63
Hneˉ la̱a̱hꜗ Dio kya̱a̱nꜙ, peerꜙ hnoonꜗ hnaahnꜚ hneˉ.Läꜙko̱hꜘ heˉ naˉki̱i̱ˉ dsënꜙ jeeˊ laˈ hwaꜗ ki̱i̱ꜙ jeeˊ saꜙ chaˉ niꜙ miihˉ jmɨɨˉ,
läꜙja̱ˉ kuhˉngɨɨꜙ tuhˉdsënꜙ kyahꜗ.
2 Hnoonꜗ jëënꜚ haˉ läꜙ laꜗ beꜘ kyahꜗ hiꜙ haˉ läꜙ jnaahˈ la̱a̱hꜗ.
Hnoonꜗ jë̱ë̱nꜚ hneˉ nehꜙ gwahꜙ naˉjngɨɨˈ kyahꜗ.
3 Heˉ hnaahꜙ jnäꜘ, lluꜗ gaˊ laˈ kinꜙ läꜙko̱hꜘ gaˊ heˉ cha̱a̱nˉ jmɨˉgyʉʉꜙ.
Kya̱a̱hˊ waˊhoonꜙ hänˋ kyahˈ.
4 Taˊko̱ˉji̱i̱hˈ cha̱a̱nˉ hänˋ kyahˈ.
Choonˋ goonꜙ kyahꜗ jeeˊ chu̱u̱nꜘ kya̱a̱hˊ hneˉ.
5 Läꜙja̱ˉ jä̱nˋ naˉkë̱nꜚ lluꜗ,
läꜙko̱hꜘ ja̱a̱ˉ hi̱ˉ maˉkuhˉ jeeˊ chaˉ jmɨɨˊ.
Heˉja̱ˉ jë̱ë̱ˉ dsënꜙ hänˋ kya̱a̱hˊ waˊhoonꜙ.
6 Taꜙlaꜙ hwëˈ jeeˊ naˉkya̱a̱nˈ nëˊ ji̱i̱ˊ,
kye̱nˊ hʉʉˊdsëˉ kyahꜗ hiꜙ dsooh˜ dsënꜙ hneˉ.
7 Jëëhꜘ ja̱a̱ˉ hneˉ baˊ hi̱ˉ kwaꜙ beꜘ kinꜙ.
Peerꜙ cha̱a̱nˉ lluꜗ heˉ hä̱ä̱nˊ nehꜙ saˊkyoohˉ.
8 Maˉcha̱a̱ˉ baˊ jnäꜘ ko̱ˉjø̱hꜘ kya̱a̱hˊ hneˉ.
Maˉgoohˉ raˉllu̱u̱ꜗ saꜙ tø̱ø̱˜ jnäꜘ.
9 Pero hi̱ˉ hnøøꜗ jngëëhꜗ jnäꜘ,
tä̱yhꜙ chaˊjeˉ ñiihˊ gaˊ kihˈ nehꜙ hwaꜗ.
10 Naˉbä̱ä̱yhˋ ju̱u̱yꜘ kya̱a̱hˊ ñeˈtuuhꜚ,
mahꜗ ku̱hꜙ dsɨɨˉ nuuˉ.
11 Pero dsaˉtaˊ jø̱ø̱hˈ cha̱a̱yˉ lluꜗ kya̱a̱hˊ Dio.
Läꜙja̱ˉ läꜙjë̱ë̱ꜙ hi̱ˉ maˉtä̱ä̱ˉ hñiiꜘ kihꜗ Dio häyꜗ su̱ꜚ kiyhꜗ.
Pero hi̱ˉ jmeeꜙ juuˈ taˉjuuˈ,
lloo˜ ko̱o̱ˉ jmɨɨˊ jnëꜗ hooyˊ goˉte˜.