35
Hneˉ DSAˉJØ̱Ø̱Hˈ kya̱a̱nꜙ, llaˉdsëëˋ kihˈ hi̱ˉ llaˉdsëëˋ kinꜙ.Te̱e̱ꜘ kya̱a̱hˊ hi̱ˉ te̱e̱˜ kya̱a̱hˊ jnäꜘ.
2 Kye̱ˉ ñeˈtuuhꜚ kyahꜗ hiꜙ ñeˈ heˉ hɨɨhꜙ nëˊ kyahˈ
mahꜗ ñaˉ kwaˊ beꜘ kinꜙ.
3 Hiiꜘ ñeˈchʉ̱ʉ̱hˉ kyahꜗ mahꜗ haˊ kihˈ hi̱ˉ hëëꜙ kinꜙ.
Chiihˊ jnäꜘ: “Jnäꜘ lä̱ä̱nˊ hneˉ.”
4 Waˊ jä̱ꜘ oˉhihꜙ hiꜙ waˊ ka̱hˈ waˊ gwë̱hˈ hʉʉˊdsëˉ kihꜗ hi̱ˉ hnøøꜗ jngëëhꜗ jnäꜘ,
hiꜙ läꜙja̱ˉ kihꜗ hi̱ˉ jmeeꜙ hʉʉˊdsëˉ jmeehꜙ jnäꜘ.
5 Waˊ le̱e̱yꜘ läꜙko̱hꜘ tʉˊhløøˉ heˉ dsaˉlle̱e̱ꜘ.
Waˊ hëëˈ ángel kya̱a̱ꜗ DSAˉJØ̱Ø̱Hˈ jnänˋ kihꜗ dsaˉ heꜘ.
6 Jmeeˊ wɨɨhˉ hiꜙ naˉho̱o̱ˉ chaˊjwëꜗ jeeˊ dsaˉngëëyꜘ,
jeeˊ hëëˈ ángel kiyhꜗ.
7 Niꜙ saꜙ chaˉ heˉ gaꜙjmeenꜗ kiyhꜗ
mahꜗ gaꜙhɨɨyꜘ kinꜙ ko̱o̱ˉ läꜘ.
Gaꜙjmeeyꜘ ko̱o̱ˉ tooˉ mahꜗ tä̱hnꜙ nehꜙ.
8 Jeeˊ saꜙ liiyhꜚ baˊ, waˊ jäꜘ heˉ wɨɨꜘ nëˊ kiyhˈ.
Waˊ tä̱yhˉ nehꜙ saˊläꜘ
heˉ gaꜙhɨɨyꜘ jeeˊ saꜙ cha̱a̱ˉ hi̱ˉ jëë˜.
Läꜙja̱ˉ waˊ tä̱yhˉ nehꜙ tooˉ heˉ gaꜙjmeeyꜘ ja̱ˉ.
9 Ja̱ˉgaˊ naꜙ jë̱ë̱ˉ dsënꜙ kya̱a̱hˊ DSAˉJØ̱Ø̱Hˈ kya̱a̱nꜙ,
kihꜗ heˉ maˉlä̱ä̱yꜗ jnäꜘ.
10 Läꜙka̱a̱ˉ tuhˉdsënꜙ jwahnꜚ:
“¿Haˉ cha̱a̱ˉ hi̱ˉ la̱a̱ꜗ läꜙko̱hꜘ hneˉ DSAˉJØ̱Ø̱Hˈ kya̱a̱nꜙ?
Hneˉ lä̱ä̱hˊ hi̱ˉ kɨˉhooh˜
jeeˊ kihˈ dsaˉ hñaaˉ dsëꜗ hi̱ˉ be̱e̱ꜘ.
Hiꜙ läꜙja̱ˉ lä̱ä̱hˊ hi̱ˉ täˉñeeꜘ,
hiꜙ lä̱ä̱hˊ hi̱ˉ llaˉkya̱a̱ꜗ jeeˊ kihˈ hi̱ˉ jmeeyhꜙ.”
11 Hi̱ˉ hlë̱ë̱hˈ heꜘ hnooyˉ juuˈ kinꜙ.
Hnëëy˜ jnäꜘ kihꜗ juuˈ heˉ saꜙ manꜙ.
12 Jmeenꜙ heˉ lluꜗ jmahꜗ kiyhꜗ,
pero dsaˉ heꜘ, miˉhmaayhˋ kinꜙ kya̱a̱hˊ heˉ hlɨɨhˈ,
mahꜗ jmeeyꜙ tiˉmeehˉ dsënꜙ.
13 Läꜙ maˊ gaꜙläꜙdsaahˋ hi̱ˉ heꜘ, gaꜙkɨˊ gaꜙhoohnˋ kiyhˈ.
Gaꜙkë̱hnꜙ hmɨɨhˉ jwäꜘ, gaꜙtʉnꜗ heˉ kuhˉhuhnꜙ,
saꜙ maˊ tʉn˜ maˊ ngɨɨnˊ kiyhˈ.
14 Gaꜙläꜙmeehꜙ dsënꜙ kiyhꜗ, läꜙko̱hꜘ kihꜗ ja̱a̱ˉ omeꜚ kya̱a̱nꜙ, läꜙko̱hꜘ kihꜗ ja̱a̱ˉ ø̱ø̱hnꜗ.
Läꜙko̱hꜘ hi̱ˉ kɨˉhooh˜ kihꜗ chooˈ, läꜙja̱ˉ maˊ jmeenꜙ kihꜗ dsaˉ heꜘ.
