36
Heˉ hlɨɨhˈ jøøꜙ kihꜗ hi̱ˉ hñaaˉ dsëꜗ.Niꜙ miihˉ saꜙ ga̱yhꜙ Dio.
2 Kihꜗ heˉ jmääy˜ hñiiyꜘ jø̱ø̱hˈ,
heˉja̱ˉ saꜙ jëëy˜ heˉ dsaˉhlä̱ä̱yhꜙ.
Saꜙ ka̱y˜ kwa̱a̱t˜ haˉ ko̱hꜘ naˉhøøꜘ saꜙ laꜗ läꜙjëꜙ heˉ jmeeyꜙ.
3 Juuˈ heˉ hwëëˉ hooyˊ laꜗ juuˈ hlɨɨhꜗ jmahꜗ,
hiꜙ miˉkyaˉ miˉga̱a̱yꜙ dsaˉkya̱a̱yhˊ.
Gaꜙgaaꜘ dsëyꜗ heˉ maˊ kyʉʉyh˜,
gaꜙtʉyꜗ heˉ maˊ jmeeyꜙ heˉ lluꜗ.
4 Jeeˊ naˉkya̱a̱yˈ nëˊ ji̱i̱ˊ,
läꜙ maˉngooꜗ ja̱ˉbaˊ jmeeyꜙ hʉʉˊdsëˉ heˉ jmeeyꜗ hlɨɨhˈ.
Jwëꜘ hlɨɨhˈ jmahꜗ baˊ hä̱ä̱yˊ,
saꜙ tʉy˜ jmeeyꜙ heˉ hlɨɨhˈ.
5 DSAˉJØ̱Ø̱Hˈ kya̱a̱nꜙ, heˉ hnaahꜙ jnäähˈ,
jʉʉhˉ läꜙko̱o̱ˉ jʉʉhˉ gyʉʉhˈ jmɨˉgyʉʉꜙ.
Hiꜙ heˉ miˉtehˋ juuˈ kyahꜗ,
dsë̱ë̱ꜗ läꜙ gaꜙtëꜘ jeeˊ hiiꜘ jniiꜘ.
6 Läꜙko̱hꜘ mohꜘ ñiiꜘ laꜗ juˈdsooꜘ kyahꜗ,
hiꜙ madaꜚ kyahꜗ jʉʉhˉ gaˊ läꜙko̱hꜘ jmɨˉñeehꜚ.
Hneˉ DSAˉJØ̱Ø̱Hˈ kya̱a̱nꜙ hä̱ä̱hꜙ dsaˉ
hiꜙ hä̱ä̱hꜙ jahꜘ kaˉlähꜘ.
7 Hneˉ DSAˉJØ̱Ø̱Hˈ kya̱a̱nꜙ,
haˉ ko̱hꜘ saꜙ laꜗ naˊhñaahꜗ heˉ hnaahꜙ jnäähˈ.
Heˉja̱ˉ läꜙjë̱ë̱ꜙ dsaˉ hnoohˉ haˉ läꜙ jeeˊ hmääyhꜙ kooꜘ kyahꜗ.
8 Jeeˊ ja̱ˉ jä̱yꜗ naˉkë̱yꜚ tä̱ä̱ꜘ kya̱a̱hˊ maˈ heˉ chaˉ kyahꜗ.
Kwëëyhˈ hɨ̱yhꜗ jmɨˉjʉʉhˉ heˉ jmäꜘ chaˉgaˊmiihˉ.
9 Jëëhꜘ kyahꜗ hneˉ baˊ hyaˉ jmɨɨˉ heˉ jmeeꜙ cha̱a̱ˉ dsaˉ.
Hiꜙ kyahꜗ hneˉ baˊ gwaꜘ jeˉ heˉ jnäꜘ kya̱a̱ꜗ jnäähˈ.
10 Miˊjnääˈ kihꜗ hi̱ˉ kyu̱u̱ꜙ hneˉ heˉ hnaahꜙ hnihꜘ.
Miˊjnääˈ juˈdsooꜘ kyahꜗ kihꜗ läꜙjë̱ë̱ꜙ hi̱ˉ kye̱ˉ ko̱o̱ˉ nëëˈ baˊ hʉʉˊdsëˉ.
11 Taꜙ kwaˉ jwëˈ kihꜗ hi̱ˉ jmää˜ hñiiꜘ ka̱a̱hˊ heˉsoyhꜗ nëˊ kinꜙ.
Taꜙ kwaˉ jwëˈ kihꜗ hi̱ˉ hñaaˉ dsëꜗ ka̱a̱yhꜗ jnäꜘ.
12 Hi̱i̱ꜚ hi̱ˉ hñaaˉ dsëꜗ heꜘ, maˉsa̱a̱ꜗ maˉja̱a̱ꜗ.
Maˉsa̱a̱yꜗ maˉja̱a̱yꜗ goˉte˜,
ja̱ˉ ji̱i̱hˈ moꜙsoꜙ naahꜙ gyihꜗ.