés Diosichi fiquica camicarinato, itsantinue: Nulari Miya Diosi cuwaca jun tobi chubi wisi, lindero quilaquichunae. Junni wanbile ya lindero quica junca natiya poletuto respetailaina! tinue yape nulachi quelote chuminlari michi to talarasa. 15 Junsi manca tsachiri mancaca niyaquetiya seiton quee tinasa, mancasiri testico jonari, culpa tae tituntsan jochunae. Paluca o pemanca testico jonari, culpa tae tintsan jochunae tinue.16 Pansile seiton tsachi manca jochunae. Yari nene pato testico ichunae. Seiton quica joeque nene pachunae. Junni nene joeque tenhitori, 17 palu nanchinan Miya Diosichi cate janola jochunae. Patelelachi catenan, junsi jun malate mantaminlachi catenan, janola jochunae. 18 Junni mantaminlari jera panhalaquichunae seque miichique tsanan seiton quica jonunca. Junni nene josanan tsantica jonari, 19 nene pamin tsachica casticaquino patichunae. Ti seiton quica jonun tenchi casticaino jonuncatiya, ya nene pamin tsachiri jun tsanquenan casticaino jochunae. Yaca tsanque casticaquinato, nulachite nechi seiton jonunca larilaquichunae. 20 Junni uyan israelítalari tsanque casticaica jonunca meralaquito, yalari nene pano jeleralarachunae.
21 Junni tsachi manca, manca tsachica totenari, yacanan totentsan jochunae. Tsachi manca, manca tsachichi cacaca larinari, ya lariminchi cacacanan larintsan jochunae. Tefunca balenari, baleminchicanan balentsan jochunae. O mancachi tedeca o nedeca yucapiyarica jonari, yaca jun tsannan quintsan jochunae tedeca, junsi nedecanan. Tsanque culpa patiminlaca laquiratuto casticaquiniquintsan jochunae tinue.