—Uian. Jehováan, en mae anu eki nukuxun Nínive anu min ea yunua jatuwen nuikin min jatu kupiama ixanaiwen taea eska shinain en jawaida Tarsis anu paxai en junekainkatsis ikimaki. Mia min mekenan Dios pepa tsuabuda jatuwen dabanan ikin min jawaida sinataisma kupikatsi jatu banabimabiatan tsuabudawen nuijaidakin min shinan min betsa watidu min ea uinmaii. 3 Jaskawen taexun Jehováan, ea tenanwen, iwanan, en mia yukaii. Jaskadan, peki, en mawadan, en ana jiweyamanunan— aka

4 jakia Jehován kemakin yukakin:

—Min sinatai jaska janchaidan, ¿jaska peken min iki ikai?— aka

5 janua ja maewan anua Jonás kainkaini badi juaikidi ka januxun ja maewan jaska waimenkain, ixun januxun uinkatsi ji punyan mextexun utati watan ja naman tsauken 6 badin jau kuayamanun jexe betsa daka Jehová Diosun jawaida yume waxunkin nishi benematan Jonásin buxka mamaki junekin utawa, jaska waxuna Jonás jawen benimaya 7 ana penaya xena betsa Diosun yunua juxun nishi ewakin utawashina jawen taxu tasenbaunkin keyua xanatan nidi ikatsi utsia dakaken 8 badi mapekeaya badi juaikidia niwe xanabidi ikai Diosun xunku imabidana jawen buxka badin kuajaida Jonás unanyamasi mawakatsis ikin yuikin:

—Jaskadan, peki, en mawadan, en ana jiweyamanunan— ikaya

9 jakia Diosun kemakin yukakin:

—Nishi ewashina ikis ma xanaxuwen taea min sinatakunkainaidan, ¿jaska min shinainan, pemen?— aka

kemakin Jonásin yuikin:

—¡Jawaikika, ean en shinanan, peki! ¡Jakia sinatayabi en mawaii!— aka

10 januxun Jehován Jonás xabakabi yuikin:

—Mian nishi min banamaki. Min ewawamadiki. Meshu bestichai jukuin xaba bestichai ewatan ana meshu betsatian mawai utsixuki. Jaskabiaya ja nishiwen min nuijaidaii. 11 Jamen eadan, eskawen en nuiaii. 120,000 yuda jiweabu jawen meken yusiudi inun jawen meken yusmaudi jadatuda jawa unandiabuma inun inabu midimajaida jayawen taexun mia binui ja maewan ewapajaida Nínive anu jiweabuwen eadi en nuijaidakunikainaii— anikiaki, Diosunan.