Ca₂niá₃ ta₁guio₃ mɨ₄cuɨng₅
6
Ca₂jág₃ jniá₂ jme₁ca₂niá₃ Guein₂ Jáꞌ₂ Chaꞌ₂ jë₁le₂ꞌuɨg₅₄ mɨ₄cuɨng₅ guio₃ jaun₂, ca₂néꞌ₂ i₁juáꞌ₄ jan₂ rɨnꞌ₅₄ i₂quén₂ jáꞌ₂ ꞌéi₂. Néꞌ₂ lë́₅ jág₁ quióꞌ₅ në₂jag₄ bá₄ jë₁quiaꞌ₂ ŋíꞌ₃, a₂juáꞌ₂:
―¡Ŋia₅, jaun₂ jagꞌ₅₄!
2 Jaun₂ jme₁ca₂jág₃ jniá₂, jaun₂ ca₂jɨng₅₄ jan₂ i₁cua₁ tion₂. I₂jme₁co₂dsɨn₅₄ jáꞌ₂ ꞌéi₂ në́₃ jme₁chanꞌ₂ caun₂ nɨ₁ꞌma₂ cágꞌ₅. Jaun₂ ca₂ŋɨi₂ caun₂ corona, jaun₂ ca₂o₃ꞌɨ́in₃ ŋó₃ ne₄ ꞌnei₂ a₂tióꞌ₃ a₂líꞌ₂ ꞌnei₂.
3 Jme₁ca₂niá₃ Guein₂ Jáꞌ₂ Chaꞌ₂ jë₁ca₂të́₂ tɨn₃ mɨ₄cuɨng₅, jaun₂ ca₂nag₃ i₁juáꞌ₄ jë₁ca₂të́₂ on₃ jáꞌ₂ ꞌéi₂:
―¡Ŋia₅, jaun₂ jagꞌ₅₄!
4 Jaun₂ ca₂jnia₃ ca₂o₃ꞌɨ́n₃ táng₃ jan₂ dsɨ₂cua₁ guén₂; dsa₂ i₂jme₁co₂dsag₅₄ guëꞌ₂ në́₃, ca₂ŋɨi₂ bí₂ a₂lé₂ jmo₃ a₂jŋiaꞌ₃ a₂ꞌei₅ tei₄ ta₁caun₂ guaꞌ₅₄ ꞌuë₃, ia₁jaun₂ jme₃dsian₅ dsa₂ rɨinꞌ₅₄. Jaun₂ ꞌéi₂ në́₃ ca₂ŋɨi₂ caun₂ ŋi₁tág₂ juëꞌ₂.
5 Jme₁ca₂niá₃ Guein₂ Jáꞌ₂ Chaꞌ₂ jë₁ca₂të́₂ ꞌnɨ₅ mɨ₄cuɨng₅, jaun₂ ca₂nag₃ táng₃ i₁juáꞌ₄ i₂ca₂të́₂ ún₂ jáꞌ₂:
―¡Ŋia₅, jaun₂ jagꞌ₅₄!
Jaun₂ jme₁ca₂jág₃ táng₃ jniá₂, ca₂jnia₃ táng₃ jan₂ dsɨ₂cua₁ lianꞌ₂; dsa₂ i₂jme₁co₂dsag₅₄ në́₃, caun₂ mɨ₂gu₂ jme₁chanꞌ₂ caun₂ cuaꞌ₅₄ ꞌéiꞌ₃.
6 Jaun₂ ca₂néꞌ₂ jág₁ jë₄ quióꞌ₅ le₃quén₂ jáꞌ₂, a₂juáꞌ₂:
―Caun₂ kilo cuɨg₂ bá₄ le₂caun₂ denario;* ꞌnɨ₅ kilo cebada* le₂caun₂ denario. La₁ tsá₃ i₂ꞌén₅ aceite quianꞌ₅₄ vino.
7 Jme₁ca₂niá₃ Guein₂ Jáꞌ₂ Chaꞌ₂ jë₁ca₂të́₂ quén₂ mɨ₄cuɨng₅, jaun₂ ca₂nag₃ i₁juáꞌ₄ jë₁ca₂të́₂ quén₂ jáꞌ₂:
―¡Ŋia₅, jaun₂ jagꞌ₅₄!
8 Jme₁ca₂jág₃ jniá₂, ca₂jnia₃ jan₂ dsɨ₂cua₁ nió₂; i₂jme₁co₂dsag₅₄ në́₃, jme₁chein₂ ꞌMú₃. Chi₁coꞌ₅₄ quióꞌ₅ ꞌéi₂ guëꞌ₂ në́₃ já₅ jan₂ i₂të́ꞌ₂ Tau₂ ꞌŊio₅.a Le₃on₃ ꞌéi₂ në́₃ ca₂ŋɨi₂ bí₂ ne₄ quióꞌ₅ guaꞌ₅₄ ꞌuë₃ caun₂ quiꞌ₅₄ quióꞌ₅ quén₂, a₂jme₃dsiain₂₃ dsa₂ quianꞌ₅₄ ŋi₁tág₂, quianꞌ₅₄ a₂le₃ꞌon₄ dsa₂, quianꞌ₅₄ jmɨ₁uɨg₅, quianꞌ₅₄ jáꞌ₂ tsau₂ dsɨ́₅ në́₃, i₂chan₂ guaꞌ₅₄ ꞌuë₃.
