Caín Abélica totenunca
4
Junni junbi nechi lotobi, Evari Adanbe oito, na wito, yachi caque unila na quinue. Junni Evari Miya Diosi chiquechi nao cuwae tito, ya náca Caín mumun ponue. 2 Junni nanni wanbi manaman na quinue. Ya nácari Abel mumun polaquinue. Junni ya paluca acola uwaito, Abel opisa cuidaimin jominue. Caínni wita quimin jominue.3 Junni aman man nete Caín Miya Diosichi ticatiya tanjanue. Ya wacaca jera cato, ya cayaca Diosichi ofrenda nasi tanjanue. 4 Abélinan Miya Diosichi ofrenda tanjanue. Opisa nalala tala caque na fe senca tanjanue. Junnan Miya Diosiri Abélica son tito quiranue junsi yachi ofrendacanan. 5 Juntonan Caínchi ofrendacari se titunue. Junni Caínni paito, pa caforo inue. 6 Junnan Miya Diosiri itsantinue:
—¿Niyaito tsancari pa joyun? ¿Ti quichun pa caforo ica joyun? 7 Seque quitori, son jono jomin jonhoe tinue. Juntonan seque quitumin joe. Tsanque nenano deitutori, duque jutsa quichunae tinue. Juntonan nu wantaino podeichunae tinue jutsa quituchun.
8 Junni Caínni yachi aco Abélica jelenchi quirato nenabi jisa! tinue. Junni nuwiri palucari jelenchi jilainue. Junchi Caínni yachi acoca totenue. 9 Junni totenunbi, Miya Diosiri Caínbe itsantinue:
—¿Nuchi aco Abel nuchi ran? tinue.
Junni Caínni beco manpato, itsantinue:
—Miitoyoe tinue. Lari yaca cuidaimin itoyoe tinue.
10 Junni tsantinan, Miya Diosiri itsantinue:
—Nuchi acoca totenunsile, yachi asan tobi fojie tinue. Jun asanca quirato, la tenhinayoe tinue ya jutsa tenchi casticaquino joyoeque. 11 Jun tenchi nuca itsanque casticaquechinayoe tinue: Nuchi acoca toteto, yachi asanca tobi fojisa carinue. Jun tenchi nuri tobi titiya waquenasatiya ituchunae tinue. 12 Duque sonba jayaquinatotiya, tinantiya larituchunae. Junto man postoteri chuno podeituto, nunchitiya nenato polechunae tinue. Numatotiya jasaituto nenato polechunae tinue.
13 Junni Caín Miya Diosibe beco manpato, itsantinue:
—Wa tsan quitude! Wa casticoca lari wantaituichunae tinue. 14 In tote nechi amana suerenan, nuchile nechi nuwiri epele nenamin joichunae tinue. Numatotiya jasaitumin joichunae tinue. Junto motiya laca tulaito, totelaquichunae tinue.
15 Junni Miya Diosi manpato, itsantinue:
—Motiya nuca totetori, tsaracarinan duque padeseichunae tinue.
Junto Caínca Miya Diosi seniali quinue mo tulaitotiya yape totelaquitusa. 16 Junni Caínni Miya Diosibe cuenta quinanun postote nechi jito, Nod tinun tote chudinue Edente nechi yo lanun nan tala.
Adanchi alica mo jonunca
Junni nanni wanbi Eva manca naman quito, yacari Set mumun ponue. Junni Sechi nao Enós, Enochi nao Cainán, Cainanchi nao Mahalaleel, Mahalaleélichi nao Jared, Jarechi nao Enoc jominlanue. Ya jerale tsachila duque wata sonnaminnan puyalainue. Yala duque nalala taminlanue.