Jehován Israelbu ana jatu ja anikiaki, na janchadan
6
Eska Jehován matu yuikiki. Ninkakanwen.“Benitan mati keyatapatun matu ninkatidu keska shinankin
man jawa chakabu jayamakidi jatu yuikin
mati yudabu keska shinankin
matun jui jatu ninkamakanwen.
2 Mishkipawan anu janu mati tsaua anu
mati tibibuun, ninkakanwen.
Jehován jawenabu pewakin jatu ja akikiki.
Israelin enabu chakabubu jatu unanmai ninkakubainkanwen”, itan
3 ana Jehován matu yuikin:
“Enabuun, ¿jawa en matu chakabuwaimamen?
¿Jawawen en matu bika tenemaimamen?
¡Ea yuikanwen!
4 Egipto nawabun jatu ichakawaibu
jatu dayama chakayamai nemakin
Egipto mai pakea anua
jau jabun jatu iyukubainunbun
Moisés inun jawen betsa Aarón inun jawen pui María
ean en jatu yunua
matun xenipabu jatu iyumakin
ean en jatu taxnimabidaniki.
5 Enabuun, natian ekidi jaska shinankubainkanwen.
Matun xenipabu bukubainaibu yupunun ika
jaska Moab nawabu xanen ibujaida Balac yubakabiaya
jaska Beorin juni bake Diosun jancha yuixunika Balaamnen Balac nema
matun xenipabu yupuama iniki.
Ja dikabi betsa eska shinankanwen.
Sitim anua matun xenipabu kainbidani
Jene Jordán pukebidani
Guilgal anu jiki bukin
ea en Jehová jau ea unanunbun
en jatu medabewakin binumani
jaska ana shinankin tapinkanwen”, akin matu yuikiki.
Jau jaskai yudabu jiwenunbun Jehován shinain Miqueasin jatu yuinikiaki, na janchadan
6 Jehová daewanun ixun
eska man shinanmisbuki.
Daewakin Jehová Dios manaundi jiwea kenwankin
¿jawa pepa en inankuintidumen?
Ina awa bene año bestichaiya tesentan
jawen nami inun jawen xeni Jehová kenwankin
jau ea kuaxununbun, iwanan,
nukunabu Diosbe janchaxunikabu yunukin
¿en daewatidumen? ixun
¿man jaska shinanmismen?
7 Januxun benimawakin 1,000 chaxuwan bene inun
10,000 shumu piti xeni en jatu kuamaxunaya
¿Jehová ewen benimaxanimenkain?
Jehová daewakin en juni bake iyua en jatu kuamaxunkin
jawen jancha danankin
en chakabuwakubidanima
¿tede akin en yamawatidumen?
Kanekin jaska man shinanmiski.
8 Junibuun, Jehová daewakin man jaska watidumajaidaki.
Jawada pepakidi Jehován ma matu yuinixun matu manaikiki.
Jawen yunuti kushipa kaneama inun,
pepa aki bechipainamei
yuda betsabuwen nuikunkaini inun,
ibubis keanma matun mekenika Diosun jancha ninkakin
ja besti chibankubainkanwen, matu waniki.
Padananain chanichakamisbukidi ana Jehován jatu ja anikiaki, na janchadan
9 Maewan anu jiweabu Jehován jancha kaianyan
tsuada datekin ninkakubainmis jadan, unanepaki.
Jehován matu ana yuikin:
“Maewan anu jiweabu inun
unanepa medabenanikabuun, ea ninkakanwen.
10 Jabu ichakanikabun jatu atimapa wakin
mabu inun pei ichawakubainaibu
juni chakabubun jiwe anu jayabuki.
Yaushi mabuwen kemui
jawa jatu tana pewaxun inanma yumetsuaibu
en jatu bechipaismajaidaki.
11 Jawen xankama unankin tanati chakabuwen jatu padankubainmisbu
¿jatun chakabu tede akidan,
jaskatan en jakimatidumen?
12 Na maewan anu dasibi peiyabun
jatu ichakawakin mabu inun peiwen kemukin jatu padain chanichakakin
jadakidi jatu nitimawakanikiki, jatunas wakinan.
13 Man jatu jaska wamiswen taexun
matun chakabuwen kupikin matu yamawakin en taewabainaii.
14 En matu kupikubainaya
pibiai man jawa yaniwatan
pepeama buni pae tenei man nuitapakunkainxanaii.
Jawada matu mebinun ika beaibu
matun bai anua piti bixun june jatuki datekin
man jani paxawatiduma ixanaii.
Jawada piti texe ja pikatsi
man mekekatsi june adubiaken
jau yamawai benunbun
nawa detenamenikabu en jatu yunuxanaii.
15 Bai anu banabiatan man jawa tsekama ixanaii.
Olivo ji jawen bimi xeniya tsekaxun
man tsinibia jawen xeni man jawa biama ixanaii.
Uva bimi batapa tsekaxun jaki pai pai ikin
jawen jene man bibia uva vino
man jawa akama ixanaii.
16 Samaria anu xanen ibukin
Omrínen jatu yunukubaini inun
Ahabin enabun chakabuwakubainibu
jatun beya tapinixun
chibankin man jabiaskadi wakubainaii.
Jaskawen taexun matun maewan chakabuwakin yamawakin
janu jiweabun matuki kaxekin
jau matu dakewakin datenunbun
en jatu yunuxanaii.
Jaska enabun man ea dakewakubidanibuwen taexun
eandi en matu dakejaidawaxanaii.”