85
Hneˉ DSAˉJØ̱Ø̱Hˈ kya̱a̱nꜙ,peerꜙ jnaahˈ llu̱u̱ꜗ la̱a̱hꜗ hneˉ kya̱a̱hˊ dsaˉ kya̱a̱hꜗ.
Maˉjmeehˊ maˉyaˉnääˋ läꜙjë̱ë̱ꜙ hi̱ˉ maˊ naˉsa̱a̱ꜘ naˉjñeeꜘ kya̱a̱ꜗ Jacob.
2 Gaꜙki̱i̱hˈ hohꜘ kihꜗ dsaˉ kya̱a̱hꜗ
kihꜗ heˉ hlɨɨhˈ heˉ gaꜙjmeeyꜘ,
hiꜙ gaꜙchehꜗ läꜙjëꜙ dsoˊkyeˉ kiyhꜗ heˉ maˊ naˉbä̱ä̱yhˋ.
3 Gaꜙmiꜙjnäähˈ baˊ hneˉ heˉ moꜙsoꜙ lle̱e̱hꜘ kya̱a̱yhˊ.
Gaꜙjmeehˊ taꜙ kooꜘ heˉ yaˉjë̱ë̱ˈ hohꜘ.
4 Hneˉ Dio kya̱a̱ꜗ jnäähˈ hi̱ˉ lä̱ä̱˜ dsaˉ, lä̱ä̱ˋ jnäähˈ naꜗ.
Moꜙtoꜙ jmeeˉ yaˉjë̱ë̱ˈ hohꜘ kya̱a̱ꜗ jnäähꜗ.
5 ¿Cheˊ läꜙ maˉngooꜗ naˉ baˊ lle̱e̱hꜘ kya̱a̱hˊ jnäähꜗ,
läꜙkye̱ˉ kihꜗ saˊju̱ˉ kya̱a̱ꜗ jnäähˈ?
6 ¿Cheˊ moꜙsoꜙ kwahˈ gaˊ hneˉ jwëˈ jëëˊ jnäähˈ jmɨˉgyʉʉꜙ,
mahꜗ jë̱ë̱˜ dsëꜗ jnäähˈ dsaˊtoohˊ jnäähˈ kya̱a̱hˊ hneˉ?
7 Hneˉ DSAˉJØ̱Ø̱Hˈ kya̱a̱nꜙ,
miˊjnääˈ heˉ läˉñihꜘ hohꜘ kya̱a̱ꜗ jnäähˈ,
mahꜗ lä̱ä̱ˋ läꜙjë̱ë̱ꜙ jnäähˈ.
8 Nuuˋ baˊ jnäꜘ läꜙjëꜙ heˉ jähꜙ DSAˉJØ̱Ø̱Hˈ kya̱a̱nꜙ.
Jëëhꜘ jäyhꜙ jmeeyꜗ hɨɨꜗ tiiˊ kihˈ dsaˉ kya̱a̱yꜗ
hiꜙ kihꜗ hi̱ˉ naˉjngëëˈ kya̱a̱yꜗ,
mahꜗ moꜙsoꜙ jmeeꜗ gyihꜗ waˊ laˈ chaˉ laꜗ.
9 Maꜙraꜙ juˈdsooꜘ jä̱hꜙ baˊ chehˈ Dio,
mahꜗ lä̱ä̱y˜ läꜙjë̱ë̱ꜙ hi̱ˉ ga̱yhꜙ.
Hiꜙ miˉjnääyꜙ haˉ ko̱hꜘ saꜙ jø̱ø̱hˈ la̱a̱yꜗ,
läꜙja̱ˉ miˉjø̱ø̱yꜗ jeeˊ hlaˉ hwaꜗ kya̱a̱ꜗ jnäähˈ.
10 Läꜙja̱ˉ läꜙjnäꜘ heˉ läˉñihꜘ dsëꜗ Dio
hiꜙ läꜙjnäꜘ juˈdsooꜘ kiyhꜗ.
Läꜙchaˉ heˉ lluꜗ jmahꜗ
hiꜙ läꜙchaˉ heˉ hiiꜘ tiiˊ kihˈ dsaꜙ.
11 Ja̱ˉbaˊ hwaˈ laˉ jmeeꜗ dsaˉ läꜙko̱o̱ˉ hnøøꜗ juˈdsooꜘ.
Hiꜙ hi̱ˉ llu̱u̱ꜗ goˉte˜, läꜙ gaꜙtëꜘ gyʉʉhˈ jmɨˉgyʉʉꜙ ka̱yꜗ kwa̱a̱t˜.
12 Heꜘ baˊ hñiiꜘ DSAˉJØ̱Ø̱Hˈ jnänˋ,
miˉjø̱ø̱yꜗ hwaꜗ jnänˋ mahꜗ kwaꜗ chaˉmiihˉ mɨˈhmaˉ.
13 Taˊ lluˈ heˉ jmeeyꜙ dsaˉläˉjnäꜘ jeeˊ jnänˋ,
hehꜗ läꜙja̱ˉ dsaˉläˉlluꜗ jwëꜗ jnänˋ
mahꜗ jmeenˊ läꜙ hnøøyꜗ hñiiyꜘ.