64
Hneˉ Dio kya̱a̱nꜙ,nʉʉˉ kihꜗ läꜙjëꜙ heˉ jwë̱ë̱hn˜ hneˉ läꜙ maˊ kɨˊhoohnˊ.
Hä̱ä̱ˋ jnäꜘ kihꜗ hi̱ˉ hä̱ä̱ˈ hi̱ˉ naˉhøøhˊ kinꜙ.
2 Hmääˋ jnäꜘ kihꜗ hi̱ˉ hñaaˉ dsëꜗ, hi̱ˉ dsaˉta̱a̱hˋ juuˈ kweeˉ jeeˊ naˉhmääˊ heˉ hnøøyꜗ jmeeyhꜙ jnäꜘ.
Lä̱ä̱ˋ jnäꜘ kihꜗ hi̱ˉ jø̱hˉlä̱ä̱hˉ dsaˉkya̱a̱hˊ mahꜗ jmeeyꜗ heˉ hlɨɨhˈ kinꜙ.
3 Naˊsɨɨhˊ dsaˉ heꜘ laꜗ läꜙko̱hꜘ ñeˈtuuhꜚ naˉjniiˊ.
Läꜙko̱hꜘ flecha heˉ haaˊ venen laꜗ juuˈ heˉ hwëëˉ hooyˊ.
4 Jeeˊ naˉhmääˊ baˊ tey˜ flecha kihꜗ hi̱ˉ saꜙ hä̱ä̱ˊ dsooˊ.
Niꜙ juuˈ gaˊ saꜙ chaˉ waˊraˉ gaꜙteyꜗ flecha,
niꜙ miihˉ saꜙ goyhꜙ.
5 Kwayꜙ beꜘ kihꜗ dsaˉkya̱a̱yhˊ mahꜗ jmeeyꜗ heˉ hlɨɨhˈ.
Hnooyhˉ haˉ läꜙ hɨɨyꜗ läꜘ jeeˊ naˉhmääˊ, jäyhꜘ:
“Niꜙ ja̱a̱ˉ saꜙ cha̱a̱ˉ hi̱ˉ jëëꜗ jeeˊ laˉ.”
6 Gaꜙnääꜗ bihꜗ dsaˉta̱a̱yhˋ juuˈ kweeˉ heˉ jmeeyꜗ heˉ hlɨɨhˈ.
Ka̱y˜ kwa̱a̱t˜ kweeˉ haˉ läꜙ jmeeyꜗ hñaaˉ dsëyꜗ kihꜗ dsaꜙ.
Läꜙja̱a̱ˉ läꜙja̱a̱ˉ jmeeꜙ hʉʉˊdsëˉ hlɨɨhˈ
heˉ gwaꜘ läꜙ gaꜙtëꜘ tuhˉdsëyꜗ.
7 Pero Dio jmääyhꜙ hi̱ˉ heꜘ dsooˊ,
läꜙko̱hꜘ heˉ tey˜ flecha baˊ jmeeyˈ.
Niꜙ saꜙ liihꜚ gyihꜗ waˊraˉ gaꜙløøꜗ laꜘ dsooˊ kiyhˈ.
8 Ja̱ˉbaˊ juuˈ heˉ gaꜙhlëëyhꜘ ja̱ˉ jmeeꜗ tä̱yhꜙ.
Waˊraˉ gaꜙjëëꜗ dsaˉ naˉsa̱a̱yˈ hwaꜗ, miˉkwa̱hꜗ dsaˉ kiyhꜗ.
9 Ja̱ˉgaˊ naꜙ läꜙjë̱ë̱ꜙ läꜙga̱hꜙ Dio, dsaˉta̱a̱yhˋ jëë˜ dsa̱yhꜙ.
Jmeeyh˜ juuˈ haˉ läꜙ laꜗ heˉ jʉhˉga̱a̱ˉ heˉ jmeeꜙ Dio.
Hiꜙ läꜙngëëyꜘ haˉ läꜙ laꜗ taˊ kihˈ Dio.
10 Läꜙjë̱ë̱ꜙ hi̱ˉ llu̱u̱ꜗ kya̱a̱yꜗ
dsaˉta̱a̱hˋ jë̱ë̱ˉ dsëꜗ kya̱a̱hˊ DSAˉJØ̱Ø̱Hˈ jnänˋ.
Dsaˉta̱a̱yhˋ ko̱ˉjø̱hꜘ kya̱a̱hˊ DSAˉJØ̱Ø̱Hˈ jnänˋ hi̱ˉ chehꜗ nëˊ.
Läꜙja̱ˉ läꜙjë̱ë̱ꜙ hi̱ˉ kye̱ˉ ko̱o̱ˉ nëëˈ baˊ hʉʉˊdsëˉ jmeeꜗ jʉʉhˉ kiyhꜗ.