—¿Aman Diosi nun chide pelebinantiya puca raminca fitusa tica joco? tinue.

2 Junni sonari beco manpato, itsantinue:

—Nun pelebitiya fino podeinola joyoda. 3 Ja man pelebicasiri finola itoyoe tinue. Ja pele jeralelachi quitsabi chuminbisiri fino podeilaitiyoe. Diosi filaquitusa tica tie. Nin taquirantiya quitusa tica tie tinue. Taquiran, fin, quitori, puyalaichunae tica tie tinue.

4 Junni piniri sonabe itsantinue:

—Nene. Numanan puyalaituchunae tinue. 5 Nula ja chide pelebi pucaca fitori, nula miilaichunae tinue ti sen jonunca o seiton jonunca. Junto Diosi cuwenta jolajochunae. Diosi junca mirato, nulaca fitusa mantaca joe tinue.

6 Junni sonari quiranue ya puca uraran finun puca jonunca. Junni fino muquinaminue Diosi cuwenta mirachun. Junto puca manca cato finue. Junsi yachi unilachinan cuwanan, yanan casi finue. 7 Junni jun óranan fe miilainue. Tenhilainue fupuca jolajoyoeque. Junto ico japisuca cato, oroto dolaquinue.

8 Nanni quebi inasa, sonabe unilaberi Miya Diosi jun witabi merará nenaeque meráto, jelechi sujilainue chide pelebi tsaibi. 9 Junni Miya Diosiri unilaca itsanque otinue:

—¿Nunchi rayun? tinue.

10 Junni unilari beco manpato, itsantinue:

—La nu witabi nenaminca meráyoe. Junto jele tiyoe fupuca joyoeque. Jun tenchi tsaiyoe tinue.

11 Junni Diosi itsanque panhanue:

¿Nuca mo fupuca joe tin? ¿Junni ja fitusa tica jun pucaca fico? tinue.

12 Junni unila beco manpato, itsantinue:

—Nu sona cuwacae labe aconpanaisa; ya sonari cuwanan fiyoe tinue.

13 Junto Miya Diosi sonabeman itsanque panhanue:

—¿Ti quichun tsanquiyun? tinue.

Junni yanan beco manpato, itsantinue:

—Pini encanaquee. Junnan ya pucaca fiyoe tinue.

14 Junni Diosi pinica pato, itsantinue:

—Tsanquinun tenchi jerale animalilabe quirachun, nuca fe seiton tintsan jochunae tinue. Inte nechi tobi muracayachi nenamin joto, to poyo fimin jochunae tinue puyano fecári. 15 Nube sonabe pa tala josa carichinayoe tinue. Nuchi alica, yachi alica, pa tala jolajochunae. Ya alicari nuca misule tsanle fudacarichunae. Nu mantimini ya alicacari netacabiri fudacarichunae tinue.

16 Junsi sonacaman itsantinue:

—Nu duque quiyanasa na quichunae tinue. Junsi unilabe mantaito nenano munarachunae. Ya nuca mantachunae tinue.

17 Junsi Diosi unilacaman itsantinue:

—Nu nuchi sonaca meráto, la fitusa tica jun pucaca fie. Junni nuchi culpa tenchi toca yucapiyarichinayoe tinue. Nu duque trabajaquito ano fino tachunae. Puyano fecári trabajaquinachunae. 18 Ti seiton tapetiya suquinilaquichunae po chun tapela, caran tapela. Junsi jelenchi chide pelebi puca icacatiya filaquichunae tinue. 19 Chipi larito nula ano fino calaquichunae. Trabajaquiminla jochunae to manhino fecári. La nuca toca quicayoe; junto nulari puyatobi ya tonan manhilaichunae tinue.

20 Junnunbi unilari yachi sonaca Eva mumun ponue Ya jeralelachi ayan jochunae tito.

21 Junni unilabe sonabe jutsa quica jonunbi, Diosi animalilachi quidoca tsanpa tsan suwanue yape awilaquisa. 22 Tsanquetobi, aman Miya Diosi itsantinue: Aman tsachila chiquila cuwenta icala joe. Min jolajoe ti sen jonunca o seiton jonunca. Junni tsachilaca numatotiya sonnasa carimin chide pelebi puca raminca fisa carituntsan joe tinue yape numatotiya sonnato polelaitusa. 23 Junto Miya Diosi ya tsachilaca ya Edén tinun witabi nechi larinue. Junto uyanchi chusa carinue yape finolaca waqueto chularasa. Diosi tsachilaca toca quica joto, tsachilaca tobinan trabajaquisa carinue. 24 Junni Adánlaca witabi nechi larisi, jun witabi anjelilaca wirucarinue tsachilaca manwisa caritusa. Junsi nin lunamin espadaca chutenue. Ya espada man tala man tala tiwinpolenaminue yape monantiya jun minuse wito ya numatotiya sonnasa carimin pucaca calaquitusa.