111
¡Aleluya! Läꜙka̱a̱ˉ tuhˉdsënꜙ hänˋ kihˈ DSAˉJØ̱Ø̱Hˈ kya̱a̱nꜙ.Läꜙja̱ˉ jmeenˋ jeeˊ dsaˉñeeꜙ läꜙjë̱ë̱ꜙ hi̱ˉ llu̱u̱ꜗ.
2 Haˉ ko̱hꜘ saꜙ laꜗ heˉ jʉhˉga̱a̱ˉ heˉ jmeeꜙ DSAˉJØ̱Ø̱Hˈ jnänˋ.
Läꜙjë̱ë̱ꜙ hi̱ˉ tɨh˜ dsëꜗ läꜙjëꜙ heˉ jmeeyꜙ,
jmeeyꜙ hʉʉˊdsëˉ kihꜗ heˉ naˉ läꜙjëꜙ jmɨɨˊ.
3 Haˉ ko̱hꜘ naˊhñaahꜗ saꜙ laꜗ taˊ heˉ jmeeyꜙ.
Ji̱hˊko̱hꜘ saꜙ lla̱a̱ꜙ heˉ jmeeyꜙ heˉ lluꜗ jmahꜗ.
4 Ji̱hˊko̱hꜘ saꜙ gaaꜘ dsëˉ jneˊ läꜙjëꜙ heˉ jʉhˉga̱a̱ˉ heˉ jmeeyꜙ.
Peerꜙ jø̱hˉ dsëyꜗ hiꜙ läˉñihꜘ dsëyꜗ chaˉmiihˉ.
5 Kwayꜙ heˉ kuhˉhɨ̱h˜ läꜙjë̱ë̱ꜙ hi̱ˉ ga̱yhꜙ.
Läꜙjëꜙ jmɨɨˊ baˊ dsooh˜ dsëyꜗ hmoohˊ heˉ gaꜙjmeeyꜘ.
6 Gaꜙmiꜙjnääyˉ beꜘ kiyhꜗ kihꜗ dsaˉ kya̱a̱yꜗ,
läꜙlluꜗ heˉ gaꜙkwëëyhꜗ hwaꜗ heˉ maˊ laˈ kihꜗ jñahꜘ.
7 Heˉ lluꜗ jmahꜗ baˊ jmeeyꜙ hiꜙ laꜗ kya̱a̱hˊ juꜗdsooꜘ.
Läꜙjëꜙ madaꜚ kiyhꜗ laꜗ dsooꜘ.
8 Ko̱o̱ˉ häˊ baˊ maˊ gaꜙjä̱ꜘ ko̱o̱ˉ hwehˉ juuˈ kiyhꜗ.
Ja̱ꜙ ko̱o̱ˉ gaꜙhlëëyhꜘ ja̱ˉ, laꜗ kya̱a̱hˊ juꜗdsooꜘ jmahꜗ.
9 Hñiiyꜘ gaꜙlä̱ä̱yꜗ dsaˉ kya̱a̱yꜗ.
Ko̱o̱ˉ häˊ baˊ maˊ gaꜙjmeeyꜘ hmoohˊ kya̱a̱yhˊ.
Dio la̱a̱ꜗ naˉjngëëˈ goˉte˜ heˉja̱ˉ ga̱hꜙ jnihꜘ.
10 Cherˊmahꜗ hnøøˉ jneˊ läꜙchaˉ hʉʉˊdsëˉ lluꜗ jnänˋ,
hnøøꜗ läꜙga̱hꜙ jneˊ DSAˉJØ̱Ø̱Hˈ jnänˋ toˉnëˊ.
Läꜙjë̱ë̱ꜙ hi̱ˉ miˉteꜗ madaꜚ kiyhꜗ chaˉ hʉʉˊdsëˉ lluꜗ kiyhꜗ.
Waˊ jmeenˊ jʉʉhˉ kiyhꜗ läꜙjëꜙ johꜘ jmɨɨˊ chaˉ.