15 Pero maˊ gaꜙta̱hnꜘ, gaꜙta̱a̱yhˋ gaꜙngɨɨyꜗ kinꜙ.
Dsaˉ hñaaˉ dsëꜗ heꜘ gaꜙjmääyꜗ jnäꜘ läꜙko̱o̱ˉ ja̱a̱ˉ hi̱ˉ saꜙ kyu̱u̱yꜙ,
niꜙ saꜙ maˊ tʉy˜ heˉ maˊ jmeeyhꜙ jnäꜘ.
16 Maˊ heeyh˜ jnäꜘ wɨɨꜘ hiꜙ maˊ miˉkwa̱yhꜗ jnäꜘ
hiꜙ maˊ jʉ̱ʉ̱y˜ chaˊja̱yˊ kihꜗ heˉ maˊ naˉhøøyhˊ kinꜙ.
17 Dsaˉjø̱ø̱hˈ kya̱a̱nꜙ,
¿haˉ ko̱hꜘ läꜙhɨɨˊ ja̱ˉgaˊ jmeehꜗ heˈ kinꜙ?
Lä̱ä̱ˋ jnäꜘ kihꜗ hi̱ˉ hnøøꜗ jngëëhꜗ jnäꜘ,
hi̱ˉ la̱a̱ꜗ läꜙko̱hꜘ león hi̱ˉ gaꜙnääˊ kyo̱hꜙ.
18 Lä̱ä̱ˋ jnäꜘ,
mahꜗ kwanˋ tiˊhmaahˊ kyahˈ jeeˊ dsaˉñeeꜙ dsaˉ.
Hänˋ kyahˈ jeeˊ tä̱ä̱hˊ jwë̱ë̱ꜘ dsaˉ.
19 Taꜙ kwaˉ jwëˈ ngɨɨꜗ hi̱ˉ naˉhøøhˊ kinꜙ,
saꜙ chaˉ heˉ kihꜗ jmeeyꜗ naˉhøøyhˊ.
Taꜙ kwaˉ jwëˈ läꜙcha̱a̱ˉ lluꜗ hi̱ˉ saꜙ hnääꜗ jnäꜘ.
20 Jëëhꜘ saꜙ hnooyhˉ heˉ hɨɨꜗ tiiˊ.
Hnooyhˉ haˉ läꜙ jeeˊ miˊga̱a̱yꜙ hi̱ˉ hwa̱a̱ˊ baˊ.
21 Heˉ kuˉnɨɨy˜ moˉhooyˊ kinꜙ, mahꜗ hnɨɨy˜ kinꜙ, jäyhꜘ:
“Kya̱a̱hˊ mɨˊnëˊ jnäähꜗ maˉjëëˊ jnäähꜗ jmeeyꜙ heˉ hlɨɨhˈ.”
22 Hneˉ DSAˉJØ̱Ø̱Hˈ kya̱a̱nꜙ, ñehˊ baˊ hneˉ läꜙjëꜙ.
Jmeeˊ heꜗ kinꜙ, taꜙ waˊ läꜙø̱ø̱hꜘ kinꜙ.
23 Hnoonꜗ llahˈ taˊ kinꜙ naꜗko̱hꜘ.
Hneˉ Dio DSAˉJØ̱Ø̱Hˈ kya̱a̱nꜙ, nooˉ nëˊ kinꜙ.
24 Läꜙko̱o̱ˉ laꜗ juˈdsooꜘ kyahꜗ,
miˊjnääˈ jnäꜘ heˉ saꜙ chaˉ heˉ maˉjmeenꜗ niꜙ miihˉ,
mahꜗ saꜙ ngëëyꜗ jnäꜘ.
25 Taꜙ waˊ jäyhꜘ:
“Maˉlaꜙ baˊ läꜙko̱hꜘ hʉʉˊdsëˉ heˉ maˊ jmeeˉ jneˊ,
maˉjä̱yꜘ taꜙjmahꜗ goˉte˜.”
26 Waˊ jä̱ꜘ oˉhihꜙ hiꜙ waˊ ka̱hˈ waˊ gwë̱hˈ hʉʉˊdsëˉ kihꜗ hi̱ˉ cha̱a̱ˉ lluꜗ maˊ jëën˜ wɨɨꜘ.
Waˊ jä̱yꜘ goˉte˜ kya̱a̱hˊ oˉhihꜙ läꜙjë̱ë̱ꜙ hi̱ˉ jmeeꜙ hʉʉˊdsëˉ ka̱a̱hˊ gaˊ läꜙko̱o̱ˉ jnäꜘ.
27 Häˊ hnähꜘ, waˊ jë̱ë̱ˉ hohꜘ hnähꜘ,
läꜙjë̱ë̱ꜙ hnähꜘ hi̱ˉ tä̱ä̱hˊ nëˊ kinꜙ
läꜙlluꜗ heˉ saꜙ chaˉ maˉjmeenꜗ.
Waˊ jäyhꜘ tä̱ä̱ꜘ:
“Jø̱hˈga̱a̱ˉ DSAˉJØ̱Ø̱Hˈ jnänˋ,
hi̱ˉ hnoohˉ jeeˊ hɨɨˈ tiiˊ kihˈ hi̱ˉ jmeeꜙ taˊheꜗ kiyhꜗ.”
28 Jnäꜘ jwɨɨnꜚ dsaˉ,
heˉ la̱a̱hꜗ hneˉ llu̱u̱ꜗ goˉte˜ DSAˉJØ̱Ø̱Hˈ kya̱a̱nꜙ.
Läꜙta̱a̱ˈ jmɨɨˊ baˊ hänˋ kyahˈ.