84
Haˉ ko̱hꜘ naˊhñaahꜗ saꜙ laꜗ gwahꜙ kyahꜗ,hneˉ Dio hi̱ˉ chaˉ gaꜙläꜙjëꜙ beꜘ kihꜗ.
2 Peerꜙ kuhˉngɨɨꜙ tuhˉdsënꜙ hiꜙ he̱e̱ꜘ dsëꜗ jmɨˉlleꜘ kinꜙ,
nɨɨnˋ jeeˊ chihˈ gwahꜙ kihꜗ DSAˉJØ̱Ø̱Hˈ kya̱a̱nꜙ.
Läꜙka̱a̱ˉ tuhˉdsënꜙ hänꜙ,
kihꜗ heˉ jë̱ë̱ˉ dsënꜙ kyahꜗ hneˉ Dio ji̱i̱hꜙ.
3 Läꜙkye̱ˉ ta̱ˈ pihꜗ jnøøhˈ hneꜗ jeeˊ dsaˉta̱a̱yhˋ
kooꜘ naˊhyooꜘ kyahꜗ hneˉ Dio hi̱ˉ chaˉ gaꜙläꜙjëꜙ beꜘ kihꜗ.
Hiꜙ läꜙja̱ˉ piihˉ kaˉlähꜘ jnøøhˈ haˉ jeeˊ llayˈ sɨɨˊ kiyhˈ
chaˊnehꜙ kyahꜗ hneˉ Rey kya̱a̱nꜙ hiꜙ DSAˉJØ̱Ø̱Hˈ kya̱a̱nꜙ.
4 Lluꜗ laꜗ kihꜗ hi̱ˉ tä̱ä̱hˊ tä̱ä̱ꜘ nehꜙ gwahꜙ kyahꜗ.
Jëëhꜘ saꜙ tʉyꜗ häyꜙ kyahꜗ.
5 Lluꜗ laꜗ kihꜗ hi̱ˉ maˉtë̱ë̱ꜘ beꜘ kyahꜗ,
lluꜗ laꜗ kihꜗ hi̱ˉ he̱e̱ꜘ dsëꜗ ngëꜗ jwëꜘ kyahꜗ.
6 Jëëhꜘ waˊraˉ gaꜙjëëyꜗ ko̱o̱ˉ heˉ wɨɨꜘ jäꜙ tʉ̱ʉ̱ꜙ jmɨɨˉ mɨˈnëyˊ,
pero Dio jmeeꜗ liiꜘ heˉ ja̱ˉ läꜙko̱hꜘ heˉ maˉjnøøyh˜ jeeˊ hyaˉ jmɨɨˉ baˊ,
läꜙko̱hꜘ jeeˊ dsaˉka̱hꜙ jmɨɨˉ jeeˊ chihˈ naˊhyahˉ waˊraˉ gaꜙhɨɨꜘ jmaꜗ.
7 Läꜙjëꜙ jmɨɨˊ baˊ ngooꜗ dsaˉkwa̱a̱yꜙ kya̱a̱hˊ beꜘ
läꜙji̱i̱hˈ të̱ë̱yꜗ nehꜙ gwahꜙ kihꜗ Dio jeeˊ jwɨɨˉ Sión.
8 DSAˉJØ̱Ø̱Hˈ kya̱a̱nꜙ, hi̱ˉ chaˉ gaꜙläꜙjëꜙ beꜘ kihꜗ,
nʉʉˉ hneˉ läꜙjëꜙ heˉ ngɨɨnˊ kyahˈ.
Dio kya̱a̱ꜗ Jacob, jmeeˊ heꜗ heˉ chu̱u̱nꜘ kya̱a̱hˊ hneˉ.
9 Hneˉ Dio hi̱ˉ chehꜗ nëˊ kya̱a̱ꜗ jnäähꜗ,
lä̱ä̱ˋ hi̱ˉ naˉlle̱e̱hˊ kya̱a̱hˈ.
10 Kye̱e̱ꜘ gaˊ ko̱o̱ˉ jmɨɨˊ heˉ tøøhnˊ gwahꜙ kyahꜗ,
läꜙko̱hꜘ gaˊ heˉ tøøhnˊ taꜙ jeeˊ jyohꜘ ko̱o̱ˉ mil jmɨɨˊ.
Lluꜗ gaˊ kinꜙ heˉ ko̱o̱ˉ chehnꜗ høønꜙ hoˊhaahˊ gwahꜙ kihꜗ Dio,
läꜙko̱hꜘ gaˊ heˉ gyanˊ tä̱ä̱ꜘ ko̱o̱ˉ chaˊnehꜙ jeeˊ chaˉ heˉ hlɨɨhˈ.
11 Jëëhꜘ, DSAˉJØ̱Ø̱Hˈ jnänˋ hi̱ˉ chehꜗ nëˊ chooyꜙ jeˉ jnänˋ.
Dio baˊ hi̱ˉ hnääyꜗ
hiꜙ jmeeyꜙ jʉʉhˉ kihꜗ hi̱ˉ saꜙ maˉhlä̱ä̱hˉ kya̱a̱yhˊ.
Läꜙjëꜙ heˉ chaˉ kihꜗ Dio,
niꜙ miihˉ saꜙ wɨɨyꜘ kwëëyhꜗ hi̱ˉ gaꜙnääˊ jwëꜘ kiyhꜗ.
12 Hneˉ Dio hi̱ˉ chaˉ gaꜙläꜙjëꜙ beꜘ kihꜗ,
lluꜗ laꜗ kihꜗ läꜙjë̱ë̱ꜙ hi̱ˉ kye̱ˉ oˉjø̱hꜙ dsëˉ kyahꜗ.