Israelin enabu jatun chakabukidi ana jatu yuinikiaki, na janchadan
7
Bimi ma tseka keyuabuuva bimi batapa inun higo bimi batapa pinun, iwanan,
benakin en jawa bechiama
¡en peidawa! en ikai keskadi.
2 Jabiaska keskadiai mai jidabi anu
juni pepabu inun nuikipabun Dios chibainbu
eandi en bechiamadiki,
tsua ana jayamakenan.
Jakia pubein detename bestikin
chakabuwanun ixun
dasibibu manakanankanikiki.
Betsabu tibibe chakabunun ika
bidunwan keska maniabuki, manakanainan.
3 Jatun xanen ibubunan, eska jatu wakanikiki.
Jatu dayaxunun, iwanan,
xanen ibu bexmasbun pei jatu yukakin
jawena wakubainaibun
xanen ibu betsa unanti wanikabun
june jatu pewakin pei bikin
jatun chakabuwen jatu kupisbumaki.
Kushipabun jaska akatsis ikai akubainkin,
maewan jidabi atimapa wakin
jau chakabu bestinunbun yusinkubainmisbuki.
4 Tsuabuda: “Jabu pepabuki”, abiaibudan,
ji muxa keska chakabubuki, mesedan.
Tsuabuda: “Jabu nuikipabuki”, abiaibudan,
mae muxa keska chakabubudiki, mesebudan.
Jakia jaska Diosun tsuma chaninikabun
ma jatu banabimayama ja xabatian
jatu kupixanai ma juikiki,
jatubetan chakabu inun pepa pewaidan.
Jatianda itimaska chakayamakubainaibun
5-6 juni bakebun jatun ibu junibun jancha danankin
ana jawa jatu duawabumaken
ainbu bakebundi jatun ewan jancha danain
ana jawa peabumaken
jawen babawanbundi jatun yayan jancha
ana ninkakatsi ikabuma
jawenabu kayabibe dasibi sinatanamexankanikiki.
Jaskawen taea matu dapi jiweabun jancha ikunwanyamaxankanwen.
Min jaibun mia jawada shinanxunai
ninkatan jaki chiti iyamaxankanwen.
Ja dikabi min ainbe min janchabiaidan, uindawe.
7 Jakia medabe en yuka ea ninkaxanaiwen taexun
ea jatun piskumaxanai Dios manakakin
Jehová besti juai en manakubainxanaii.
Jehován Israel medabewaxanikiaki, na janchadan
8 Eki sinataibu Israel anuabuun, en chakabuwen taea
ibubis en bika teneai uin
ewen benimayamakanwen.
En di ibiaima en ana benikauanxanaii,
chakabu meshu keskatun ea achibiabaunken
Jehová en xaba keska en mekenan chaxakapaki.
9 Kanekin chakabu wakin Jehová en paxkaima
eki sinataya: “Enaki”, ixun
jawen sinata en tenexunkubainxanaii.
En jaska wakubainmis unanti watan ea pepa wakin Jehován ea jatu kupixunxanai adiamaken
jin jin ikama en manayukubainaii.
Jatu maemakin ea uinmakin jawen kushipa
xabakabi Jehován en chakabu unanti wakin
ea unanmaxanikiki,
bin dekua keska anu ea iyukinan.
10 Eki sinataibun ea bika wakin yukakin:
“¿Min Mekenika Dios Jehovádan, janimen?
¿Juama daka? mia medabewaidan”,
ea akubainimabun Jehován jatu maemai uindiaxankanikiki,
jaska jancha chakabu kainkainkin jatu dakewadan.
Baiwen kakin
pupus pema pema aka keska wakin jatu kupiaya
jatu jaska wai uin en shinan chankanxanaii.
Jerusalén ana benikin bena waxankanikiaki, na janchadan
11 Jerusalén anu jiweabuun,
matun mishki kenebaunibu di abianibu
matun mae benawakin
ana matun mai pakea xekakin
ewapa wai ma matu ana axuin bekanikiki.
Shinaindakubainkanwen.
12-13 Januxun jatunabu jiwexun
chakabuwakubainibuwen taea
ja mai betsai janu tsua jiweabuma keskai chakabuaya
Asiria mai pakea anua inun,
Egipto mai pakea anua inun,
Jene Nilo anua inun,
Jene Éufrates anu jiwebauni nati ikabu inun,
ianenwan ukebukun jiwebaunabu inun,
mati matipa anu jiwebaunabu
jabu dasibibun matu bechipai
janu matu anu bexankanikiki.
Miqueasin jawenabu Israelbu medabewakin Dios jatu yukaxunikiaki, na janchadan
14 Mai pepa kesua anu ji xukua anu
chaxuwan juindukunmisbu keskai
minabu jau tadi jiwekubainxanunbun min aniki.
Jehováan, ja minabudan, jatu mekexun uindakubainxanwen.
Mae Basán inun mae Galaad anu
basi pepa anu jatun xenipabu min jatu iyuni keska wakin
pepas anu jatu ana iyuxanwen.
15 Egipto anua nukun xenipabu jatu taxnimabidankin
dami atimaska min jatu axuni keska wakin
ana jatu uinmakubainxanwen.
16 Nawa betsa betsapabu:
“En kushipaki”, ibiamisbu
jau min kushipa uin dakekubainunbun
jaska min jatu axuni jabias dami atimaska akin jatu uinmadiaxanwen,
jau juyu inun pata keska mapuxun uinunbunan.
17 Dunu inun nixeke mai bemaki xadabainmisbu keska
datei saki saki iki
jatun mae mishki kenebaunibu kushipa anua
jau taxnibidanxanunbunwen.
Datejaidakin medabewati mia yukai mia bebun buxankanikiki.
Jawenabuwen Jehová nuikin jatun chakabu jatu buaxunkubainmiskiaki, na janchadan
18 Nukun mekenika Dios Jehováan,
minabu eskadabes texeniwen nuikin
min jancha danankin nun chakabuwaima
tede akin min ana shinainsmawen taea
Mekenika Yushin mia keska betsa tsua jayamaki.
Nukuki sinatapakeama maintan
jaska min nuku bechipaiai
min nuku uinmamiski, nuku duawakubainkinan.
19 Nukun chakabu maiwakin inun
ianenwan medan pukua keska watan
nuku jeneama nukuwen ana nuikunkainxanwen.
20 Jaska nukun xenipabu Abraham inun Jacobube min yubakani keska wakin,
Jehováan, medabewakin nukuwen nuikin
min yubakani jancha nuku jakimawayamakubainxanwen.