9
Israelítala, meralaquede! tinue. Nula Jordán pica poleno óra fae. Junsi junte chumin tsachilabe quera quicaanola joe ya toca josoleto tsacumin ichun. Ya tsachilari nulaca fe jelelen, junsi fe duque jolajoe. Yalachi pueblola wa pueblo jolajoe; duque jamobi wa serica quica jun jolajoe. 2 Junte chuminlari jelelen uwan jolajoe. Anácari duque uwan tsachi jominue; yachi alicala jolajoe. Tsachilari sonban soldadolaca pato, itsantiminlae: Monantiya Anácachi alicalaca fe lono podeilaituchunae timinlae. Junni nulari ya tsachilabenan quicaano jolajoe.3 Nulari miranola joe nulachi Miya Diosi nulabe pequichunaeque. Yari sonban nin jera nin pomin cuwenta joe. Yari ya tsachilaca jera yucapiyarito, yachi cate tinantiya itolajoeque miisa carichunae. Junni nulari moora fe losi, ya tsachilaca jun tobi nechi larinola jochunae. Miya Diosi jun tsanqueyanae tica jominue. 4 Miya Diosi ya tsachilaca nula chuno jonun tote nechi larito erechunae. Junni yala lonunbi, nulachi tenca munate pato itsantitulajona! Miya Diosi chiquila duque sen jonan, ya tsachilaca larito ya toca chiquilachi cuwae titulajona! Miya Diosiri nula sen jonan ya tsachilaca larituchunae; ya tsachilari duque seitonla jonan larichunae tinue.