9 Jme₁ca₂niá₃ Guein₂ Jáꞌ₂ Chaꞌ₂ jë₁ca₂të́₂ ꞌŋiá₂ mɨ₄cuɨng₅, ca₂jág₃ jniá₂ néꞌ₃ ne₄chei₂ ja₁tionꞌ₅₄ jme₂dsí₂ quióꞌ₅ dsa₂ mɨ₂güɨ́g₃ i₂ca₂jme₃dsian₅ dsa₂ ne₄ ꞌuɨg₅₄ quióꞌ₄ jág₁ dse₃ quióꞌ₅ Diú₄, quianꞌ₅₄ ne₄ ꞌuɨg₅₄ quióꞌ₄ jág₁ dsau₅ a₂qui₂ca₂can₃.
10 Jaun₂ tiá₂ néꞌ₂ jág₁ quióꞌ₅ ꞌéi₂, i₁juáꞌ₄:
―¿Conꞌ₂ je₂lɨ́gꞌ₂ caunꞌ₅₄ ꞌí₁, Te₁guiꞌ₅₄ i₂jŋió₅ i₂tí₅ jág₁ quiángꞌ₂, ja₁con₂ dsa₂ i₂chan₂ guaꞌ₅₄ ꞌuë₃, jaun₂ caunꞌ₅₄ ꞌmaꞌ₅₄ jmɨ₂ ꞌau₅₄ jniaꞌ₅₄?
11 Jaun₂ qui₂ca₂ŋɨi₂ le₂jain₂ le₂jain₂ ꞌmɨꞌ₂ tiog₂. Jaun₂ ca₂néꞌ₂ i₁juáꞌ₄ a₂jŋia₃ guë́₄ co₂ꞌna₂, të₁liaꞌ₂ le₃ꞌŋia₅ rɨinꞌ₅₄ i₂jme₂ti₃ ta₁ ne₄ Cristo, i₂ꞌi₄ ꞌéiꞌ₃ dsián₃ guë́₄, juɨ₁liaꞌ₂ ca₂dsan₃ ꞌéi₂.
12 Jme₁ca₂niá₃ Guein₂ Jáꞌ₂ Chaꞌ₂ jë₁ca₂të́₂ jŋéi₂ mɨ₄cuɨng₅, ca₂jág₃ jniá₂ ca₂i₁bi₅₄ ꞌuë₃ tiá₂ lɨn₃. Ca₂të₁tsɨꞌ₅₄ qui₁néꞌ₃, ca₂rë₃liáꞌ₃ ꞌiog₂ në₂jag₄ bá₄ tsɨ₁ꞌmɨꞌ₂ taun₅ a₂lë́₅ quianꞌ₅₄ nɨ₁jŋi₂, a₂quɨ́ꞌ₅ dsa₂ ja₁ron₅ ꞌlag₄. Tsɨꞌ₂ guëꞌ₂ në́₃ ca₂jnia₃ guéin₂, liaꞌ₂ jniá₂ jmɨ₂.
13 Nei₅ guëꞌ₂ në́₃ qui₂tsɨ₂ca₂séiꞌ₂ ꞌuë₃ në₂jag₄ bá₄ tsɨ₂séiꞌ₂ mɨ́g₂ higo rëꞌ₂ jë₁ma₂ca₂guiongꞌ₃ dsí₂ tiá₂.
14 Gueiꞌ₅₄ dsi₂güɨg₂ në́₃ co₂dsia₅ ca₂i₃ꞌén₂ ca₂bɨn₃ liaꞌ₂ ja₁bɨn₅ mɨ₂si₂. Ca₂le₃jë́₃ nɨ₁máꞌ₂, ca₂le₃jë́₃ ꞌuë₃ le₁quɨ́ꞌ₅ jë₄ jmɨ₁ŋíꞌ₄ në́₃, qui₂ca₂jŋiógꞌ₃ cau₅ ja₁jme₁niog₅.
15 Jaun₂ qui₂ca₂ꞌma₃ juɨ₅ néꞌ₃ tau₂ ꞌlau₂, juɨ₅ jë₄ nɨ₁ꞌlau₂ cha₂ máꞌ₂, juɨ₁liaꞌ₂ rag₅₄ i₂gon₂ guaꞌ₅₄ ꞌuë₃, juɨ₁liaꞌ₂ dsa₂ dsen₅₄, juɨ₁liaꞌ₂ dsa₂ juɨg₅₄ ꞌlióg₂, juɨ₁liaꞌ₂ dsa₂ i₂cha₂ cu₄, juɨ₁liaꞌ₂ dsa₂ ꞌuanꞌ₂, ca₂le₃jɨ́n₃ juɨ₁liaꞌ₂ i₂jme₂ti₃ ta₁ ne₄ juɨg₅₄, juɨ₁liaꞌ₂ dsa₂ i₂tsá₃ ꞌein₂ ne₄ jme₂ti₃ në́₃;
16 qui₂ca₂juáꞌ₂ ca₂tsɨ́ꞌ₃ máꞌ₂, nɨ₁ꞌlau₂: